Read Chimborazo Highland Quichua NÚMEROS 36 Bible Online

NÚMEROS 36 - Chimborazo Highland Quichua bible

NÚMEROS 36

¹Joseca Manasespaj yayami carca. Manasesca Maquirpaj yayami carca. Maquirca Galaadpaj yayami carca. Chai Galaadpaj familiacunamanta mirarishcacunata mandajcunami Moisespaj, israelcunata mandajcunapaj ñaupajman shamushpa,

²cashna nircacuna: — Mandaj Diosca, ñucanchij amo quiquintami ñucanchij israelcunaman allpata ñucanchijpaj cachun sorteashpa cuchun mandarca. Mandaj Diosca ñucanchij amo quiquinllatatajmi ñucanchij huauqui Zelofehad japina cashca allpatapish paipaj ushushicunaman cuchun mandarca.

³Ashtahuanpish chai huarmicuna caishuj Israel aillupuracunapi cajhuan cazarajpica, ñucanchij yayacunamanta chai huarmicuna japishca allpacunataca caishuj aillu israelcunamari quichushpa mirachinga. Chashna rurajpica ñucanchij yayamanta japishca allpacunaca ashallamari tucunga.

⁴Ashtahuanpish ñucanchij israelcunapurapi allpacunata ñaupaman charicujllamantaj tigrachina huata chayajpicarin, chai huarmicuna japishca allpaca paicunapaj cusacunapaj japishca allpahuanmari shuj cutin paicunapajtaj tucunga. Chaipica ñucanchij ñaupa yayacunapaj aillucunamanta japishca allpaca ashtahuanmari p'ichillayashpa catinga — nircacunami.

⁵Chaimi, Moisesca Mandaj Dios ima shinalla mandashca shina israelcunata cashna mandarca: — Josepaj ailluca allillatatajmi nin.

⁶Mandaj Diosca Zelofehadpaj ushushicunataca cashnami mandan: Paicunaca paicuna munashcahuan cazarachunlla. Ashtahuanca paicunapaj yayapaj aillupurallataj cachun.

⁷Israelcuna japishca allpacunaca ama aillun, aillunta pasachunmi chashna rurana canguichij. Israelcunaca paicunapaj yayacunamanta japishca allpataca shujtaj aillumanca mana cushpami cada aillu charirana can.

⁸Israelcunapurapi maijan huarmi paicunapaj yayacunamanta allpata japishca cashpaca, paicunapaj aillumanta mirarishca familiamanta cajhuan cazarachun. Chashnami paicunapaj yayamanta japishca allpataca paicuna quiquinpaj cachun charirangacuna.

⁹Chashna rurajpimi israelcunapaj allpaca maquin, maquinta caishujpaj chaishujpaj ailluman mana pasanga. Ashtahuanpish chashnami israelcunaca cada aillu paicunapaj quiquin allpataca ricurashpa charirangacuna — nircami.

¹⁰Shina nijpica Zelofehadpaj ushushicunaca, Mandaj Dios Moisesta mandashca shinallatajmi rurarcacuna.

¹¹Zelofehad runapaj Maala, Tirsa, Hogla, Milca, Noa shuti ushushicunaca paicunapaj yayapaj huauquicunapaj churicunallahuantajmi cazararcacuna.

¹²Zelofehadpaj ushushicuna Josepaj churi Manasespaj familiamanta mirarishcapuracunallapitaj cazarajpimi, paicunapaj yayamanta japishca allpaca paicunapaj yayapaj aillupurallapitaj saquirirca.

¹³Cai mandashcacunaca israelcunata Moisés mandachun Mandaj Dios cushca mandashcami. Chaitaca Jericó ch'imbapurapi caj Jordán yacu c'uchupi caj Moab pambapimi curca.