Read Chimborazo Highland Quichua HABACUC 2 Bible Online

HABACUC 2 - Chimborazo Highland Quichua bible

HABACUC 2

¹Chapachun ñucata churashcapimi shayacusha, torre jahuapica shayacushallami. Ñucata imata rimajta uyaracushallami, ñuca ima mañashcata cutichijta chaparacushami.

²Shinallataj Mandaj Diosmi ñucamanca cashna nishpa cutichirca: “Muscuipi imallata ricushcataca tablacunapi quillcangui. Can quillcashcata maijan rezashpaca, mancharishpa callpachuncuna.

³Muscuipi shina ricushcacunaca asha huatacunata q'uipayashpapish, utcami tucuringa, mana llullangachu. Q'uipayajpipish chaparacuilla, shamungami mana uniyangachu, chaica pajtangami.

⁴Riqui mana alli shunguta charijca jatun tucunllami. Ashtahuanpish cashcata rurajca, crishcallamantami causanga.

⁵Shinallataj vinota ubyaj runaca huañuimanmi chayan. Jatun tucushca runaca mana causangachu. Seol shinami mana sajsan. Paica huañui mana saquirij shinami mana shaicun. Ñaupamanca paipajlla cachunmi pueblocunapi causajcunataca tucuicunata tandachirca” nircami.

⁶¿Manachu paitaca yuyachij shimicunahuan rimangacuna? ¿Manachu paitaca chanzata rurangacuna? Paitaca cashnami ningacuna: “Manapish paipajhuan charijyajca ¡aij imachari tucunga! ¿Maicamataj prendacunata japishpa montonacungallari?” ningacunami.

⁷Ñataj canman divijcuna jatarishpa llaquichinman. Ñataj canta chujchuchijcuna rijcharinman. Canca, paicuna quichushpa apanallami cangui.

⁸Ashtahuanpish canca achca llajtacunamantami imalla charishcacunata quichushpa aparcangui. Cantaca runacunapaj yahuarmantapish, allpata shuhuashcamantapish, imalla tiyajcunata shuhuashcamantapishmi chai llajtamanta chai pueblocunallamanta shamushpa, can imalla charishcacunataca quichushpa apangacuna.

⁹Shujtajcuna charishcacunata munashcamanta shuhuashpa huasipi jundachijca, ¡aij imachari tucunga! Paica jatun llaquimanta miticungapajmi paipaj huasitaca tazinta shina pi mana ricunallapi jahuaman churarca.

¹⁰Pinganayajta rimashpa cunashcacunatami chasquircangui. Achca pueblocunatami llaquinayajta saquircangui. Chashna rurashpaca, cambaj quiquin aichallatatajmi llaquichishcangui.

¹¹Rumicunaca pircashca patamantami caparingacuna. Caspicunapish maipi churashcamantami cutichingacuna.

¹²Pueblota yahuarhuan shayachijcunaca, shujtaj pueblota quichushcacunahuan jundachijcunaca, ¡aij imachari tucungacuna!

¹³¿Manachu caica tucuita Mandaj Diosmanta canga? Pueblocunapi causajcunaca ninapi rupachichunllami trabajangacuna. Llajtacunapi causajcunaca yangamantami shaicujta trabajangacuna.

¹⁴Ima shinami mama cuchaca yacuhuan junda tiyacun, chashnallatajmi cai pachapi causajcunaca Mandaj Dios jatun cashcata rijsina yuyaihuan junda cangacuna.

¹⁵Shujtajcunaman ubyachijlla, ¡aij imachari tucunga! Canca lluchulla cashcata ricungapajmi, hielta ubyachircangui. Chashna rurashcamantaca, ¡aij imachari tucungui!

¹⁶Canca alli nishca canapaj randica, pingachishcami cana cangui. Canpish machayari, cantapish lluchullatami saquinga. Mandaj Diospaj alli maquipi charicun vasopi tiyajtami canmanca ubyachinga. Can alli nishca canataca shungu tigrangami.

¹⁷Libanota llaquichishca llaquicunallatajmi cantapish japinga. Sacha animalcunami cantaca manchachinga. Canllataj runacunata huañuchishcamanta, allpata shuhuashcamanta, pueblocunapi causajcunapajta shuhuashpa apashcamantami cai llaquicunaca cantapish japinga.

¹⁸Runa sumajta trabajashpa rurashca diosca ¿imapajtaj valingari? Yacuyachishpalla rurashca diosca llullanallatami yachachin. Chai runaca paillataj rurashca mana rimaj dioscunallapimi shunguta churan.

¹⁹Caspi diosta: “Rijchari” nijcunalla, mana rimaj rumi diosta: “Puriyari” nijcunalla, ¡aij imachari tucungacuna! ¿Paicunaca cancunamanca imata yachachi tucungachu? Riquichij, chai dioscunaca curihuan cullquihuan jahuataca sumajta churashcallami. Paicunaca samaitaca mana charincunachu.

²⁰Ashtahuanpish Mandaj Diosca, paipajlla ch'icanyachishca huasipimari causacun. Chashna cashcamantaca tucui cai pachapi causajcuna, upalla caichigari.