Read Chimborazo Highland Quichua ZACARÍAS 6 Bible Online

ZACARÍAS 6 - Chimborazo Highland Quichua bible

ZACARÍAS 6

¹Cutinllataj ñuca ñahuita huichilla alzashpami, chuscu carretacuna ishqui urcu chaupimanta llujshicujta ricurcani. Chai urcucunaca, bronce urcucunami carca.

²Punta carretataca, alazán caballocunami aisacurca. Chaipaj q'uipa carretataca, yana caballocunami aisacurca.

³Ishquipaj q'uipa carretataca, yuraj caballocunami aisacurca. Quimsapaj q'uipa carretataca, bayo caballocunami aisacurca.

⁴Chaita ricushpaca, ñucahuan parlanacucuj angeltaca: “Ñuca amito, ¿imatataj cai tucuica ricuchinri?” nishpami tapurcani.

⁵Shina nijpimi, chai angelca: “Cai pachata mandaj Jatun Diospaj ñaupajpi ricurishca q'uipa llujshishpa, jahua pacha chuscu esquinamanta shamuj huairami” nircami.

⁶Yana caballocunaca carretataca, huichimanmi aisashpa rircacuna. Yuraj caballocunaca caishuj carretataca, chaininijmanmi aisashpa rircacuna. Bayo caballocunahuan caj carretataca, urimanmi aisashpa rircacuna.

⁷Alazán caballocunaca, tucui cai pachata purinamanmi llujshirca. Chaimanta paicunataca: “Tucui cai pachata ricushpa purimugrichij” nijpimi, paicunaca cai pachata ricushpa purigrircacuna.

⁸Chai q'uipami, ñucata caparishpa cayashpaca cashna nirca: “Riqui, janaj ladoman rijcunaca, chai llajtapimi ñuca Espirituta saquimurcacuna” nircami.

⁹Mandaj Diosca cashnapishmi nirca:

¹⁰“Babilonia llajtaman prezu apashcacunapuramanta tigramuj Heldaitapish, Tobiastapish, Jedaiastapish pushashpa Sofoniaspaj churi Josiaspaj huasiman ri.

¹¹Chaiman chayashpaca cullquitapish, curitapish japishpa coronacunata rurangui. Chaimantaca Josadacpaj churi, curacunata mandaj Josué curaman umapi churachingui.

¹²Chai q'uipaca, cashna ningui: Tucuita Mandaj Diosca cashnami nin: Retoñacuj yura shuti runaca, ñallami shamunga. Paica, quiquin sapillamantatajmi huiñanga. Paimi Mandaj Diospaj huasitaca shayachinga.

¹³Paimi, Mandaj Diospaj huasitaca shayachinga. Paica tucuicuna jatunyachishcami canga. Paica paipaj tiyarinapi tiyarishpami, tucuicunata mandanga. Paipaj c'uchupica, shujtaj curapishmi canga. Paicunaca ishquindijmanta cunanacushpami, sumajta causangacuna.

¹⁴Chaishuj coronacunataca, Helemtapish, Tobiastapish, Jedaiastapish, Sofoniaspaj churi Hentapish ricuchij cachun yuyarinapaj Mandaj Diospaj huasipi churangui ninmi ni” nircami.

¹⁵Shinallataj carupi causajcunami, Mandaj Diospaj huasita rurashpa ayudanaman shamungacuna. Chaita ricushpami, Mandaj Dios huillachun ñucata cancunapajman cachashcataca yachanguichij. Cancunata Mandaj Dios mandashcata uyashpa cazujpimi, cashnaca tucunga.