Read Chimborazo Highland Quichua NÚMEROS 28 Bible Online

NÚMEROS 28 - Chimborazo Highland Quichua bible

NÚMEROS 28

¹Mandaj Dios Moisesta mandashpaca cashnami nirca:

²Israelcunata mandashpaca cashna ni: Ñucaman cuna cashcatapish, ñucapaj micuna cachun cusashpa cunatapish ñuca mandashca punllapitaj cuchun mandai. Chai cushcacunaca ñucapajca mishquijlla ashnacujmi canga.

³Paicunataca Mandaj Diosman cushpa rupachinataca caicunata cuchun mandai: Shuj huatata charij ishqui malta c'ari ovejata punllanta cuchun. Chaicunaca ima mana tucushca cachun. Chai shina cushpa tucui rupachinataca punllanta cucuchunlla.

⁴Shuj malta c'ari ovejataca tutamanta cuchun, caishuj malta c'ari ovejataca chishita cuchun.

⁵Chaquishca granotaca shuj efata chungapi chaupishca shuj parte ashtahuan alli cutata, olivasta tacashca shuj hin aceiteta chuscupi chaupishca shuj parte aceitehuan chapushcahuan cuchun.

⁶Mandaj Diospaj mishquijlla ashnacuj cachun cushpa Mandaj Diosman punllanta cunataca, Sinaí urcupi mandashcami.

⁷Tallina vinotaca shuj hinta chuscupi chaupishca, shuj parteta cada malta c'ari ovejahuan cuchun. Ashtahuan alli vinotaca Diospajlla ucupi Mandaj Diospaj ñaupajpi tallichun.

⁸Caishuj malta c'ari ovejataca chishita cuchun. Tutamanta imallahuan cushca shinallataj cuchun. Tallina vinotapish tutamanta cushca shinallataj cuchun. Chai cushcacunaca Mandaj Diospajca mishquijlla ashnacujmi canga.

⁹Samana punllapica, shuj huatayuj ishqui c'ari ovejata cuchun. Chaicunaca ima mana tucushca cachun. Chaquishca granotaca shuj efata chungapi chaupishca ishqui parte ashtahuan alli cutata aceitehuan chapushcahuan cuchun. Tallina vinotapish cuchun.

¹⁰Cushpa tucui rupachinata, tallina vinota, punllanta cucushca jahuapish samana punllapi cushpa tucui rupachinataca cada samana punllapi cucuchunlla.

¹¹Quilla callari punta punllapica ishqui bizita, shuj carnerota, shuj huatayuj canchis c'ari ovejata Mandaj Diosman cushpa tucui rupachichun. Chai animalcunaca ima mana tucushca cachun.

¹²Bizicunahuanca cada bizihuan shuj efata chungapi chaupishca quimsa parte ashtahuan alli cutata aceitehuan chapushcahuan cuchun. Carnerocunahuanca cada carnerohuan shuj efata chungapi chaupishca, ishqui parte ashtahuan alli cutata aceitehuan chapushcahuan cuchun.

¹³Shuj huatayuj c'ari ovejacunahuanca cada ovejahuan shuj efata chungapi chaupishca shuj parte ashtahuan alli cutata aceitehuan chapushcahuan cuchun. Chai cushcacunaca Mandaj Diospajca mishquijlla ashnacujmi canga.

¹⁴Tallina vinotaca cashna cuchun: Bizicunahuanca cada bizihuan shuj hinta ishquipi chaupishca shuj parte vinohuan cuchun. Carnerocunahuanca cada carnerohuan shuj hinta quimsapi chaupishca shuj parte vinohuan cuchun. Shuj huatayuj c'ari ovejacunahuanca cada ovejahuan shuj hinta chuscupi chaupishca shuj parte vinohuan cuchun. Mandaj Diosman cushpa tucui rupachinataca, quilla callari punllapica, cada quilla huata jundatataj cucuchunlla.

¹⁵Cushpa tucui rupachinata, tallina vinota punllanta cucushca jahuapish, juchamanta Mandaj Diosman cunataca shuj chivota cuchun.

¹⁶Mandaj Diospaj Pascua punllaca huatapaj punta quilla, chai quillapaj chunga chuscu punllapimi canga.

¹⁷Chai quillapaj chunga pichca punllapica jatun fiesta cachun. Chaipica canchis punllacunata levadura illajlla tandata micunguichij.

¹⁸Fiesta callari punta punllapica tucuicunata cayashpa Diospajlla tandanacuita ruranguichij. Chai punllapica sinchi trabajocunataca imata ama ruranguichij.

¹⁹Chai punllacunapi Mandaj Diosman cushpa rupachinataca ishqui bizita, shuj carnerota, shuj huatayuj canchis c'ari ovejacunata cushpa tucui rupachinguichij. Chai animalcunaca ima mana tucushca cachun.

²⁰Bizicunahuanca cada bizihuan shuj efata chungapi chaupishca quimsa parte alli cutata aceitehuan chapushcahuan cunguichij. Carnerocunahuanca cada carnerohuan shuj efata chungapi chaupishca ishqui parte ashtahuan alli cutata aceitehuan chapushcahuan cunguichij.

²¹Shuj huatayuj c'ari ovejacunahuanca cada ovejahuan shuj efata chungapi chaupishca shuj parte ashtahuan alli cutata aceitehuan chapushcahuan cunguichij.

²²Juchallishcamanta Mandaj Dioshuan alli tucungapajca shuj chivota cunguichij.

²³Tucui caicunataca cada tutamanta punllanta cushpa tucui rupachicushca jahuapish cunguichij.

²⁴Chai fiestapica, Mandaj Diospaj mishquijllata ashnacuj cachunca micunatapish, cushpa rupachinacunatapish, canchis punllapitaj chai shinallataj ruranguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

²⁵Fiesta tucuri canchis punllapica, tucuicunata cayashpa Diospajlla tandanacuita ruranguichij. Chai punllapica sinchi trabajocunataca imata ama ruranguichij.

²⁶Punta p'ucushca mushuj granocunata Mandaj Diosman cucui semana fiesta punllapipish, tucuicunata cayashpa Diospajlla tandanacuita ruranguichij. Chai punllapica sinchi trabajocunataca imata ama ruranguichij.

²⁷Mandaj Diospaj mishquijlla ashnacuj cachun cushpa tucui rupachinataca, ishqui bizita, shuj carnerota, shuj huatayuj canchis c'ari ovejacunata cunguichij.

²⁸Chaicunahuan cuna cutataca bizicunahuanca cada bizihuan shuj efata chungapi chaupishca, quimsa parte ashtahuan alli cutata aceitehuan chapushcahuan cunguichij. Carnerocunahuanca cada carnerohuan shuj efata chungapi chaupishca ishqui parte ashtahuan alli cutata aceitehuan chapushcahuan cunguichij.

²⁹Shuj huatayuj c'ari ovejacunahuanca, cada ovejahuan shuj efata chungapi chaupishca shuj parte ashtahuan alli cutata aceitehuan chapushcahuan cunguichij.

³⁰Cancunapaj juchacunamantaca shuj chivota cunguichij.

³¹Cushpa tucui rupachinata, tallina vinotapish punllanta cuna cashcataca chai punllacunapipish ama saquinguichijchu. Chai animalcunaca ima mana tucushca cachun.