Read Chimborazo Highland Quichua NÚMEROS 21 Bible Online

NÚMEROS 21 - Chimborazo Highland Quichua bible

NÚMEROS 21

¹Cananeocunata jatun mandajca Neguev llajtapi caj Arad pueblopimi causarca. Paica Atarim puebloman rina ñanta israelcuna shamucun nijta uyashpami, israelcunahuan macanacunaman llujshishpa israelcunahuan macanacushpa maijancunataca prezu japirca.

²Chaimi israelcunaca Mandaj Diostaca: “Cai gentecunata ñucanchij maquipi churajpica, tucui cai llajtapaj pueblocunatami chingachishun. Ñucanchij chashna rurashunmi nishcataca pajtachishuntajmi” nircacuna.

³Mandaj Diosca israelcuna mañashcata uyashpa, cananeocunata israelcunapaj maquipi churajpimi, paicunaca chai llajtapi causajcunatapish, paicunapaj pueblocunandij tucuita chingachirca. Chaimantami chai llajtataca Horma shutita shutichirca.

⁴Israelcunaca Hor urcumanta rishpaca, Edomta muyungapajmi, Puca Cuchaman rina ñanta rircacuna. Ashtahuanpish israelcunaca yallitaj achcata puricushpalla ña mana rishun nishpami,

⁵Taita Diostapish, Moisestapish juchachishpa cashna rimarcacuna: — Egiptomantaca ¿imapajtaj huichiyachimurcangui? Cai shitashca pambapi huañuchunllamari llujshichimushcangui. Caipica micunapish, yacupish mana tiyanchu. Cai yanga micunallataca, ña aminchijmi — nircacuna.

⁶Shina nijpimi Mandaj Diosca israelcunahuan p'iñarishpa, venenoyuj culebracuna israelcunata canichun cacharca. Chashnami achca israelcuna huañurca.

⁷Chaimi israelcunaca Moisespajman rishpa cashna nircacuna: — Ñucanchijca Mandaj Diostapish, cantapish juchachishpa rimashpaca, juchallishcanchijmari. Cunanca chai culebracunata ñucanchij c'uchumanta anchuchichun Mandaj Diosta mañapai — nijpimi israelcunamanta Moisés mañajpica,

⁸Mandaj Diosca cashna nishpa cutichirca: — P'iña culebrata rurashpa, banderata churana caspi puntapi churai. Culebra canishca cajca, chaita ricushpa ama huañuchun chashna rurai — nirca.

⁹Shina nijpi Moisesca bronce culebrata rurashpami, banderata churana caspi puntapi churarca. Culebra maijanta canijpica, bronce culebrata ricushpami mana huañurca.

¹⁰Chai q'uipaca israelcunaca Obot pueblocama rishpami, chaipi carpa huasicunata shayachishpa tiyarirca.

¹¹Obotmanta rishpaca Ije-abarim pueblopimi carpa huasicunata shayachishpa tiyarirca. Chai puebloca Moabmantaca inti llujshin ladoman, Moab ch'imbapurapi caj shitashca pambapimi carca.

¹²Ije-abarimmanta rishpaca, Zered pugru pambapimi carpa huasicunata shayachishpa tiyarirca.

¹³Zeredmanta rishpaca Arnón jatun yacu ch'imba ladopimi carpa huasicunata shayachishpa tiyarirca. Arnonca amorreocunapaj llajtamanta llujshina shitashca pambapimi. Moab llajtahuan, amorreocunapaj llajtahuan lindeca Arnón jatun yacumi.

¹⁴Chaimantami Mandaj Diospaj macanacuimanta quillcashca libropica, cashna nishca tiyacun: “Puca Cuchapi imallata rurashcata. Arnón jatun yacupi imallata rurashcata.

¹⁵Ar puebloman uriyaj yacucunapi imallata rurashcatami” huillan. Chai yacuca Moab llajta linde chaipimi tupanacun.

¹⁶Arnón jatun yacumantaca Beermanmi rircacuna. Chai pugyupimi Mandaj Diosca Moisestaca: “Israelcunata tandachi, yacuta cusha” nirca.

¹⁷Chaipimi israelcunaca cashna cantarcacuna: “¡Yacu, cai pugyumanta llujshiyari! ¡Taita Diosta cantayari!

¹⁸Mandajcunaca mandana caspihuanmi allarcacuna. Israelcunata pushajcunaca paicunapaj taunacunahuanmi allarcacuna” nircacunami. Israelcunaca shitashca pambamantaca Matana shuti pueblomanmi rircacuna.

¹⁹Matana pueblomantaca Nahaliel jatun yacucamami rircacuna. Nahaliel yacumantaca Bamot pueblomanmi rircacuna.

²⁰Bamotmantaca Moab llajtapi caj pugru pambaman, Pisga shuti urcu puntamanmi rircacuna. Chai urcumantaca, shitashca pambacunatapish ricunallami carca.

²¹Israelcunaca amorreocunata jatun mandaj Sehonhuan rimachunmi paipaj randi huillajcunataca cashna nishpa cacharca:

²²“Ñucanchijmi cambaj llajtata pasangapaj ñanta mañachichun roganchij. Ñucanchijca cambaj chagracuna jahuatapish, uva chagracuna jahuatapish mana rishunchu. Cancunapaj pugyucunamantapish yacuta mana ubyashunchu. Cambaj llajtata pasangacama jatun ñanllatami rishun” nichunmi cacharca.

²³Chashna mañajpipish Sehonca paipaj llajtata israelcuna pasachunca mana saquircachu. Ashtahuanpish Sehonca paipaj gentecunata tandachishpami, israelcunahuan macanacungapaj shitashca pambaman llujshishpa, Jahaza puebloman chayashpa chaipi israelcunahuan macanacurca.

²⁴Chaipimi israelcunapish amorreocunata espadahuan huañuchishpa paicunapaj llajtataca Arnón jatun yacumanta callarishpa Jaboc jatun yacucama, Amón llajtapaj lindecunacama quichurcacuna. Amón llajtapaj lindeca sinchi pircata rurashcami carca.

²⁵Israelcunaca amorreocunapaj tucui pueblocunatami japircacuna. Hesbón pueblotapish muyundij uchilla pueblocunandij japishpami chaipi causarcacuna.

²⁶Amorreocunata jatun mandaj Sehonca, Hesbón pueblopimi causarca. Paica ñaupamanmi Moab llajtata jatun mandajhuan macanacushpa mishashpa Moab llajtataca Arnón jatun yacucama quichushca carca.

²⁷Chaimantami yuyachij sumaj shimicunata quillcajcunaca cashna cantarcacuna: “Hesbonman shamuichigari. Chai pueblota allichishpa cutin shayachichigari. Jatun mandaj Sehonpaj pueblotaca cutin shayachichigari.

²⁸Hesbón pueblomantaca ninami llujshirca. Jatun mandaj Sehonpaj pueblomantaca lunyacuj ninami llujshirca. Chai ninaca Moabpi caj Ar pueblotaca chingachircami. Arnón yacu jahuanijcunapi causaj mandajcunatapish chingachircami.

²⁹¡Moab llajtalla, aij imataj tucurcanguiyari! Quemos diospaj gentecunalla chingarishcamari. Quemos diosca paipaj churicuna miticushpa richunpish saquishcallamari. Paipaj ushushicunata amorreocunata jatun mandaj Sehón prezu apachunpish saquishcallamari.

³⁰Chashna cashca cajpipish pai mandacun llajtataca chingachircanchijmari. Hesbón pueblotaca, Dibón pueblocamami chingachircanchij. Nofa pueblotaca, Medeba pueblocamami chingachircanchij” nircacunami.

³¹Israelcunaca amorreocunata chashna mishashpami chai llajtapi causarcacuna.

³²Moisesca Jazer pueblotapish rijsimugrijcunata cachashpami, chai pueblotapish muyundij uchilla pueblocunandij japishpa chaipi causaj amorreocunataca llujshichishpa cacharca.

³³Chaimanta tigrashpaca israelcunaca Basanman rina ñantami huichiyarcacuna. Chaimi Basán llajtata jatun mandaj Ogca, tucui paipaj gentecunata tandachishpa israelcunahuan macanacungapaj llujshishpa Edrei pueblopi israelcunahuan macanacurca.

³⁴Mandaj Diosca Moisestaca: “Ama manchaichu, ñucami jatun mandajtaca paipaj tucui gentecunandij, paipaj llajtandij cancunapaj maquipi ña churarcani. Paicunataca Hesbonpi causaj amorreocunata, paicunata jatun mandaj Sehonta shinallatajmi rurangui” nircami.

³⁵Israelcunaca Mandaj Dios nishca shinallataj rurashpami jatun mandaj Ogtaca paipaj churicunandij, tucui chaipi causajcunandij shujllatapish mana saquishpa tucuita huañuchishpa, paicunapaj llajtatapish japirca.