Read Chimborazo Highland Quichua NÚMEROS 23 Bible Online

NÚMEROS 23 - Chimborazo Highland Quichua bible

NÚMEROS 23

¹Chaipimi Balaamca, Balactaca: — Canchis altarcunata caipi shayachi. Canchis bizicunatapish, canchis carnerocunatapish huañuchishpa allichichi — nirca.

²Balacca Balaam nishca shinallatajmi rurarca. Chaipimi Balacpish, Balaampish shuj bizihuan, shuj carnerohuan cada altarpi churashpa rupachircacuna.

³Balaamca, Balactaca cashnami nirca: — Canca can cushpa tucui rupachicushca c'uchullapitaj shuyacui. Ñucaca Mandaj Dios ñucahuan tupangapaj shamungapishchari. Paihuan tupanamanmi rini. Pai ñucaman imata huillashcata canman yachaj chayachishami — nishpaca, shitashca lluchulla urcumanmi rirca.

⁴Taita Dios chai urcupi Balaamhuan tupanaman shamujpimi, Balaamca Taita Diostaca: — Canchis altarcunata rurashpa shayachichun mandashpa chai altarcunapica, cada altarpi shuj bizita, shuj carnerota cushpa rupachishpami shamurcani — nirca.

⁵Shina nijpimi Mandaj Diosca Balaam imallata rimanata paipaj shimipi churashpaca: — Balac maipi canman tigrashpa rishpa, ñuca canman imallata nishcata huillai — nirca.

⁶Balaamca, Balacpajman tigrashpaca, pai cushpa tucui rupachicushca c'uchullapitaj paihuan caj pushajcunandij tandalla shayacujtami japirca.

⁷Chaipimi Balaamca Mandaj Dios huillachishcata cashna nishpa sumajta huillarca: “Aran llajtamantami Balacca ñucataca pushamurca. Inti llujshin ladoman caj urcucunamantami Moab llajtata jatun mandajca pushamurca. ¡Jacobta imapish tucushca canman ningapaj shamui! Israelcunata llaquichingapaj shamui nishpami pushamurca.

⁸Imapish tucuchun ninata Taita Dios mana saquijpica ¿maitataj imapish tucushca canman nishari? Mandaj Dios manapish llaquichishcataca ñucacarin ¿maitataj llaquichishari?

⁹Cai peña urcucuna puntamantami israelcunataca ricuni. Cai lomacunamantami israelcunataca ricuni. Israelcunaca ima manchai illajllami causacuncuna. Israelcunaca shujtaj llajtacuna shina mana causancunachu.

¹⁰Jacobpaj ñutu allpataca ¿pitaj yupai tucungari? Israelcunataca chuscupi ch'icanchishca cajpipish, chai shuj mirgallatapish ¿pitaj yupai tucungari? Ñucapish ima pandata mana rurajcuna huañuj shinallataj huañushpachari alli caiman. Ñuca causana punllacunapish paicuna causashca shinallataj cachun” nircami.

¹¹Shina nijpimi Balacca, Balaamtaca: — ¿Imatataj ruracunguichu imamí? Ñucata p'iñajcunata imapish tucushca cachun nichunmari cantaca pushamurcani. Ashtahuanpish paicunataca ashtahuan alli cashca cachun ninatachu callaringui imamí — nirca.

¹²Chaimi Balaamca Balactaca: — Mandaj Dios ñuca shimipi churashcallatami rimana cani — nirca.

¹³Balacca: — Cunanca israelcuna causacun carpa huasicunata maimantami mana tucuita ricunalla, chaiman jacu. Chaimanta paicunataca imapish tucushca cachun ningui — nircami.

¹⁴Shina nishpaca, Pisga nishca urcu puntapi caj Zofim pambamanmi pusharca. Chaipipish canchis altarcunata shayachishpami, cada altarpi shuj bizita, shuj carnerota cushpa rupachirca.

¹⁵Chaipimi Balaamca Balactaca: — Canca can cushpa tucui rupachicushca c'uchullapitaj shuyacui. Ñucaca Taita Dioshuan tupangapajmi rini — nirca.

¹⁶Mandaj Diosca Balaamhuan tupashpaca, imalla rimanata Balaampaj shimipi churashpami: — Balac maipi cashcaman tigrashpa rishpa, ñuca imalla nishcata huillagri — nirca.

¹⁷Balaam tigrashpaca Balactaca pai cushpa tucui rupachicun c'uchupi paihuan caj pushajcunahuan tandalla shayacujtami japirca. Chaipimi Balacca Balaamtaca: — ¿Mandaj Diosca imatataj nin? — nirca.

¹⁸Chaimi Balaamca, Mandaj Dios imalla nishcataca cashna nishpa sumajta huillarca: “Balac jatariyari, uyayari. Ziporpaj churi ñuca huillashcata alli uyayari.

¹⁹Taita Diosca mana runachu. Llullangapajca. Taita Diosca huañujlla runa shina pai rurasha nishcataca mana shujtajyachijchu. Pai rurasha nishcataca ¿manachari pajtachingari? Pai ari nishcataca ¿manachari pajtachingari?

²⁰Israelcunata alli cashca cachun ninatamari Taita Diosmantaca chasquircani. Israelcunata alli cashca cachun ninataca paimari curca. Chaimanta ñucaca maitataj imapish tucushca cachun nishari.

²¹Jacobpaj huahua huahuacunapica ima mana allita rurajta mana ricushcachu. Israelcunapica ima millaita rurajta mana ricushcachu. Mandaj paicunapaj Taita Diosmari paicunahuanca. Paicunaca ñucanchijta Jatun Mandaj nishpami alabancuna.

²²Egiptomanta llujshichimuj Taita Diosca, búfalo huagra shina fuerzayujmi.

²³Jacobpaj huahua huahuacunata llaquichingapajca brujocunaca mana tiyanchu. Israelcunata llaquichingapajca adivinocunaca mana tiyanchu. Ashtahuanpish Taita Dios Jacobpaj, israelcunapaj sumaj allicunata rurashcata ricushpaca cunan shinallatajmi mancharingacuna.

²⁴Cai israelcunaca león shinamari jataringa. León shinamari shayaringa. Leonca huañuchishpa millpungacama mana siririnchu. Huañuchishpa yahuarta ubyangacama mana siririnchu. Cai gentecunapish chashnallatajmi canga” nircami.

²⁵Shina nijpimi, Balacca Balaamtaca: — Israelcunata imapish tucushca canman mana ni tucushpaca, alli cashca canman nishpapish ama nichuyari — nirca.

²⁶Chaimi, Balaamca Balactaca: — Manachu ñucaca Mandaj Dios ñucata imata nichun nishcallatami nisha nircani — nirca.

²⁷Chaimi, Balacca Balaamtaca: — Cunanca shujtajmanmi pushagrini. Chaiman ñucahuan richunmi rogani. Chaimanta israelcunata imapish tucushca canman nichun Taita Dios saquingapishchari — nirca.

²⁸Shina nishpaca Balacca, Balaamtaca shitashca pambacunata tucuita ricunalla Peor shuti urcu puntamanmi pusharca.

²⁹Chaipimi Balaamca, Balactaca: — Caipipish canchis altarcunata shayachi. Canchis bizicunatapish, canchis carnerocunatapish huañuchishpa allichi — nirca.

³⁰Shina nijpimi Balacca, Balaam nishca shina rurashpa cada altarpi shuj bizita, shuj carnerota cushpa rupachirca.