Read Chimborazo Highland Quichua NÚMEROS 5 Bible Online

NÚMEROS 5 - Chimborazo Highland Quichua bible

NÚMEROS 5

¹Mandaj Dios Moisesta mandashpaca cashnami nirca:

²“Israelcunataca: Leprahuan cajcunatapish, yuraj yacu cacharirishpa ungushcacunatapish, huañushcapi tuparishcamanta mapayashcacunatapish cancuna causacun carpa huasicunamanta caruman churachun mandai.

³Chashnacunataca c'aricunatapish, huarmicunatapish llujshichishpa cachaichij. Cancunapaj chaupipi ñuca causacunta ama mapayachichunmi cancuna causacun carpa huasimanta caruman churana canguichij” nircami.

⁴Israelcunaca chashnataj rurashpami: Paicuna causacun carpa huasicunamanta caruman churarca. Mandaj Dios Moisesta ima shina mandashca shinallatajmi rurarca.

⁵Mandaj Dios Moisesta mandashpaca cashnami nirca:

⁶“Israelcunataca cashna ni: Maijan c'ari cashpa, huarmi cashpapish maijanpajta imata llaquichishpaca, Mandaj Diostami p'iñachin. Paica juchayujmi tucun.

⁷Chai juchallijca pai juchallishcataca cashna rijsirichun. Maijanpajta imata llaquichishcataca tucuimanta pagachun. Chai jahua pichcahuan pagachun.

⁸Chai paganataca familiapish mana tiyajpica, llaquichishcamanta paganataca, Mandaj Diosman cushpa curaman cuchun. Juchamanta cushpa rupachichunpish carnerota cuchun. Chaimi curaca carnerota Diosman cushpa chai juchallijmanta rupachinga.

⁹Israelcuna paicuna imalla charishcacunamanta, Mandaj Diospajlla ch'icanchishpa apamushpa curaman cushcacunaca curapajmi canga.

¹⁰Tucui imatapish ch'icanchishpa Mandaj Diosman cungapaj apashpa curaman cushcaca curapajmi canga” nircami.

¹¹Mandaj Dios Moisesta mandashpaca cashnami nirca:

¹²Israelcunataca cashna nishpa mandai: Maijanpaj huarmipish paipaj cusapi mana shunguta churashpa, paipaj cusata umacungachari.

¹³Chai huarmihuanca shujtaj c'ari causacungachari. Chaitaca paipaj cusaca mana yachangachari. Chai huarmi chashna pacalla mapayashcataca pi huillaj mana tiyangachari. Chai huarmica mana allita ruracushcapi mana japi tucungachari.

¹⁴Chai huarmi huashalla mapayashcata mana yachashpapish, paipaj cusapaj yuyaipi shujtajman juchachina yuyai shamujpi juchachingachari. Mana cashpaca manapish mapayashca cajpi paipaj cusapaj yuyaipi shujtajman juchachina yuyai shamungachari.

¹⁵Chashna cashpaca, paipaj huarmita curapajman pushachun. Chai huarmimanta Diosman cungapajca shuj efata chungapi chaupishca shuj mirga cebada cutata apachun. Juchachishcamanta cushca cashcamanta chai jahuapica aceitetapish ama tallichun, inciensotapish ama churachun. Chai cushcaca, juchata Dios ricuchichun cushcami canga.

¹⁶Chai huarmitaca Mandaj Diospaj ñaupajman cura pushashpa richun.

¹⁷Chai q'uipaca allpamanta rurashca vasopi Diospajlla ch'icanchishca asha yacuta cura japishpa, Diospaj carpa huasi ucu pambamanta ñutu allpatapish japishpa, chai yacuhuan chagruchun.

¹⁸Mandaj Diospaj ñaupajpi shayacuj huarmitaca chaipi shayacujllapitajmi, curallataj umata llatanashpa, maquicunapica juchata Dios ricuchichun cushca cutata churanga. Chaica juchamanta cushca cutami. Juchamanta llaquita apamuj jayaj yacutaca cura paipaj maquipi charichun.

¹⁹Chai huarmita cura alli alli tapushpa cashna nichun: Canhuan pi mana dormishca cajpi, cambaj cusapi mana shunguta churashpa mana umashca cajpi, can mana mapayashca cajpica, juchamanta llaquichij cai jayaj yacuca cantaca mana llaquichingachu.

²⁰Ashtahuanpish cusapi shunguta churaj cashca jahua, mana chashna rurashpa mapayashca cajpi, manapish cambaj cusa caj shujtaj canhuan dormishca cajpica,

²¹curaca chai huarmitaca cashna nichun: Cantaca Mandaj Diosca mana allita rurashcamanta llaquichishpa cambaj llajtapi causajcunaman mana alli cashcata ricuchishca cachun. Mandaj Diosca cambaj changata tandachichun. Cambaj huijsatapish p'unguichichun.

²²Juchamanta llaquichij cai jayaj yacuta ubyajpica cambaj huijsataca p'unguichingami. Cambaj changataca tandachingami nichun. Shina nijpica chai huarmica: Chashna cachun, chashna cachun nichun.

²³Juchamanta llaqui tucuna cashcacunataca curami shuj libropi quillcanga. Chaitaca curallatajmi jayaj yacuhuan tucuita p'ichanga.

²⁴Juchamanta llaquita apamuj jayaj yacutaca chai huarmiman ubyachichun. Juchallishca cajpi llaquichij yacuta ubyajpica, juchamanta jayajyachingapajmi yaicunga.

²⁵Chai q'uipaca juchallishcamanta cushca cutata chai huarmipaj maquimanta cura japishpa, Mandaj Diospaj ñaupajpi huichi ricuchishpa cuyuchishpa altarman apachun.

²⁶Chai cutamanta cura shuj lutsajta japishpa altarpi rupachichun. Mandaj Dios chai huarmita yuyarichunmi chashna ruranga. Jayaj yacuta cura chai huarmiman ubyachishca q'uipaca,

²⁷chai huarmi mapa cajpi, paipaj cusata umashca cajpica, juchamanta llaquichij yacuca, paipaj huijsata jayajyachishpami paipaj huijsata p'unguichinga, changatapish tandachinga. Pai causacun llajtapica chai huarmica mana alli nishcami canga.

²⁸Ashtahuanpish chai huarmi manapish juchayuj, chuya cashpaca, ima mana tucungachu. Huahuacunatapish ashtahuan charingallami.

²⁹Maijan huarmipish mana paipaj cusapajlla tucushpa shujtaj c'arihuan mapayashcamanta cusa juchachijpi imallata ruranata mandashcaca chaicunami.

³⁰Mana cashpaca, maijan cusapish paipaj huarmi mana alli cajpi shujtajhuan causacushcata yuyashpa juchachina yuyai shamujpica, cusaca paipaj huarmitaca Mandaj Diospaj ñaupajman apachun. Chaipica curami, chai mandashcapi nishca shina ruranga.

³¹Huarmillataj mana alli cajpi shujtajhuanmi yuyashpa juchachishcamantaca, cusaca mana llaquita apangachu. Huarmimi llaquita apanga nircami.