Read Chimborazo Highland Quichua ZACARÍAS 1 Bible Online

ZACARÍAS 1 - Chimborazo Highland Quichua bible

ZACARÍAS 1

¹Mandaj Dios ima nishcata huillaj Zacariasca, Iddopaj churi Berequiaspaj churimi carca. Persia llajtata jatun mandaj Darío ña ishqui huata pusaj quillata mandacujpimi, Mandaj Diosca Zacariasmanca cashna nirca:

²“Mandaj Diosca, cancunapaj ñaupa yayacunahuanmi yallitaj p'iñarirca.

³Chaimanta paicunataca cashna ni: Tucuita Mandaj Diosca cashnami nin: Ñucapajman cutirichigari, ñucapish cancunapajman tigrashami ninmi tucuita Mandaj Diosca.

⁴Ama cancunapaj yayacuna shinallataj caichijchu. Dios ima nishcata punta huillajcunaca paicunamanca: Mana alli ñancunamanta, millaita ruranamantapish anchurichij ninmi tucuita Mandaj Diosca nishpami huillarcacuna. Chashna nishcatapish manataj cazurcacunachu, manataj uyarcacunachu.

⁵Cancunapaj ñaupa yayacunaca, ¿maipitaj canga? Dios ima nishcata huillaj runacunapish, ¿huiñaita causacungallachu?

⁶Ashtahuanpish cancunapaj yayacunamanca ñuca shimicunatapish, ñuca mandashcacunatapish ñuca ima nishcata huillaj runacunatami huillachun mandarcani. Ñuca mandashcacunaca, paicunapajmanmi chayarca. Chaimantami ñucapajman cutirircacuna. Paicunaca cashnapishmi nircacuna: Mandaj Diosca, ñucanchijtaca mana alli ñancunapi puricushcamantapish, millaita rurashcamantapishmi, chashna llaquichinataca yuyarirca. Pai rurasha nishca shinallatajmari ñucanchijtaca llaquichin nircacunami nishpa huillai” nircami.

⁷Dios ima nishcata huillaj Zacariasca, Iddopaj churi Berequiaspaj churimi carca. Jatun mandaj Darioca, ishqui huata chunga shuj quillatami mandacurca. Chai quillaca, Sebat shutimi carca. Chai quillapaj ishqui chunga chuscu punllapimi Mandaj Diosca, Zacariasmanca muscuipi shina ricuchirca. Chaitami paica cashna huillarca:

⁸Ña tuta tucujpimi, ñapish alazán caballopi tiyarishca runata ricurcani. Chai runaca, pugru pambapi tiyaj mirto yuracuna chaupipimi carca. Paipaj huashatapish alazán caballocuna, bayo caballocuna, yuraj caballocunami caticurca.

⁹Chaita ricushpaca, cashnami nircani: “¿Ñuca amitolla caicunaca imatagari?” nijpimi, ñucahuan rimacuj angelca: “Ñucami caicuna ima cashcataca yachachisha” nirca.

¹⁰Chai mirto yuracuna chaupipi caj runami cashna nirca: “Caicunataca Mandaj Diosmi, cai pachata ricushpa purinaman cacharca” nircami.

¹¹Paicunaca, mirto yuracuna chaupipi caj Mandaj Diospaj angelmanca cashnami nircacuna: “Ñucanchijca ñami tucui cai pachata muyushpa shamupanchij, tucuicunami casijlla samaricuncuna” nishpami huillarcacuna.

¹²Chashna huillashcata uyashpami, Mandaj Diospaj angelca cashna nirca: “Tucuita Mandaj Dioslla, ñamari canchis chunga huatacunata Jerusalén pueblopi causajcunahuanpish, Judá llajtapi tiyaj pueblocunapi causajcunahuanpish p'iñarishcangui. ¿Maicamataj mana llaquinguiyari?” nircami.

¹³Chashna nijpimi Mandaj Diosca, ñucahuan parlanacucuj angelmanca sumaj shimicunahuan, cushichij shimicunahuan cutichirca.

¹⁴Chaimantaca ñucahuan parlanacucuj angelca, ñucataca cashnami nirca: “Caparishpa cashna huillai: Tucuita Mandaj Diosca cashnami nin: Jerusalentapish, Siontapish ñucapajlla cachunmi munarcani.

¹⁵Chaimantami ricuj llajtacunahuanca yallitaj p'iñarishca cani. Ñuca ashallata p'iñarishca cajpica, ashtahuanpish paicunaca yallitaj millaita rurashpami p'iñachircacuna ninmi.

¹⁶Chaimantami Mandaj Diosca cashna nin: Jerusalenta c'uyashpami, paipajman tigrani. Chai pueblopimi ñuca huasitaca rurangacuna. Jerusalén pueblopimi plomadataca chutanga ninmi tucuita Mandaj Diosca ningui.

¹⁷Cashnapish ninguiraj: Tucuita Mandaj Diosca cashnami nin: Ñuca pueblocunaca, achca allicunahuan talliricujmi canga. Mandaj Dios ñucaca, Sión urcutaca cushichisharajmi, Jerusalén pueblotaca agllasharajmi ninmi ningui” nircami.

¹⁸Chai q'uipami, ñahuita huichilla alzarcani, chaipica chuscu gachucunatami ricurcani.

¹⁹Chaita ricushpami, ñucahuan parlanacuj angeltaca: “Chaicunaca ¿imatagari?” nijpi, chai angelca: “Cai gachucunami Judá llajtapi causajcunatapish, israelcunatapish, Jerusalén pueblopi causajcunatapish caita chaita tsirapashpa cacharcacuna” nircami.

²⁰Chai q'uipaca Mandaj Diosca, chuscu carpinterocunatami ricuchirca.

²¹Chaita ricushpapish ñucaca: “Cai runacunaca ¿imatataj ruranaman shamucuncuna?” nijpimi, chai angelca cashna nirca: “Ñaupaman can ricushca chuscu gachucunami Judá llajtapi causajcunataca, caita chaita tsirapashpa cacharcacuna. Chaimantami paicunaca, umallatapish pi mana alzai tucurcacuna. Judá llajtapi causajcunata tsirapashpa cachaj llajtacunapi causajcunapaj gachucunata paquishpa manchachinamanmi chai runacunaca shamushcacuna” nircami.