Read Chimborazo Highland Quichua ZACARÍAS 13 Bible Online

ZACARÍAS 13 - Chimborazo Highland Quichua bible

ZACARÍAS 13

¹Chai punllapica, chuyajlla yacumi llujshinga. Chai chuyajlla yacupimi, Davidpaj huahua huahuacunapish, Jerusalén pueblopi causajcunapish paicunapaj juchacunatapish, mapayashcacunatapish maillaringacuna nircami.

²Tucuita Mandaj Diosca cashnami nin: “Chai punllapica, tucui cai llajtapi tiyaj rurashcalla dioscunapaj shuticunatapish chingachishami. Chashna rurajpimi chai dioscunataca, manataj cutin yuyaringacuna. Shinallataj llulla huillajcunatapish, mapayachij espiritutapish chingachishami.

³Chai punllapica, cashnapishmi tucunga: Maijan huillaj runa huillacujpica, paipaj quiquin yayallataj, paita huachaj mamallatajmi cashna ninga: Mandaj Diosmantami huillacuni nishpa llullashcamantaca, mana causanguichu nishpaca, paipaj quiquin yayallataj, paita huachaj mamallatajmi paitaca tujsishpa huañuchingacuna.

⁴Chai punllacunapica, cashnapishmi tucunga: Llulla huillajcunaca, paicuna muscuipi shina ricushcata huillacushpapish, tucuicunami pingaringacuna. Ña mana millmayuj jatun churanata churarishpa, ashtahuan llullangacunachu.

⁵Ashtahuanpish: Ñucaca, mana huillajchu cani, allpapi tarpushpa causajllami cani. Ñucaca, uchillamantapacha chagrashpallami causani ningami.

⁶Shina nijpipish paitaca cashnami tapungacuna: ¿Ima nishpataj maquicunaca chugrirircangui? nijpica: Ñucahuan alli apanacujcunapaj huasipimi chashna chugrichircacuna ningami” ninmi.

⁷Tucuita Mandaj Diosca cashnapishmi nin: “Espadalla, ovejacunata michijtapish, ñucahuan alli apanacujtapish manchachiyari. Can chai michijta chugrichijpica, ovejacunaca caita chaitami ringacuna. Bachujcunataca ñuca maquihuanmi llaquichisha” ninmi.

⁸Mandaj Diosca cashnapishmi nin: “Cai llajtapi causajcunaca, chaupi yallihuanmi huañungacuna, ashacunallami causajcunaca saquiringacuna.

⁹Chai saquirijcunataca, ninapimi rupachisha. Ima shinami cullquitaj cashcata, curitaj cashcata ricungapaj ninapi rupachincuna, chashnallatajmi ñucapish paicunataca rurasha. Chashna rurajpimi, paicunaca ñuca shutipi mañangacuna. Paicuna mañashcataca uyashami. Chaimantaca: Ñuca agllashcacunami canguichij nishami. Shina nijpimi paicunapish: Mandaj Diosca ñucanchij Diosmi ningacuna” ninmi.