Read Chimborazo Highland Quichua NÚMEROS 2 Bible Online

NÚMEROS 2 - Chimborazo Highland Quichua bible

NÚMEROS 2

¹Mandaj Diosca Moisestapish, Aarontapish cashna nishpami mandarca:

²“Israelcunaca Dioshuan tupanacuna carpa huasimanta carullapi carpa huasicunata shayachishpa quiquin bandera c'uchupi tiyarichun. Chaipica paicunapaj cada familiata ricuchicuj ucupi tiyarichun.

³Judá ailluca Diospaj carpa huasi ñaupaj ladoman, inti llujshin ladoman paicunapaj carpa huasicunata shayachishpa tiyarichun. Quiquin bandera c'uchupi paicunapaj soldadocuna maipi canpi tiyarichun. Judá ailluta mandajca, Aminadabpaj churi Naasonmi.

⁴Judapaj soldadocunata yupashcaca, 74.600 c'aricunami.

⁵Judapaj c'uchupica, Isacarpaj aillu soldadocuna carpa huasicunata shayachishpa tiyarichun. Isacarpaj soldadocunata mandajca Zuarpaj churi Natanaelmi.

⁶Isacarpaj soldadocunata yupashcaca, 54.400 c'aricunami.

⁷Judapaj caishuj ladopica, Zabulón aillu soldadocuna carpa huasicunata shayachishpa tiyarichun. Zabulonpaj soldadocunata mandajca Helonpaj churi Eliabmi.

⁸Zabulonpaj soldadocunata yupashcaca, 57.400 c'aricunami.

⁹Judapaj soldadocunahuan, caishuj ishqui aillucunahuan tandachishpa yupajpica, 186.400 c'aricunami. Paicunaca cada aillu, huashan huashan llujshishpa puntapi richun.

¹⁰Rubén aillupaj soldadocunaca ura ladoman tiyarichun. Paicunapaj banderapish chai c'uchullapitaj cachun. Rubenpaj soldadocunata mandajca Sedeurpaj churi Elisurmi.

¹¹Rubenpaj soldadocunata yupashcaca, 46.500 c'aricunami.

¹²Rubenpaj c'uchupica Simeón aillupaj soldadocuna carpa huasicunata shayachishpa tiyarichun. Simeonpaj soldadocunata mandajca, Zurisadaipaj churi Selumielmi.

¹³Simeonpaj soldadocunata yupashcaca, 59.300 c'aricunami.

¹⁴Rubenpaj caishuj ladopica, Gad aillupaj soldadocuna carpa huasicunata shayachishpa tiyarichun. Gadpaj soldadocunata mandajca, Reuelpaj churi Eliasafmi.

¹⁵Gadpaj soldadocunata yupashcaca, 45.650 c'aricunami.

¹⁶Rubenpaj soldadocunahuan, caishuj ishqui aillucunahuan tandachishpa yupajpica, 151.450 c'aricunami. Paicunapish puntapi ricuj aillucunata catishca, cada aillu huashan huashan catishpa richun.

¹⁷Chai q'uipaca, levitacuna Dioshuan tupanacuna carpa huasita apashca richun. Paicunaca Diospaj carpa huasi muyundijpi ima shina tiyacushca shinallataj, paicunapaj carpacunata apacujcunapaj chaupipi apashca richun. Levitacunapish cada quiquin bandera ucupi huashan huashan richun.

¹⁸Efraín aillupaj soldadocunaca inti huashicun ladoman tiyarichun. Paicunapaj banderapish chai c'uchullapitaj cachun. Efraín aillupaj soldadocunata mandajca, Amiudpaj churi Elisamami.

¹⁹Efrainpaj soldadocunata yupashcaca, 40.500 c'aricunami.

²⁰Efrainpaj c'uchupica Manasés aillupaj soldadocuna carpa huasicunata shayachishpa tiyarichun. Manasespaj soldadocunata mandajca Pedasurpaj churi Gamalielmi.

²¹Manasespaj soldadocunata yupashcaca, 32.200 c'aricunami.

²²Efrainpaj caishuj ladopica, Benjamín aillupaj soldadocuna carpa huasicunata shayachishpa tiyarichun. Benjaminpaj soldadocunata mandajca Gedeonipaj churi Abidanmi.

²³Benjaminpaj soldadocunata yupashcaca, 35.400 c'aricunami.

²⁴Efraínpaj soldadocunahuan, caishuj ishqui aillucunahuan tandachishpa yupajpica, 108.100 c'aricunami. Paicunaca Dioshuan tupanacuna carpa huasita apacujcunapaj huashata, cada aillucuna huashan huashan catishpa richun.

²⁵Dan aillupaj soldadocunaca janaj ladoman tiyarichun. Paicunapaj banderapish chai c'uchullapitaj cachun. Danpaj soldadocunata mandajca, Amisadaipaj churi Ahiezermi.

²⁶Danpaj soldadocunata yupashcaca, 62.700 c'aricunami.

²⁷Danpaj c'uchupica Aser aillupaj soldadocuna carpa huasicunata shayachishpa tiyarichun. Aserpaj soldadocunata mandajca Ocranpaj churi Pagielmi.

²⁸Aserpaj soldadocunata yupashcaca, 41.500 c'aricunami.

²⁹Dan aillupaj caishuj ladopica, Neftalí aillupaj soldadocuna carpa huasicunata shayachishpa tiyarichun. Neftalipaj soldadocunata mandajca, Enanpaj churi Ahirami.

³⁰Neftalipaj soldadocunata yupashcaca, 53.400 c'aricunami.

³¹Danpaj soldadocunahuan, caishuj ishqui aillucunahuan tandachishpa yupajpica, 157.600 c'aricunami. Paicunaca tucuicunapaj catita paicunapaj banderapaj huashapi richun” nircami.

³²Israelpaj huahua huahuacunaca cada yayamanta mirarishcacunata cada huasi familiata ima shina cashcata quillcashpa yupashcaca cashnami. Tucui chaicunata cada aillupi caj soldadocuna ima shina cashca shinallatataj tucuita yupajpica, 603.550 soldadocunami.

³³Levitacunataca Mandaj Dios Moisesta mandashca shinallataj caishuj israelcunahuanca mana tandachishpa yupashcachu carca.

³⁴Israelcunaca Mandaj Dios Moisesta mandashca shinallatajmi tucuita rurarca. Paicunaca cada ñaupa yayamanta ima shina mirarimushca shinallatajmi, cada familia quiquin bandera c'uchupi carpa huasicunata shayachishpa causajcuna carca. Puri callarishpapish chashnallatajmi rijcuna carca.