Read Chimborazo Highland Quichua NÚMEROS 32 Bible Online

NÚMEROS 32 - Chimborazo Highland Quichua bible

NÚMEROS 32

¹Rubenpaj, Gadpaj aillucunaca yallitaj achca animalcunatami charirca. Paicunaca Jazer, Galaad shuti llajtacunapica animalcunata charinapaj alli cashcatami ricurca.

²Rubenpaj aillu, Gadpaj aillu Moisespajman, Eleazar curapajman, israelcunata mandajcunapajman shamushpaca cashnami nircacuna:

³— Riquichigari, Atarot, Dibón, Jazer, Nimra, Hesbón, Eleale, Sebam, Nebo, Beón shuti llajtacunapi causajcunataca,

⁴Mandaj Dios tucui israelcunapaj ñaupajpi huañuchijpi japishca llajtacunaca animalcunata charinapajmari alli. Cambajta ruraj ñucanchijmari achca animalcunayuj canchij.

⁵Chaimanta cancunapi ñucanchij alli ricurishca cajpica, cambajta ruraj ñucanchij japina cashca allpataca chai llajtacunata cushpa, ñucanchijtaca Jordán yacutaca ama ch'imbachihuaichu — nircacunami.

⁶Gadpaj, Rubenpaj aillucuna chashna nijpimi, Moisesca cashna nirca: — Cancunapaj huauqui caishuj israelcunaca macanacunamanmi ringa. Cancunaca ¿caillapichari saquirishun ninguichigari?

⁷Cancuna chashna rurashpaca, Mandaj Dios cushca llajtaman caishuj israelcuna ama yaicuchunmi mana alli yuyaita cucunguichij.

⁸Cades-barneapi cashpa chai llajtata ricunaman cachajpi tigrashpaca cancunapaj yayacunapish chashnallatajmi rurarca.

⁹Paicuna rishpaca, Escol llajtacamami huichiyarcacuna. Chai llajtata ricushpa tigramushpaca Mandaj Dios cushca llajtaman israelcuna ama yaicuchunmi mana alli yuyaita cushpa jarcarca.

¹⁰Chaimi Mandaj Diosca nina sindirij shina yallitaj p'iñarishpa, cashna nirca:

¹¹“Egiptomanta llujshimujcunaca ishqui chunga huatayujmanta huichiman cajcunaca Abrahamman, Isaacman, Jacobman Mandaj Dios cushca llajtataca mana ricungacunachu. Mandaj Diospi mana shunguta churashcamantami mana ricungacuna.

¹²Cenezeocunapuramanta caj Jefonepaj churi Calebhuan, Nunpaj churi Josuellahuanmi Mandaj Diospi shunguta churarca. Paicunallami ricunga” nircami.

¹³Mandaj Diosca israelcunahuanca nina sindirij shina yallitaj p'iñarishpami, paicunataca maiman chayanata mana charijcunata shina shitashca pambapi chuscu chunga huatacunata purichirca. Mandaj Diospaj ñaupajpi millaita ruraj israelcuna tucui huañungacamami chashna rurarca.

¹⁴Cancunaca juchata rurajcunapaj huahuacuna cashpami, cunanpish cancunapaj yayacuna rurashca shinallataj rurashun ninguichij. Mandaj Dios israelcunahuan p'iñarishcata ashtahuan mirachingapajllami chashna ruranguichij.

¹⁵Cancunapish Mandaj Diosmanta anchurijpica, paica israelcunataca cutinllatajmi cai shitashca pambapi puricuchunlla saquinga. Chashna rurajpica tucui israelcunami chingaringa — nircami.

¹⁶Shina nijpica, Moisespajman ashtahuan c'uchuyashpami cashna nircacuna: — Riqui ñucanchijca cai llajtapica ñucanchij huagracunapaj corralcunata, ñucanchij huahuacunapaj pueblocunallatamari rurashun ninchij.

¹⁷Ashtahuanpish ñucanchijca macanacunacunahuan allichirishpami, ñucanchij huauqui israelcunata ñaupashpa rishpa paicuna japina cashca allpaman yaicuchingacama paicunahuan cashun. Chaicamaca ñucanchij huahuacuna caipi saquirijpi cai llajtapi causajcuna ama llaquichichunmi muyundij jatun pircayuj pueblocunapi saquishun ninchij.

¹⁸Ñucanchij huauqui israelcuna cada quiquin paicuna japina cashca allpata japingacama ñucanchij huasicunamanca manataj tigrashunchu.

¹⁹Ñucanchij quiquinpaj cachun japina cashca allpataca Jordán yacumanta inti llujshin ladoman caj cai llajtacunata ña japishpaca, Jordán yacuta ch'imbashpa tiyaj llajtacunataca yacu uripi cajcunatapish, ashtahuan chai ladoman tiyaj llajtacunatapish ñucanchij huauqui israelcunahuan ña mana japishun nishunchu — nircacunami.

²⁰Chaimi, Moisesca cashna nirca: — Cancuna nishcata pajtachishpa, Mandaj Diospaj ñaupajpi macanacunaman ringapaj cancuna allichirishpaca allimi canga.

²¹Cancunapaj macanacunacunahuan allichirishpa Mandaj Diospaj ñaupajta Jordán yacuta ch'imbaichij. Mandaj Dios paipaj ñaupajmanta cancunata p'iñajcunata tucui anchuchingacama ringuichij.

²²Mandaj Dios ña paipaj ñaupajmanta tucuita anchuchijpica, cancunapaj huasiman tigranguichijllami. Chashna rurashpami Mandaj Diospaj ñaupajpipish, cancunapaj huauqui israelcunapaj ñaupajpipish ima juchachina illajlla saquiringuichij. Cai allpapish Mandaj Diospaj ñaupajpica cancunapajmi canga.

²³Ashtahuanpish cancuna nishcata mana pajtachishpaca, Mandaj Diospaj ñaupajpimi juchallinguichij. Cancunapaj juchallataj cancunata llaquichina cashcataca yachanguichijmi.

²⁴Cancunapaj huahuacunapaj pueblocunata shayachichijlla. Cancunapaj ovejacunapaj corralcunata ruraichijlla. Ashtahuanpish cancunapaj shimihuan imata nishcataca pajtachinguichijtaj — nircami.

²⁵Chaimi Gadpaj, Rubenpaj huahua huahuacunaca Moisestaca cashna nircacuna: — Cambajta ruraj ñucanchijca ñucanchij amo can mandashca shinallatajmi rurashun.

²⁶Cai Galaad llajtapica ñucanchij huahuacuna, ñucanchij huarmicuna, ñucanchij huagracuna, tucui ñucanchij animalcunandijllami saquiringacuna.

²⁷Ashtahuanpish cambajta rurajcunaca tucui macanacunalla cajcunami Mandaj Diospaj ñaupajta ch'imbashun. Ñucanchij amo ima shina nishca shinallatajmi macanacugrishun — nircacunami.

²⁸Chaimi Moisesca Eleazar curatapish, Nunpaj churi Josuetapish, Israel aillucunata mandajcunatapish paicunata pushachun mingashpaca,

²⁹cashna nirca: — Gadpaj, Rubenpaj aillucunapurapi caj tucui c'aricuna paicunapaj macanacunacunahuan allichirishca Mandaj Diospaj ñaupajta Jordán yacuta ch'imbashpa Mandaj Dios ña paipaj ñaupajmanta tucuita anchuchingacama paicuna cancunahuan cajpica, cancunapish paicuna nishca shinataj Galaad llajtataca paicunaman cunguichij.

³⁰Ashtahuanpish macanacungapaj Jordán yacuta cancunahuan mana ch'imbashpaca, paicuna japina cashca allpataca Canaán llajtallapitajmi cancunahuan japingacuna — nirca.

³¹Chaimi Gadpaj, Rubenpaj aillucunaca cashna nircacuna: — Cambajta ruraj ñucanchijca, Mandaj Dios ima shina mandashca shinami rurashun.

³²Ñucanchijca macanacunallacunami Mandaj Diospaj ñaupajta Canaán llajtaman ch'imbashun. Ashtahuanpish ñucanchij japina cashca allpaca, Jordán yacumanta inti llujshin ladomantajmi canga — nircacuna.

³³Chashnami Moisesca Gadpaj, Rubenpaj aillucunamanpish, Josepaj churi Manasespaj chaupi aillumanpish amorreocunata jatun mandaj Sehón mandacushca llajtata, Basán llajtata jatun mandaj Og mandacushca llajtata curca. Chai pueblocunataca tucui chai llajta allpacunandijmi curca.

³⁴Chaimi, Gadpaj aillucunaca: Dibón, Atarot, Aroer,

³⁵Atarot-sofán, Jazer, Jogbeha,

³⁶Bet-nimra, Bet-arán shuti pueblocunata cutin shayachirca. Chai pueblocunataca muyundij jatun pircayujtami rurarca. Ovejacunapaj corralcunatapish rurarcami.

³⁷Rubenpaj aillucunaca: Hesbón, Eleale, Quiriataim,

³⁸Nebo, Baal-meón, Sibma shuti pueblocunatami cutin shayachirca. Paicuna cutin shayachishca pueblocunataca shujtaj shutitami shutichirca.

³⁹Manasespaj churi Maquirpaj huahua huahuacunaca Galaad llajtaman rishpami, chai llajtapi causaj amorreocunata llujshichishpa cachashpa, chai llajtata japirca.

⁴⁰Manasespaj churi Maquirpaj huahua huahuacunallamantaj Galaad llajtata Moisés cujpimi, paicunaca chai llajtapi causarcacuna.

⁴¹Manasespaj churi Jairpish, amorreocunapaj llajtaman rishpaca, chai muyundij llajtacunatami japirca. Chaitaca Havot-jairtami shutichirca.

⁴²Noba shuti runapish rishpaca, Kenat pueblota, chai muyundij llajtacunandijmi japirca. Chaitaca paipaj quiquin shuti Noba shutitami shutichirca.