Read Chimborazo Highland Quichua MIQUEAS 7 Bible Online

MIQUEAS 7 - Chimborazo Highland Quichua bible

MIQUEAS 7

¹¡Aij ñucalla! Granocunata usya tucui tandashca q'uipa ch'alata mashcashpa purij runa shinamari cani. Shinallataj uvata tucui tandashca q'uipa ch'alagrishpa imata mana japij shinamari cani. Ñucaca punta p'ucushca granota micushami yuyarcanimari.

²Cai pachata llaquijmari illarca. Cai pachapi causaj runacunamantaca allita rurajca, shujllapish manamari tiyanchu. Tucuicunami huañuchijcuna tucushca. Paicunapurallataj urmachinacungapajmi linchitapish rurancuna.

³Millaita rurashpa pajtachingapajmi, jatun mandajca imatapish cuchun mañan. Juezpish camarita japishpallami allichij tucun. Mandajpish pai munashcatami rimarin. Chaimantaca chaitatajmi rurancuna.

⁴Paicunapura alli nishca runaca casha shinamari. Allita ruraj runapish, zarza casha yuracuna shinamari. Chapajcuna huillashca shinallatajmari llaquichina punllaca pajtamucun. Cunanca cambajca, caita chaita musparinami canga.

⁵Canhuan alli apanacuj runa imata nijpipish, ama cringuillachu. Jatun mandajpipish ama shunguta churanguichu. Cambaj huarmimanpish imatapish ama parlanguillachu.

⁶Churica yayata p'iñangami, ushushica mamata macangami, nuerapish suegrata c'ariyangami. Quiquin huasi ucupurallatajmi chashna p'iñanacungacuna.

⁷Ashtahuanpish ñucaca Mandaj Diostami chapasha. Ñucata quishpichij Taita Diostami shuyasha. Ñuca Diosmi ñuca mañashcataca uyanga.

⁸Ñucata p'iñajlla, ñuca llaqui tucushcamantaca ama cushicuichu. Urmashpapish jatarishallami. Amsapi causacujpipish, Mandaj Diosmari nina shina ñucataca achijyachinga.

⁹Ñucaca Mandaj Diosta p'iñachishpamari, juchata rurarcani. Chaimantami cunanca, ñuca ima rurashcacunata ricuchishpa allichingacama, Mandaj Dios p'iñarishpa cachashca llaquitaca apacunalla cani. Paimari ñucataca achij luzman llujshichinga. Chaipimi paitaca cashcata ruraj cashcataca ricusha.

¹⁰Chashna rurashcataca, ñucata p'iñajpish ricungami. Chaita ricushpaca, pingaringami. Paica ñucata llaquichicui punllapica: “¿Maipitagari canta Mandaj Taita Diosca?” nircami. Ashtahuanpish cunanca paitarajmi ñancunapi sirij lodota shina sarushpa llaquichicujta ricusha.

¹¹Jerusalenpi causajcunalla, cancuna rurashca patacuna urmashcata allichina punllapish, ashtahuan caruta lindecunata churashpa allpacunata mirachina punllapish ñamari pajtamucun.

¹²Chai punllapica Asiria llajtamantapish, muyundijta pircashca pueblocunamantapishmi caimanca shamungacuna. Muyundijta pircashca pueblocunapi causajcunaca, jatun yacu c'uchucamami causanaman shamungacuna. Tucui mama cucha muyundijcunapipish, tucui urcucunapipishmi jundarishpa causangacuna.

¹³Llajtacunapi causajcuna millaita rurashcamantami, tucui llajta llaquinayaj saquiringa.

¹⁴Mandaj Dioslla, can agllashcacunataca, cambaj tauna caspihuan michipangui. Paicunaca alli q'uihua tiyan urcullapi causaj, can agllashca canlla ovejacuna shinami. Paicunataca ñaupa punllacunapi shinallataj Basán urcu, Galaad urcu q'uihuacunaman pushapangui.

¹⁵Egipto llajtamanta llujshichimui punllapi jatun mancharinacunata ricuchishca shinallatajmi paicunamanpish ricuchisha.

¹⁶Chai tucui allicunata rurashcata ricushpaca, shujtaj llajtapi causajcunaca paicuna jatun tucushcamantaca, mana jahuallatami pingaringacuna. Maquita shimipi churashpami, rinrinpish mana uyaj tucushpa saquiringacuna.

¹⁷Shinallataj culebra shinami ñutu allpata micungacuna. Culebracuna shinallatajmi, miticushca tiyacushpapish chujchungacuna. Paicunaca, ñucanchijta Mandaj Taita Diospajmanca, manchaihuan chujchushpami cutiringacuna. Can Mandaj Diostaca tucuicunami manchangacuna.

¹⁸Taita Dioslla, can shina Diosca manamari pi shujtajca tiyanchu. Canca can agllashcacunapuramanta saquirijcuna millaita rurashcatapish cungarijmi cangui. Paicunapaj juchatapish perdonajmi cangui. Paica mana huiñaita p'iñarinchu. Ashtahuanpish llaquij cashcata ricuchishpami cushicun.

¹⁹Paica ñucanchijtaca cutinllatajmi llaquinga. Ñucanchij millaita rurashcacunatapish pambangami. Ñucanchij juchacunatapish mama cucha ucumanmi shitanga.

²⁰Mandaj Dioslla, ñucanchij ñaupa yaya Abrahammanpish, yaya Jacobmanpish c'uyashcamanta allicunata rurashami nishcataca amataj cungarishpa pajtachipangui.