Read Chimborazo Highland Quichua ZACARÍAS 10 Bible Online

ZACARÍAS 10 - Chimborazo Highland Quichua bible

ZACARÍAS 10

¹Mandaj Diostaca, q'uipa tamyata cachachun mañaichigari. Mandaj Diosca relampacunata ricuchishpami, cancunamanca manchanayaj tamyata cachanga. Chai tamyahuanmi chagracunapica, tucuicunapajllataj q'uihuacunaca verdijlla huiñanga.

²Terafín nishca dioscunaca llullallatami huillachishcacuna. Adivinajcunapish llullallatami ricushcacuna. Paicunaca yanga muscuicunallatami huillashcacuna. Paicuna cushichishcapish yangallami. Chaimantami runacunaca ovejacuna shina yanga purincuna. Paicunaca michijta mana charishcamantami, llaquilla causancuna.

³“Chaita ricushpami, chai michijcunahuanca nina lunyacuj shina p'iñarini. Paicunata pushajcunatapish llaquichishatajmi. Shina cajpipish tucuita Mandaj Diosmi, pai agllashca Judá llajtapi causajcunataca ricugringa. Paicunataca paipaj alli nishca caballota shinami macanacuipica churanga.

⁴Paicuna puramantami huasita ruranata callarinapaj churana rumipish, jatun estacapish, macanacuna arcopish, mandajcunapish llujshinga.

⁵Macanacuj soldadocuna shinami cangacuna. Paicunata p'iñajcunatapish ñancunapi sirij lodota shinami sarungacuna. Mandaj Dios paicunahuan cajpimi, paicunata p'iñajcunahuanca macanacungacuna. Caballocunapi tiyarishpa macanacujcunatapish pingachishcami canga.

⁶Judapaj huahua huahuacunamanca, ñucami fuerzata cusha. Josepaj huahua huahuacunatapish ñucami huaquichisha. Paicunapaj llajtamanmi tigrachimusha. Ñucaca paicunataca achcatami llaquisha. Chaimantami shuj cutinllapish mana p'iñashca shina cangacuna. Ñucaca paicunata Mandaj Dios cashpami, paicuna mañashcatapish uyasha.

⁷Efrainpaj huahua huahuacunaca, c'ari c'ari macanacujcuna shinami canga. Paicunaca vinota ubyashpa cushicuj shinami cushicunga. Chaita ricushpaca, paicunapaj churicunapish cushicungacunami. Paicunaca Mandaj Dioshuan cashcamantami, achcata cushicungacuna.

⁸Ñuca quishpichishcacunataca silbashpa cayashpami, tucuicunata tandachisha. Ñaupa huatacunapi cashca shinallatajmi achcata miraringacuna.

⁹Allitajchari paicunataca shujtaj llajtacunaman caita chaita cachacuni. Chashna caru llajtacunapi causacushpapish, ñucataca yuyaringacunami. Paicunapaj huahuacunandijmi causangacuna. Caiman cutin tigramungacunapishmi.

¹⁰Paicunataca ñucami Egipto llajtamantaca pushamusha, Asiria llajtamantapish tandachimushami. Chaimantaca Galaad llajtamanpish, Líbano urcumanpishmi pushamusha. Achcacuna cashcamantami, chai llajtacunapish causanapajca mana pajtanga.

¹¹Jatun llaquica mama cuchatami ch'imbanga. Caiman chaiman cuyuricuj yacupish, chai jatun mama cuchallapitajmi chingaringa. Jatun yacupish tucuimi chaquiringa. Asiria llajtapi causajcuna jatun tucunapish urmangami. Egipto llajtapi causajcunata mandana varapish chingaringami.

¹²Mandaj Dios ñucami paicunamanca fuerzata cusha. Chaimantami paipaj shutillapi puringacuna” ninmi Mandaj Diosca.