Read Chimborazo Highland Quichua SOFONÍAS 2 Bible Online

SOFONÍAS 2 - Chimborazo Highland Quichua bible

SOFONÍAS 2

¹Llajtacunapi causaj pingai illajcunalla, tandanacushpa alli yuyarichigari.

²Mandaj Dios huillachishcapi nishca shina manaraj tucujpi, t'amu shina manaraj chingarishpa, Mandaj Dios jatunta p'iñarishpa cancunata manaraj jatunta llaquichijpi alli yuyarichigari.

³Cai llajtapi causaj alli shungu runacuna, cancunaca Mandaj Dios imallata rurashcata yuyarishpa paita mashcaichigari. Cashcata ruranata mashcaichigari. Chashna cancuna allita ruranata mashcajpica, Mandaj Dios jatunta p'iñarishpa llaquichicui punllaca huaquichingapishchari.

⁴Gaza puebloca, shitashcami saquiringa. Ascalón pueblopish, chingachishcami saquiringa. Asdod pueblopi causajcunapaj ima charishcacunatapish, chaupi punllapimi quichushpa apangacuna. Ecrón pueblopi causajcunataca, sapimanta llujshichij shinami llujshichingacuna.

⁵Mama cucha yacu uripi causaj cereteocunaca, ¡aij imachari tucungacuna! “Filisteocuna causan Canaán llajtalla, tucui cancunatami huañuchisha. Shujllatapish causajta mana saquishpami, tucuita chingachichisha.

⁶Shinallataj mama cucha yacu uripi tiyaj tucui llajtacunapica, michina q'uihuacunami huiñanga, ovejacunapaj corralcunallami tucunga” ninmi.

⁷Chai allpaca, Judapaj huahua huahuacunamanta saquirijcuna causana llajtami canga. Paicunaca chaipimi michinga. Ascalón pueblopi tiyaj huasicunapimi tutacunaca dormingacuna. Paicunapaj Mandaj Taita Diosmi ricugringa, prezu causacujcunatapish cacharichingami.

⁸“Moab shuti, Amón shuti llajtacunapi causajcuna, ñuca agllashcacunata yangata rurashpa c'amicujtaca uyarcanimi. Paicunami israelcunapaj llajtata quichushpa jatun tucushpa causarcacuna.

⁹Ñucaca causacunimi ninmi tucuita Mandaj, israelcunapaj Taita Diosca. Chaimanta Moab llajtaca, Sodoma pueblo shinami saquiringa. Amón llajtaca, Gomorra pueblo shinami saquiringa. Chai llajtacunapica chinicunami huiñanga, cachillami tucunga. Chashnami huiñaita shitashca saquiringa. Ñuca agllashcacunapuramanta saquirishcacunami paicuna imalla charishcacunatapish quichungacuna, allpacunatapish paicunapaj cachunmi japingacuna” ninmi.

¹⁰Paicunallataj jatun tucushpa, tucuita Mandaj Dios agllashcacunata yangata rurashpa c'amishcamantami, chai llaquicunaca japinga.

¹¹Mandaj Diosca, paicunahuanca jatuntami p'iñaringa. Chaimanta cai pachapi tiyaj dioscunataca tucuitami chingachinga. Tucui llajtacunapi causajcunaca, tucuicunallatajmi paicuna maipi cashcallapitaj Diostaca cunguringacuna.

¹²Etiopía llajtapi causajcuna, cancunatapish ñuca espadahuanmi huañuchisha.

¹³Mandaj Diosca, paipaj maquita janaj ladoman chutashpami, Asiria llajtataca chingachinga. Shinallataj Nínive pueblotapish, shitashca pambata shinami, chaquishca llaquinayajta saquinga.

¹⁴Chaipica charina animalcunapish, sacha animalcunapish causanami tucunga. Pelicanopish, erizopishmi huasi pilar jahuacunapi dormingacuna, huasi ventanacunapimi huacangacuna. Cedro caspicunapish, p'aquirishpa llujshishcamanta pungucunapish llaquinayajmi tucunga.

¹⁵Chai puebloca, imata mana manchashpa, cushicushpami causarca. Chaipi causajcunaca, paicunapaj shungupica: “Ñucanchijllamari cashna jatunca canchij” nijcunami carca. ¡Riquichigari, ima shinami sacha animalcuna causanapaj shitashca saquirishca! Chashna tucushcamantaca, maijanpish chai c'uchullata purijcunaca maquipi huajtarishpami asingacuna.