Read Chimborazo Highland Quichua NÚMEROS 34 Bible Online

NÚMEROS 34 - Chimborazo Highland Quichua bible

NÚMEROS 34

¹Mandaj Dios Moisesta mandashpaca cashnami nirca:

²“Israelcunata mandashpa cashna ni: Cancuna Canaanman ña yaicujpica, chai llajtaca cancunaman cushca cashcamanta cancunapajmi canga. Chai llajtapaj lindecunaca caicunatami canga:

³Ura ladotaca, Zin nishca shitashca pambamanta callarishpaca, Edom llajtapaj lindecunacama. Inti llujshin ladotaca Cachisapa Cucha c'uchuta catishpa,

⁴chai lindeca ura ladota muyushpa rishpaca, Acrabim huichicama. Chaimantaca Zin nishca shitashca pambata pasashpa, ura ladollatataj Cades-barneaman chayajta. Chaimantaca Hasar-adar pueblota pasashpa, Asmoncama.

⁵Chai lindeca Asmonmanta callarishpa muyushpa rishpaca, Egipto jatun yacuman chayashpa mama cuchaman tupanacujtami canga.

⁶Inti huashicun lado lindeca, jatun Mama Cuchami. Chaica inti huashicun lado lindemi.

⁷Janaj lado lindeca caitami canga: Mama Cuchamanta callarishpaca, Hor urcucama señalangui.

⁸Hor urcumantaca, Hamatman yaicunacama señalangui. Chai lindeca Zedadman chayajtami canga.

⁹Chaimantaca Zifroncama cachun. Chai lindeca Hazar-enanpi tucurichun. Chaica janaj lado lindemi.

¹⁰Inti llujshin lado lindetaca, Hazar-enanmanta callarishpaca, Sefamcama señalangui.

¹¹Chai lindeca Sefammanta uri rishpaca, Ainmanta inti llujshin ladoman caj Riblacamami canga. Chaimantaca Cineret cucha uritaca inti llujshin ladotami canga.

¹²Chai lindeca Jordán yacucama urita rishpa Cachisapa Cuchaman tupanacujtami canga. Cancunapaj llajta lindeca tucui chaicunata muyushpami canga” nircami.

¹³Moisesca israelcunataca cashnami nirca: “Canaán llajtata ima shinalla cuchun mandashcaca cashnami. Iscun aillumanpish, caishuj chaupi aillumanpish sorteajpi maipimi urman chaipitaj cada quiquinman cuchunmi Mandaj Diosca mandarca.

¹⁴Rubenpaj aillupish, Gadpaj aillupish, Manasespaj chaupi aillupish paicunapaj yayacuna mashna familia cashca shinallatajmi paicuna japina cashca allpataca ña japircacuna.

¹⁵Chai ishqui ailluhuan, caishuj chaupi ailluhuanca paicuna japina cashca allpataca Jericomanta inti llujshin ladoman caj Jordán yacu c'uchupimi ña japircacuna” nircami.

¹⁶Mandaj Dios Moisesta, mandashpaca cashnami nirca:

¹⁷“Canaán llajtata chaupijcunaca: Eleazar curahuan, Nunpaj churi Josuehuan cachun.

¹⁸Chai allpata israelcunaman chaupishpa cungapajca israelcunapaj cada aillucunata mandajcunatapish cayachun.

¹⁹Chai pushajcunapaj shuticunaca caicuna cachun: Judapaj aillumantaca Jefonepaj churi Caleb.

²⁰Simeonpaj aillumantaca Amiudpaj churi Semuel.

²¹Benjaminpaj aillumantaca Quislonpaj churi Elidad.

²²Danpaj aillumantaca Joglipaj churi Buqui cachun.

²³Josepaj ishqui churicunapaj aillucunamantaca: Manasespaj aillumantaca Efodpaj churi Haniel.

²⁴Efrainpaj aillumantaca Siftanpaj churi Kemuel cachun.

²⁵Zabulonpaj aillumantaca Parnac runapaj churi Elizafan.

²⁶Isacarpaj aillumantaca Azanpaj churi Paltiel.

²⁷Aserpaj aillumantaca Selomipaj churi Ahiud.

²⁸Neftalipaj aillumantaca Amiudpaj churi Pedael cachun” nircami.

²⁹Canaán llajtata israelcunaman chaupishpa paicuna japina cashca allpata cuchunca, Mandaj Diosca chaicunatami mandarca.