Read Chimborazo Highland Quichua NÚMEROS 29 Bible Online

NÚMEROS 29 - Chimborazo Highland Quichua bible

NÚMEROS 29

¹Canchis quillapaj punta punllapica, tucuicunata cayashpa Diospajlla tandanacuita ruranguichij. Chai punllapica cancuna trompetacunapi tocana punlla cachun. Chai punllapica sinchi trabajocunataca imata ama ruranguichij.

²Mandaj Diospaj mishquijlla ashnacuj cachun cunataca shuj bizita, shuj carnerota, shuj huatayuj canchis c'ari ovejacunata cushpa tucui rupachinguichij. Chai animalcunaca ima mana tucushca cachun.

³Chaicunahuan cuna cutataca, bizihuanca shuj efata chungapi chaupishca quimsa parte ashtahuan alli cutata aceitehuan chapushcahuan cunguichij. Carnerohuanca shuj efata chungapi chaupishca ishqui parte ashtahuan alli cutata aceitehuan chapushcahuan cunguichij.

⁴Shuj huatayuj c'ari ovejacunahuanca cada ovejahuan shuj efata chungapi chaupishca, shuj parte ashtahuan alli cutata aceitehuan chapushcahuan cunguichij.

⁵Juchallishcamanta Mandaj Dioshuan alli tucungapajca shuj chivota cunguichij.

⁶Quillanta cushpa tucui rupachinatapish, punllanta cushpa tucui rupachinatapish, tallina vinotapish chai punllacunapipish cunataca ama saquishpa mandashcapi nishca shinallataj cunguichij. Chai cushcacunaca Mandaj Diospajca mishquiman ashnacujmi canga.

⁷Chai canchis quillallapitaj chunga punllapica, tucuicunata cayashpa Diospajlla tandanacuita ruranguichij. Mana alli rurashcata yuyarishpa cancunapaj alma llaquirishpa Diosman cutiringuichij. Chai punllapica ima ruranata ama ruranguichij.

⁸Mandaj Diospaj mishquijlla ashnacuj cachun cunataca shuj bizita, shuj carnerota, shuj huatayuj canchis c'ari ovejacunata cunguichij. Chai animalcunaca ima mana tucushca cachun.

⁹Chaicunahuan cuna cutataca cashna cunguichij: Bizihuanca shuj efata chungapi chaupishca quimsa parte ashtahuan alli cutata aceitehuan chapushcahuan cunguichij. Carnerohuanca shuj efata chungapi chaupishca ishqui parte ashtahuan alli cutata aceitehuan chapushcahuan cunguichij.

¹⁰Shuj huatayuj c'ari ovejacunahuanca cada ovejahuan shuj efata chungapi chaupishca shuj parte ashtahuan alli cutata aceitehuan chapushcahuan cunguichij.

¹¹Juchamanta cunataca shuj chivota cunguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

¹²Chai canchis quillallapitaj chunga pichca punllapica, tucuicunata cayashpa Diospajlla tandanacuita ruranguichij. Chai punllapica sinchi trabajocunataca imata ama ruranguichij. Mandaj Diospaj jatun fiestataca canchis punllacunata ruranguichij.

¹³Fiesta callari punllapica, Mandaj Diospaj mishquijlla ashnacuj cachun cushpa rupachinataca chunga quimsa bizita, ishqui carnerota, shuj huatayuj chunga chuscu c'ari ovejata cushpa tucui rupachinguichij. Chai animalcunaca ima mana tucushca cachun.

¹⁴Chaicunahuan cuna cutataca bizicunahuanca cada bizihuan shuj efata chungapi chaupishca quimsa parte ashtahuan alli cutata aceitehuan chapushcahuan cunguichij. Carnerocunahuanca cada carnerohuan shuj efata chungapi chaupishca ishqui parte ashtahuan alli cutata aceitehuan chapushcahuan cunguichij.

¹⁵Shuj huatayuj c'ari ovejacunahuanca cada ovejahuan shuj efata chungapi chaupishca shuj parte ashtahuan alli cutata aceitehuan chapushcahuan cunguichij.

¹⁶Juchamantaca shuj chivota cunguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

¹⁷Cati punllapica chunga ishqui bizita, ishqui carnerota, shuj huatayuj chunga chuscu c'ari ovejata cunguichij. Chai animalcunaca ima mana tucushca cachun.

¹⁸Chai animalcunahuan cuna cutata, tallina vinotaca, cada bizihuan, cada carnerohuan, shuj huatayuj cada c'ari ovejahuanpish ima shina cunata mandashcapi nishca shinallataj cunguichij.

¹⁹Juchamantaca shuj chivota cunguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

²⁰Quimsa punllapica, chunga shuj bizita, ishqui carnerota, shuj huatayuj chunga chuscu c'ari ovejata cunguichij. Chai animalcunaca ima mana tucushca cachun.

²¹Chai animalcunahuan cuna cutata, tallina vinotaca, cada bizihuan, cada carnerohuan, shuj huatayuj cada c'ari ovejahuanpish ima shina cunata mandashcapi nishca shinallataj cunguichij.

²²Juchamantaca shuj chivota cunguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

²³Chuscu punllapica chunga bizita, ishqui carnerota, shuj huatayuj chunga chuscu c'ari ovejata cunguichij. Chai animalcunaca ima mana tucushca cachun.

²⁴Chai animalcunahuan cuna cutata, tallina vinotaca, cada bizihuan, cada carnerohuan, shuj huatayuj cada c'ari ovejahuanpish ima shina cunata mandashcapi nishca shinallataj cunguichij.

²⁵Juchamantaca shuj chivota cunguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

²⁶Pichca punllapica, iscun bizita, ishqui carnerota, shuj huatayuj chunga chuscu c'ari ovejata cunguichij. Chai animalcunaca ima mana tucushca cachun.

²⁷Chai animalcunahuan cuna cutata, tallina vinotaca, cada bizihuan, cada carnerohuan, shuj huatayuj cada c'ari ovejahuanpish ima shina cunata mandashcapi nishca shinallataj cunguichij.

²⁸Juchamantaca shuj chivota cunguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

²⁹Sujta punllapica, pusaj bizita, ishqui carnerota, shuj huatayuj chunga chuscu c'ari ovejata cunguichij. Chai animalcunaca ima mana tucushca cachun.

³⁰Chai animalcunahuan cuna cutata, tallina vinotaca, cada bizihuan, cada carnerohuan, shuj huatayuj cada c'ari ovejahuanpish ima shina cunata mandashcapi nishca shinallataj cunguichij.

³¹Juchamantaca shuj chivota cunguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

³²Canchis punllapica canchis bizita, ishqui carnerota, shuj huatayuj chunga chuscu c'ari ovejata cunguichij. Chai animalcunaca ima mana tucushca cachun.

³³Chai animalcunahuan cuna cutata, tallina vinotaca, cada bizihuan, cada carnerohuan, shuj huatayuj cada c'ari ovejahuanpish ima shina cunata mandashcapi nishca shinallataj cunguichij.

³⁴Juchamantaca shuj chivota cunguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

³⁵Pusaj punllapica Mandaj Diospajlla jatun tandanacuita ruranguichij. Chai punllapica sinchi trabajocunataca imata ama ruranguichij.

³⁶Mandaj Diospaj mishquijlla ashnacuj cachun cunataca shuj bizita, shuj carnerota, shuj huatayuj canchis c'ari ovejata cunguichij. Chai animalcunaca ima mana tucushca cachun.

³⁷Chai animalcunahuan cuna cutata, tallina vinotaca, cada bizihuan, cada carnerohuan, shuj huatayuj cada c'ari ovejahuanpish ima shina cunata mandashcapi nishca shinallataj cunguichij.

³⁸Juchamantaca shuj chivota cunguichij. Cushpa tucui rupachinata, tallina vinotapish punllanta cuna cashcacunataca chai punllacunapipish ama saquinguichijchu.

³⁹“Jatun fiesta punllacunapica, Mandaj Diosmanca tucui chaicunatami cuna canguichij. Cuna tucushcacunatapish, cuna munaimanta cuna tucushcacunatapish, cushpa tucui rupachinacunatapish, cuna cutatapish, tallina vinotapish, Dioshuan alli tucungapaj cuna cashcacunatapish punllanta cuna cashcacunataca chai punllacunapipish ama saquinguichijchu” nircami.

⁴⁰Mandaj Dios tucui imallata nishcacunatami Moisesca israelcunaman huillarca.