Read Chimborazo Highland Quichua NÚMEROS 31 Bible Online

NÚMEROS 31 - Chimborazo Highland Quichua bible

NÚMEROS 31

¹Mandaj Dios Moisesta mandashpaca cashnami nirca:

²“Madianitacuna israelcunata llaquichishcamanta paicunatapish llaquichichij. Chai q'uipaca cambaj yayacunahuan tandanacugringuillami” nircami.

³Chaimi Moisesca israelcunataca cashna nirca: — Madianitacunahuan macanacunaman ringapaj cancunapuramanta maijancunata allichichij. Israelcunata llaquichishcamanta paicunatapish Mandaj Dios llaquichinata pajtachingapaj richij.

⁴Chai macanacuimanca, cada aillumanta 1.000 soldadocunata cachaichij — nircami.

⁵Shina nijpica, tucui israelcunamantaca cada aillumantami 1.000 soldadocunata allichirca. Macanacuiman rinalla cajcunaca tucuimantaca 12.000 soldadocunami carca.

⁶Moisesca chai macanacuimanca cada aillumanta 1.000 soldadocunatami cacharca. Eleazar curapaj churi Fineesca Diospajlla ucupi tiyaj vasocunata, tocanapaj trompetacunatapish apashcami rirca.

⁷Israelcunaca madianitacunahuanca Mandaj Dios Moisesta mandashca shinallatajmi macanacurca. Tucui c'aricunatami huañuchirca.

⁸Chaicunata huañuchishca jahuapish Madián llajtata jatun mandajcunataca Evi, Requem, Zur, Hur, Reba shuti pichca jatun mandajcunatapishmi huañuchirca. Beorpaj churi Balaamtapish espadahuanmi huañuchirca.

⁹Israelcunaca madianitacunapaj huarmicunata, huahuacunataca prezumi aparca. Animalcunatapish, huagracunatapish, tucui imalla charishcacunatapishmi aparca.

¹⁰Pueblocunatapish, chai muyundij llajta huasicunatapish tucuitami rupachirca.

¹¹Ña mishashpaca imalla charishcacunatapish, gentecunatapish, animalcunatapish,

¹²prezumi aparca. Prezucunatapish, quichushcacunatapish Moisespaj, Eleazar curapaj, tucui israelcunapaj ñaupajmanmi aparca. Israelcunaca Jericó ch'imbapurapi caj Jordán yacu c'uchu uripi caj Moab pambapimi carpa huasicunapi tiyacurca.

¹³Moisespish, Eleazar curapish, israelcunata pushajcunapish macanacuimanta tigrajcunata carpa huasicunamanta canllaman tupangapajmi llujshirca.

¹⁴Macanacuimanta tigrajcunahuanca Moisesca soldadocunata mandajcunahuanpish, huaranga soldadocunata mandajcunahuanpish, patsaj soldadocunata mandajcunahuanpish p'iñarishpami,

¹⁵cashna nirca: — Tucui cai huarmicunataca ¿ima nishpataj mana huañuchircanguichij?

¹⁶Chai huarmicunami Balaam runa mandashcata uyashpa israelcunataca Baal-peor nishca diosta adoranaman pushashpa Mandaj Diospaj ñaupajpi juchallichirca. Chaimantami Mandaj Diosca huañuchij llaquita cachashpa israelcunataca huañuchirca.

¹⁷Chaimanta cunanca c'ari huahuacunatapish, c'arihuan chayarishca huarmicunatapish tucuicunata huañuchichij.

¹⁸C'ari manaraj chayarishca huarmi huahuacunallata ama huañuchichijchu.

¹⁹Cancunapuramanta maijanpish shuj runata huañuchishca cashpa, huañushcapi tuparishca cashpaca carpa huasicunamanta canllaman canchis punllacunata saquirichun. Cancunapish, cancuna prezu apamushcacunapish, quimsa punlla tucujpipish, canchis punlla tucujpipish maillarishpa mapa illajlla tucuichij.

²⁰Churanacunatapish, caramanta rurashca churanacunatapish, chivo millmamanta rurashca churanacunatapish tucuita tajshachuncuna. Caspimanta rurashca charinacunatapish tucuita maillashpa mapa illajlla tucunguichij — nircami.

²¹Eleazar curaca macanacuimanta shamuj tucui soldadocunataca cashnami nirca: — Mandaj Dios Moisesta mandashpa cushca mandashcapica cashnami nicun:

²²Curimanta, cullquimanta, broncemanta, fierromanta, estañomanta, plomo nishca fierromanta rurashca,

²³ninapi mana rupaipaj cajcunataca ninapi rupachichij. Chaimi mapa illajlla canga. Mapa illajllata rurana yacuhuanpish mapa illajllata ruranguichij. Ashtahuanpish imapish ninapi rupaipaj cajcunataca mapa illajllata rurana yacuhuan maillashpa mapa illajllata ruranguichij.

²⁴Canchis punlla tucujpica, cancunapaj churanacunata tajshashpa mapa illajlla tucuichij. Chai q'uipaca carpa huasicunaman yaicunguichijlla — nircami.

²⁵Mandaj Dios Moisesta mandashpaca cashnami nirca:

²⁶“Macanacuipi imallata japimushcacunataca canhuan, Eleazar curahuan, israelcunata pushajcunahuan tucushpa tucuita yupaichij. Huarmi huambracunatapish, animalcunatapish tucuita yupaichij.

²⁷Chai q'uipaca macanacuipi mishashpa japimushcacunataca ishquipi chaupishpa, chaupitaca macanacunaman llujshijcunaman, caishuj chaupitaca saquirij israelcunaman cunguichij.

²⁸Macanacuiman rijcunaman paicuna japina cashcata cucushpaca: Huarmi huambracunatapish, huagracunatapish, burrocunatapish, ovejacunatapish cada pichca patsajmanta shujta Mandaj Diosman cungapaj ch'icanchinguichij.

²⁹Chai japishcacunataca Mandaj Diosman cushpa, Eleazar curaman cunguichij.

³⁰Macanacuiman mana rij israelcunaman paicuna japina cashcata cucushpaca: Huarmi huambracunatapish, huagracunatapish, burrocunatapish, ovejacunatapish cada pichca chungamanta shujta Mandaj Diosman cungapaj ch'icanchinguichij. Chaicunataca Diospaj carpa huasita cuidacuj levitacunaman cunguichij” nircami.

³¹Shina nijpica Moiseshuan Eleazar curahuanca, Mandaj Dios Moisesta ima shina mandashca shinami rurarca.

³²Macanacuipi japimushcacunata tucuita yupajpica, macanacuj soldadocuna japishcacunata mana yupashcami 675.000 ovejacuna,

³³72.000 huagracuna,

³⁴61.000 burrocuna carca.

³⁵C'ari mana chayarishca huarmi huambracunata tucuita yupajpica, 32.000mi carca.

³⁶Macanacuiman rij soldadocunaman chaupishpa cushca ovejacunaca 337.500mi carca.

³⁷Chaicunata japishpaca, Mandaj Diosman cungapajca 675 ovejacunatami ch'icanchirca.

³⁸Huagracunataca: 36.000 huagracunatami japirca. Chaicunata japishpaca Mandaj Diosman cungapajca, canchis chunga ishqui huagracunatami ch'icanchirca.

³⁹Burrocunataca: 30.500 burrocunatami japirca. Chaicunata japishpaca Mandaj Diosman cungapajca sujta chunga shuj burrocunatami ch'icanchirca.

⁴⁰Huarmi huambracunataca: 16.000tami japirca. Chaicunata japishpaca Mandaj Diosman cungapajca quimsa chunga ishquitami ch'icanchirca.

⁴¹Moisesca Mandaj Dios mandashca shinallatajmi, Mandaj Diosman cungapaj ch'icanchishcacunataca Eleazar curaman curca.

⁴²Macanacuiman rijcuna japimushcataca, macanacuiman mana rijcunapish paicuna japina cashca chaupita paicuna japichunmi, Moisesca cashna curca.

⁴³Israelcunaman chaupishpa cushca caishuj chaupica, 337.500 ovejacuna,

⁴⁴36.000 huagracuna,

⁴⁵30.500 burrocunami carca.

⁴⁶Huarmi huambracunaca 16.000mi carca.

⁴⁷Moisesca Mandaj Dios mandashca shinallatajmi, israelcuna japishca chaupimantaca Mandaj Diosman cungapajca huarmi huambracunatapish, animalcunatapish, cada pichca chungamanta shujta japirca. Chaicunataca Mandaj Diospaj carpa huasita cuidacuj levitacunamanmi curca.

⁴⁸Huaranga soldadocunata mandajcunapish, patsaj soldadocunata mandajcunapish Moisespajman c'uchuyashpaca,

⁴⁹cashnami nircacuna: Ñucanchij cambajta rurajcuna ñucanchij mandachun ñucanchijman cushca soldadocunata yupajpica, ñucanchij soldadocunaca shujllapish mana illarcachu.

⁵⁰Chaimantami ñucanchij japimushcacunata Mandaj Diosman cungapajca cada quiquin imallata japishcacunataca: “Curimanta rurashca sumaj charinacunata, brazaletecunata, manillacunata, sortijascunata, zarcillocunata, cadenacunatapish apamunchij. Chaicunaca ñucanchij juchacunamanta Mandaj Diosman cungapajmi” nircacunami.

⁵¹Curimanta rurashca sumaj charinacunataca, Moiseshuan Eleazar curahuanmi chasquircacuna.

⁵²Huaranga soldadocunata mandajcunapish, patsaj soldadocunata mandajcunapish Mandaj Diosman cungapaj apamushca curica, 16.750 siclotami pezarca.

⁵³Macanacuiman rij soldadocunaca macanacuita mishashpa japishcacunataca cada quiquin japishcatami apamurca.

⁵⁴Huaranga soldadocunata mandajcuna, patsaj soldadocunata mandajcuna Mandaj Diosman cushca curita Moiseshuan, Eleazar curahuan japishpaca, Mandaj Dios israelcunata yuyarichunmi, Dioshuan tupanacuna carpa huasiman Mandaj Diospaj ñaupajman aparca.