Read Chimborazo Highland Quichua NÚMEROS 25 Bible Online

NÚMEROS 25 - Chimborazo Highland Quichua bible

NÚMEROS 25

¹Israelcunaca Sitim pueblopi cashpami, Moabita huarmicunahuan huainayai callarircacuna.

²Chai huarmicunaca paicunapaj dioscunaman animalcunata huañuchishpa cucushpami, israelcunatapish chaiman cayarcacuna. Chaipimi israelcunaca rurashcalla dioscunaman cushcacunata micurcacuna, chai dioscunapaj ñaupajpi cungurircacuna.

³Chashnami israelcunaca, Baal-peor nishca diosta catircacuna. Chaimi Mandaj Diosca israelcunahuanca nina sindirij shina yallitaj p'iñarirca.

⁴Mandaj Diosca Moisestaca: — Israelcunata pushajcunata tucuicunata japishpa, chaupi punlla inti achijnicujpi Mandaj Diospaj ñaupajpi sipishpa huañuchi. Mandaj Dios israelcunahuan yallitaj p'iñarishcata anchuchingapaj chashna rurai — nircami.

⁵Chaimi Moisesca, israelcunata pushajcunataca: — Cancunapaj aillucunapuramanta maijancunalla Baal-peorta adorajcunataca, cada ailluta pushajcunallataj japishpa huañuchichij — nirca.

⁶Moisespish, tucui israelcunapish Mandaj Dioshuan tupanacuna carpa huasi ñaupajpimi huacacurcacuna. Paicuna ricucujpimi israelcunapuramanta shuj runaca, paicunapajman madianita huarmita pushashca chayamurca.

⁷Aarón curapaj nieto Eleazarpaj churi Finees chaita ricushpaca, tandanacushca israelcunapaj chaupimanta jatarishpa lanzata japishpa rishpami,

⁸chai Israel runapaj carpa huasiman catishpa yaicushpa, Israel runatapish, chai huarmitapish espadahuan huijsamanta huashaman pasajta satishpa ishquindijtataj huañuchirca. Chai runata huañuchijpimi, israelcunata huañuchishpa llaquichicun llaquica pararirca.

⁹Chai llaquipi huañujcunaca 24.000mi carca.

¹⁰Mandaj Diosca, Moisestaca cashnami nirca:

¹¹— Aarón curapaj nieto Eleazarpaj churi Fineesmi israelcunahuan ñuca yallitaj p'iñarishcataca anchuchin. Fineesca paicunapurapi millaita rurajtaca p'iñashpa ñuca shinallataj huañuricujmi. Paimantami ñucaca israelcuna millaita rurashcamanta huañurishpa llaquichishpa tucuchinataca pararini.

¹²Chaimanta paimanca cashna ni: Ñucaca paimanca sumaj causaita cunatami ari nini.

¹³Paipish, paipaj huahua huahuacunapish, chaipaj q'uipa huahua huahuacunapish curacuna tucushpa caticuchunllami churagrini. Taita Diospajlla canamantatajca huañucuj cashcamanta israelcunapaj juchata anchuchingapaj chai runata huañuchishcamantami chashna ruragrini ni — nircami.

¹⁴Madianita huarmindijta huañuchishca runaca Salu runapaj churi Zimrimi carca. Salu runaca Simeón aillupi caj familiacunapurapi shuj huasi familiata pushajmi carca.

¹⁵Madianita huarmica, Zur runapaj ushushi Cozbi shutimi carca. Zur runaca, madianitapurapi caj familiacunapaj shuj huasi familiapaj yaya, madianitacunata mandajmi carca.

¹⁶Mandaj Dios Moisesta mandashpaca cashnami nirca:

¹⁷Madianitacunata macashpa huañuchigrichij.

¹⁸Paicunami cancunataca Baal-peor nishca diosta adoranaman umashpa pushashpa llaquichirca. Baal-peor shuti diosta adorashcamanta israelcunata llaquichicui punllapimi, cancunahuan huainayaj jatun mandajpaj Cozbi shuti ushushitapish huañuchirca — nircami.