Read Chimborazo Highland Quichua ZACARÍAS 4 Bible Online

ZACARÍAS 4 - Chimborazo Highland Quichua bible

ZACARÍAS 4

¹Ñucahuan parlanacuj angelca ñucapajman shamushpami, ñucataca rijchachirca. Shuj runa muscucushpa rijcharij shinami rijcharircani.

²Chai angelca ñucataca: “¿Imatataj ricungui?” nishpami tapurca. Shina nijpica ñucaca cashnami nircani: “Curi candelerotami ricuni. Chai candelero jahuapica, aceiteta churanatapishmi ricuni. Shinallataj chai jahuapica, canchis lamparacuna tiyacujtapishmi ricuni. Chai lamparacunaca canchis tubocunatami charin.

³Candelero c'uchupica, ishqui olivos yuracunami shayacun. Shujca aceiteta churana alli ladoman, caishujca lluqui ladomanmi shayacun” nircanimi.

⁴Chai q'uipaca, ñucahuan parlanacucuj angeltaca: “Ñuca amito ¿caica imatataj ricuchinri?” nishpami tapurcani.

⁵Chashna tapujpimi, chai angelca ñucataca: “¿Manachu ima cashcata yachangui?” nirca. Shina nijpimi ñucaca: “Ñuca amito, mana yachapanichu” nircani.

⁶Chaimantami chai angelca, ñucamanca cashna nirca: “Zorobabelmanmi Mandaj Diosca cashna nin: Mana soldadocunallahuanchu, mana c'ari c'ari macanacushpallachu mishangui. Ashtahuanpish ñuca Espirituhuanmari mishangui.

⁷Jatun urculla, canca ¿pitaj canguiyari? Zorobabelpaj ñaupajpica, pugru pamba tucushpami saquiringui. Paimi punta rumitaca llujshichinga, chashna ruracujpica paihuan caj runacunaca: Sumajmari, sumajmari nishpami caparingacuna ninmi” nircami.

⁸Chai q'uipapish, Mandaj Diosca cashnapishmi nirca:

⁹“Diospaj huasita ruranata callaringapajca, Zorobabelmi, paipaj maquicunahuan callari rumita churashpa callaringa. Chai huasitaca paillatajmi tucuchinga” nircami. Chashna rurashcacunata ricushpami, ñucataca tucuita Mandaj Diosllataj cancunapajman cachashcataca yachanguichij.

¹⁰“Diospaj huasita ruranata Zorobabel callaricujpi p'iñajcunapish tucuchishcata ricushpaca cushicungacunami. Zorobabel plomadata maquipi charicujtapish ricungacunami. Chai canchis lamparacunaca, Mandaj Diospaj ñahuicuna cai pachata tucuita ricucujtami ricuchin” nircami.

¹¹Cashnapishmi ashtahuan tapurcani: “Candeleropaj alli ladoman shayacuj olivo yurapish, lluqui ladoman shayacuj olivo yurapish ¿imatataj ricuchin?

¹²Lamparaman chayana aceite tubo c'uchupi shayacuj ishqui olivo ramacunamanta curi shina llujshicuj aceiteca ¿imatataj ricuchin?” nishpami tapurcani.

¹³Shina nijpimi chai angelca: “¿Manachu ima cashcata yachangui?” nirca. Shina nijpimi ñucaca: “Amito, mana yachapanichu” nircani.

¹⁴Chashna nijpimi chai angelca: “Caicunaca tucui cai pachata ricucuj Jatun Dios aceitehuan churashca ishqui runacuna paipaj ñaupajpi shayacujtami ricuchin” nircami.