Read Chimborazo Highland Quichua NÚMEROS 24 Bible Online

NÚMEROS 24 - Chimborazo Highland Quichua bible

NÚMEROS 24

¹Israelcunataca Mandaj Diosca alli cashca cachun nichunllataj munacushcata ricushpami, Balaamca ñaupacunaman ishqui cutin tapushca shinallatajca mana tapugrirca. Ashtahuanpish shitashca pamba ladoman muyurishpami shayarirca.

²Chaimantaca israelcunaca cada aillu ch'ican ch'ican paicunapaj carpa huasicunata shayachishpa tiyacujtami ricurca. Diospaj Espíritu paipaj jahuaman shamujpimi,

³paica Dios huillachishcata cashna huillarca: “Beorpaj churi Balaamca cashnami nin. Alli ricushpa huillaj runaca cashnami nin.

⁴Taita Dios imalla nishcacunata uyashpa huillajca cashnami nin. Paica urmarcami. Ñahui pascashcami urmarca. Chaipica Pailla Tucuita Rurai Tucuj Dios muscuipi shina ricurishpa huillashcatami uyarca.

⁵¡Jacob cambaj carpa huasicunaca yallitaj sumajmari. Israel cambaj causanaca yallitaj sumajmari!

⁶Israelcunapaj carpa huasicunaca larca yacucuna shina huachujllami. Jatun yacu uripi tiyaj huertacuna shinami. Mandaj Dios tarpushca áloe yuracuna shinami. Yacucuna uripi tarpushca cedro yuracuna shinami.

⁷Israelcunapaj yacuca jicharicunmi. Paicunapaj huahua huahuacunami yallitaj achca yacuta charingacuna. Israelcunata jatun mandajca, Agagta yallimari. Pai mandanaca jatunyachishcamari.

⁸Egiptomanta llujshichimuj Taita Diosca, búfalo huagra shina fuerzayujmi. Israelcunaca paicunata p'iñaj llajtacunataca millpungami. Paicunapaj tullucunatapish ñutungami. Israelcunaca paicunapaj flechacunahuan pasajtami satingacuna.

⁹Pacajlla chaparashpa siricuj león shinami cangui. Pacajlla chaparashpa siricuj mama león shinami cangui. ¿Pitaj cantaca rijchachi tucungari? ¡Cancunata alli cashca cachun nijcunaca, alli cashca cachun. Cancunata imapish tucushca cachun nijcunaca, jatun llaqui tucushca cachun!” nircami.

¹⁰Shina nijpimi, Balacca, Balaamhuan nina sindirij shina p'iñarishpa maquicunapi huajtarishpa cashna nirca: — Cantaca, ñucata p'iñajcunata imapish tucushca canman nichunmi pushamurcani. Ashtahuanpish canca ñucata p'iñajcunataca, ñamari quimsa cutin alli cashca cachun ningui.

¹¹Cunanca cambaj llajtaman utca rilla. Ñucaca canmanca ñuca munashcatami cusha nircani. Ashtahuanpish Mandaj Diosmari canman chashna cunataca jarcan — nircami.

¹²Chaimi Balaamca: — Ñucata pushanaman can cachashcacunamanca manachu ñucapish cashna nircani:

¹³Jatun mandaj Balac, paipaj huasi ucu junda cullquita, curita ñucaman cujpipish Mandaj Dios mandashcata mana cazushpa ñuca munaimanta allitapish mana allitapish mana rurai tucunichu. Ashtahuanpish Mandaj Dios imata rimachishcallatami ñucaca nisha nircanitaj shiná.

¹⁴Cunanca ñucaca ñuca gentecunapajmanmi ña rigrini. Shina cashpapish, q'uipa punllacunapi israelcuna cambaj gentecunata imata rurana cashcata huillangapaj shamui — nircami.

¹⁵Chaipica shamuj punllacunapi imalla tucuna cashcatami cashna nishpa huillarca: “Beorpaj churi Balaamca cashnami nin. Alli ricushpa huillaj runaca cashnami nin.

¹⁶Taita Dios imalla nishcacunata uyashpa huillajca cashnami nin. Paica urmarcami. Ñahui pascashcami urmarca. Chaipica Pailla Tucuita Rurai Tucuj Dios muscuipi shina ricurishpa huillashcatami uyarca.

¹⁷Imalla tucunataca ricunimari. Chaica mana cunan punllachu chashna tucunga. Shamuj punllapi imalla tucunataca ashallatamari ricuni. Chaica caimi: Jacobmantaca LUZEROMI llujshinga. Israelmantaca mandana varami llujshinga. Moabtaca rinrin jahuanijllapimi chugrichinga. Setpaj huahua huahuacunataca tucuimi chingachinga.

¹⁸Edomtaca japingacunami. Seirtapish japingacunami. Paicunata p'iñajcunami japingacuna. Israelcunaca jatun milagrocunatami rurangacuna.

¹⁹Jacobmantaca tucuita mishajmi llujshinga. Jatun pueblopi saquirishcacunatapish chingachingami” nircami.

²⁰Amaleccunata ricushpapish shamuj punllacunapi paicuna imalla tucunatami cashna huillarca: “Amalecca llajtacunapaj umami. Ashtahuanpish tucuitaj chingachishcami canga” nircami.

²¹Ceneocunata ricushpapish, shamuj punllacunapi paicuna imalla tucunatami cashna huillarca: “Ceneocuna cancuna causanaca pi mana cuyuchipaj sinchimari. Cancunapaj tazinca peña urcupimari.

²²Ashtahuanpish, ceneocunaca tucuitaj chingachishcami canga. Asiriocuna prezu apajpimi, chashna tucunga” nircami.

²³Chai q'uipaca shamuj punllacunapi imalla tucuna cashcataca cashnapishmi nirca: “Tucui chaicunata Taita Dios chashna rurajpica ¡aij!, ¿pitaj causangari?

²⁴Mama cucha chaupipi caj Quitim llajtamantaca jatun barcocunami shamunga. Chaicunaca Asiriatami llaquichinga. Hebertapish llaquichingami. Chashna ruraj cashpapish tucuitaj chingachishcami canga” nircami.

²⁵Chai q'uipaca, Balaamca, paipaj llajtamanmi tigrarca. Balacpish pai maiman rina cashcaman rircallami.