Read Chimborazo Highland Quichua SOFONÍAS 3 Bible Online

SOFONÍAS 3 - Chimborazo Highland Quichua bible

SOFONÍAS 3

¹Juchahuan mapayashpa causacuj, huajchacunata llaquichij Jerusalén pueblopi causajcunalla, ¡aij imachari tucunga!

²Mandaj Dios rimashcatapish mana uyarcacunachu, alli tucuchun jarcashcatapish mana cazurcacunachu. Mandaj Diospica mana shunguta churarcacunachu. Paicunapaj Diospajmanpish mana c'uchuyarcacunachu.

³Jerusalenpi causajcunata mandajcunapish, paicunapaj chaupipica huacaricuj leoncuna shinami. Juezcunapish tuta purij atujcuna shinami cayandijpajca, shuj tullullatapish mana saquincunachu.

⁴Paicunapaj huillajcunapish, llullashpalla huillajcunami. Paicunapaj curacunapish, Diospaj huasita mapayachijcunami, mandashcacunatapish mana cazujcunami.

⁵Mandaj Diosca, paicunapaj chaupipica cashcata rurajmi. Paica, ima millaitaca mana rurangachu. Paica cashcata ruranataca, achijman llujshichishpami ricuchinga. Cashcata ruranataca manataj cungaringachu. Ashtahuanpish millai runaca, pingai tucushcataca mana rijsirinchu.

⁶“Llajtacunatapish chingachichircanimi, paicunapaj huasicunapish llaquinayajmi tucurca, ñancunatapish pi mana puripaj shitashcatami saquircani. Paicunapaj pueblocunapish pi mana causaipaj llaquinayajmi saquirirca.

⁷Chai tucui llaquicunata ricushpaca, ñucataca manchangami yuyarcanimi. Imamanta jarcashpa llaquichishcatapish cazungami yuyarcanimi. Ñuca llaquichishcamanta paicuna cazushca cajpica, paicuna causana huasicunatapish mana chingachimanchu carcani. Ashtahuanpish millaitarajmi utca rurarcacuna.

⁸Chashna cashcamantami Mandaj Dios, ñucaca cashna nini: Cancuna imalla rurashcata ricuchina punllacama shuyaichijlla. Ñucaca tucui llajtacunatapish, mandajcunatapish tandachishpa ñuca p'iñarishcataca, nina lunyacujta shina paicunapaj jahuapi shitana yuyaimi cani. Chashnami cai pachapi causajcunaca, lunyashpa rupacuj ninapi rupashpa chingaringacuna.

⁹Chai punllacunapica, tucuicunatami ima mapata mana rimaj c'allucunayujta rurasha. Chashna rurajpimi, tucuicuna Mandaj Dios ñucallata mañangacuna, tucuicunami tandalla ñucallata servingacuna.

¹⁰Etiopía llajtapi tiyaj jatun yacucuna chaininijpi causajcunami, ñucataca mañangacuna. Jerusalenmanta caita chaita cachashcacunami imalla cuna cashcata ñucaman cungapaj apamungacuna.

¹¹Cancunapaj chaupimantaca, jatun tucushpa cushicujcunataca anchuchishami. Chaimantami ñucapajlla urcupica, ña mana cutinca jatun tucunguichij. Chashnami chai punllapica, cancunaca millaita rurashpa ñucata c'ariyashcamanta ña mana pingachishca canguichij.

¹²Cai pueblopica imata mana yachajcunata, huajchacunallatami saquisha. Paicunami Mandaj Dios ñucallapi shunguta churangacuna.

¹³Chai saquirishca israelcunaca pita mana llaquichingachu, mana llullangacunachu. Paicunapaj c'alluca pita mana umangachu. Paicunataca allimi michinga. Paicuna dormicujpipish, pi mana manchachingachu” ninmi.

¹⁴Siónpi causajcunalla, cantaichigari. Israelcunalla, cantaichigari. Jerusalenpi causajcunalla, tucui shunguhuan cushicuichigari.

¹⁵Mandaj Diosca, cancunata llaquichinataca anchuchishcamari. Cancunata p'iñajcunatapish canllamanmari llujshichishca. Mandaj Diosca, israelcunapaj chaupipi Jatun Mandajmari. Chaimanta ima llaquitapish mana cutin ricunguichijchu.

¹⁶Chai punllacunapica, Jerusalenpi causajcunataca: “Ama imata manchaichijchu. Siónpi causajcuna, ama fuerza illaj tucuichijchu” ningacunami.

¹⁷Mandaj Diosca cancunapaj chaupipimari, paica tucuita rurai tucuj cashcamantaca cancunataca quishpichingami. Cancunamantaca Mandaj Diosca cushicungamari. Paica c'uyashcamantaca upallangamari. Cancunamantaca cushicushpami paica cantanga.

¹⁸“Uni huatacunata, llaqui huacailla causacujcunatapish tandachishami. Paicunaca cancunapajmari carca. Paicunapajca, paicunata p'iñajcunaca llashaj quipi shinamari carca.

¹⁹Chai punllacunapica cancunata llaquichijcunamanca, ñucami paicuna japina cashcata cusha. Patojocunatapish quishpichishami, chingarishca puricujcunatapish tandachishami. Cancunataca alli nishca cachunpish, tucui cai pachapi rijsishca cachunpishmi caipica churasha.

²⁰Chai punllacunapica, cancunataca ñucami pushamusha. Chai punllacunapica, cancunataca ñucami tandachisha. Cancuna ricucunpi prezumanta cacharichishpami, tucui cai pachapi tiyaj llajtacunapi causajcuna rijsishca cachun, alli nishca cachun caipica churasha” ninmi Mandaj Diosca.