Read Chimborazo Highland Quichua NÚMEROS 30 Bible Online

NÚMEROS 30 - Chimborazo Highland Quichua bible

NÚMEROS 30

¹Moisesca Israel aillucunata pushajcunata mandashpaca cashnami nirca: “Mandaj Diosca cashnami nin:

²Mandaj Diosman maijan cashpapish cuna tucushcata cusha nishpa, mana cashpaca paipaj alma yuyachijpi tucui almahuan cushatajmi nishcataca ama p'aquichun. Ashtahuanpish paipaj shimihuan imata nishcataca chaitataj rurachun.

³Maijan soltera cashpapish paipaj yayapaj huasipi causacushparaj, Mandaj Diospajta rurana tucushpa pajtachinataj tucungachari.

⁴Mandaj Diospajta ruranataj tucushpa tucui almahuan pajtachinataj tucushcata paipaj yaya yachaj chayashpa mana jarcajpica, paipaj tucui almahuan ruranataj tucushcataca pajtachichuntaj.

⁵Ashtahuanpish paipaj yaya yachaj chayashpa jarcajpica, chai solteraca paipaj tucui almahuan ruranataj tucushcataca saquichunlla. Paipaj yaya jarcajpi mana pajtachishcamanta Mandaj Diosca chai solterataca perdonangami.

⁶Shinallataj maijan solterapish Mandaj Diospajta ruranataj tucushpa tucui almahuan rurashatajmi nishpa pajtachina tucushcata manaraj pajtachishpa cazarangachari.

⁷Mandaj Diospajta ruranataj tucushcata paipaj cusa yachaj chayashpa mana jarcajpica, chai huarmica paipaj tucui almahuan pajtachishatajmi nishcataca pajtachichuntaj.

⁸Ashtahuanpish paipaj cusa yachaj chayashpa jarcajpica, Mandaj Diospajta ruranataj tucushpa paipaj shimihuan pajtachishatajmi nishcataca ama rurashpa saquichunlla. Mandaj Diosca chai huarmitaca perdonangami.

⁹Ashtahuanpish viuda huarmi, cusa shitashca huarmi Mandaj Diospajta ruranataj tucushpa tucui paipaj almahuan pajtachishatajmi nishpaca chaitaca pajtachichuntaj.

¹⁰Maijan huarmipish cusayuj tucushca q'uipa, Mandaj Diospajta ruranataj tucushpa paipaj tucui almahuan pajtachishatajmi ningachari.

¹¹Paipaj cusa chaita yachaj chayashpa mana imata nishpa mana jarcajpica, chai huarmica paipaj tucui almahuan ruranataj tucushcataca pajtachichuntaj.

¹²Ashtahuanpish paipaj cusa chaita yachaj chayashpa chai punllataj jarcajpica, chai huarmica ruranataj tucushpa paipaj shimihuan pajtachishatajmi nishcataca saquichunlla. Paipaj cusa jarcashcamanta Mandaj Diosca chai huarmitaca perdonangami.

¹³Mandaj Diospajta ruranataj tucushpa paipaj tucui almahuan pajtachishatajmi nij huarmitaca paipaj cusami rurachun saquinga, mana cashpaca jarcanga.

¹⁴Yachaj chayashca punllamanta cusa imata mana nishpa, tauca punllacunacama upalla saquirishpaca, paipaj huarmi Diospajta ruranataj tucushpa paipaj tucui almahuan pajtachishatajmi nishcataca pajtachichunlla nishcatami ricuchin.

¹⁵Ashtahuanpish yachaj chayashca punllapi imata mana nishca jahua, q'uipa punllacunapi jarcangachari. Chashna rurashpaca, paipaj huarmipaj juchataca cusami aparinga” nircami.

¹⁶Tucui chai mandashcacunaca, Mandaj Dios Moisesta huillachishpa mandashcami. Mandaj Diospajta shuj huarmi rurana tucushcataca paipaj cusa rurai nijllapi ruranata. Shuj soltera paipaj yayapaj huasipi causacushparaj Mandaj Diospajta rurana tucushcataca paipaj yaya rurai nijllapi rurana cashcata mandashcami.