Read Chimborazo Highland Quichua NAHUM 1 Bible Online

NAHUM 1 - Chimborazo Highland Quichua bible

NAHUM 1

¹Cai quillcapica, Elcos pueblomanta Nahum runa, Nínive pueblo llaqui tucunata muscuipi shina ricushcata huillashcami tiyacun.

²Mandaj Diosca, jatunta p'iñarishpa llaquichij Diosmari. Mandaj Diosca jatunta llaquichijmi, jatunta p'iñarijmi. Millaita rurajcunatapish jatunta llaquichijmi. Paita p'iñajcunapajmi, p'iñarishpa llaquichinataca huaquichin.

³Mandaj Diosca tucuita rurai tucujmi, mana utca p'iñarijmi. Chashna cashpapish, millaita rurajcunata llaquichinataca manataj saquinchu. Mandaj Diosca c'ulun nishpami, jatun acapanapi purin. Pai purina p'uyuca, ñutu allpa shinami.

⁴Paica mama cucha yacutapish, jatun yacucunatapish chaquichinllami. Basán llajtatapish, Carmelo urcutapish, Libanopi tiyaj sumajcunatapish chingachircami.

⁵Paipaj ñaupajpica urcucunapish chujchunmi, lomacunapish yacuyanmi. Paita ricushpaca, allpapish chujchunmi. Cai pachapish, paipi causajcunapish tucuicunami mancharincuna.

⁶Pai p'iñarijpica, ¿pitaj paipaj ñaupajpica shayari tucungari? Pai p'iñarishcataca ¿pitaj apai tucungari? Paipaj p'iñarinaca lunyacuj nina shinami tsiraparin. Paipaj ñaupajpica, jatun rumi urcucunapish chaupirinmi.

⁷Mandaj Diosca alli cashpami, llaqui punllacunapi cajpipish huaquichin. Paipi shunguta churajcunataca rijsinmi.

⁸Ashtahuanpish paita p'iñajcunataca, yacupi cachashpami tucuchinga. Paita mana ricunachijcunapajca, manchanana amsa shinami llaquica shamunga.

⁹Mandaj Diostaca ¿ima shina c'ariyanatataj yuyanguichigari? Paita p'iñajcunataca, llaquichishpa shuj cutintaj tucui chingachingallami.

¹⁰Ahuarishpa huiñashca cashacuna shina cajpipish, yuyai chingarijta machashca shina cajpipish, chaquishca p'angata ninapi tucui rupachij shinami tucuicunata rupachinga.

¹¹Canmantami Mandaj Diosta llaquichinata yuyajca llujshirca. Paica millai yuyaita cujmari.

¹²Chaimantami Mandaj Diosca cashna nin: “C'ari c'ari tucushcacuna cashpapish, yallitaj achcacuna cashpapish chingaringacunami. Paicunaca ña illangami. Cantaca jatuntami llaquichircani, ña mana ashtahuan llaquichishachu.

¹³Cunanca canmantaca paicuna huatashca yugotapish p'aquishami, cinta angucunatapish p'itishami” ninmi.

¹⁴Ashtahuanpish Mandaj Diosca, cambaj shutillatapish ama yuyarichun nishpami mandanga. “Cambaj diospaj huasipi tiyacuj diosman rijchajta rurashcatapish, cullquita yacuyachishpa rurashca diostapish chingachishami. Cantaca p'iñashca cashcamantami, chaillapitaj pambasha” ninmi.

¹⁵Riqui, sumaj causaimanta alli huillaita huillajmari jahua urcucunata purishpa shamucun. Judá llajtalla, canca fiestacunata rurayari, can imallata Diosman cusha nishcata pajtachiyari. Chai millai runaca, ña mana ashtahuan cantaca llaquichingachu, paica ñami tucui chingarirca.