Read Chimborazo Highland Quichua ZACARÍAS 7 Bible Online

ZACARÍAS 7 - Chimborazo Highland Quichua bible

ZACARÍAS 7

¹Jatun mandaj Darioca, ñami chuscu huata iscun quillata mandacurca. Quisleu shuti quillapaj chuscu punllapimi, Mandaj Diosca Zacariasmanca huillarca.

²Chai punllacunami Bet-el pueblopi causajcunaca, Sarezer runatapish, Regem-melec runatapish, paicunapaj runacunandij, Mandaj Diosta mañanaman cacharcacuna.

³Paicunaca, tucuita Mandaj Diospaj huasipi causaj curacunatapish, pai ima nishcata huillajcunatapish cashnami nircacuna: “¿Ñucanchijca pichca quillapica huacanachu canchij? ¿Sarun huatacunaman imatapish ch'icanchishpa ruracushca shinallatajchu catina canchij?” nishpami tapurcacuna.

⁴Chaimantami tucuita Mandaj Diosca ñucataca cashna nirca:

⁵“Cai llajtapi causajcunatapish, curacunatapish cashna ni: Cancunaca canchis chunga huatacunataca, pichca quillapi, canchis quillapi ayunashca cashpapish, huacashca cashpapish mana ñucata yuyarishpatajchu chashna rurarcanguichij.

⁶Micushpapish, ubyashpapish cancunapajllatajmi micurcanguichij ubyarcanguichij ni” nircami.

⁷Cai shina shimicunataca, Jerusalenpi causajcuna, chai c'uchulla pueblocunapi causajcuna, Neguev shuti, Sefela shuti pambacunapi causajcunapish sumajta causacujpirajmi Mandaj Diosca, pai ima nishcata huillajcunata huillachirca.

⁸Mandaj Diosca, Zacariastaca cashnami nirca:

⁹“Tucuita Mandaj Diosca cashnami nin: Mana umashpalla cashcata ruraichij. Caishujhuan chaishujhuan c'uyanacushpa, llaquinacushpa causaichij.

¹⁰Viudatapish, yaya mama illajtapish, caru llajta runatapish, imata mana charijtapish ama p'iñaichijchu, ucu shungullapipish caishujta chaishujta llaquichinataca ama yuyaichijchu” nircami.

¹¹Chashna nijpipish, mana uyashun nircacunachu. Ashtahuanpish huashata ricuchishpami, mana uyanachishpa rinrinta taparircacuna.

¹²Paicunapaj shunguca, diamante shinami carca. Chashna cashpami tucuita Mandaj Dios, paipaj Espirituhuan ñaupa huillajcunaman huillachishca mandashcatapish, paipaj shimi imata nishcatapish mana uyarcacuna. Chaimantami Mandaj Diosca, paicunahuanca yallitaj p'iñarirca.

¹³Tucuita Mandajca cashnami nin: “Ima shinami paicunapish ñuca rimashcacunata mana uyarcacuna, chashnallatajmi paicuna mañashcatapish mana uyarcani.

¹⁴Ashtahuanpish paicunataca, jatun acapanahuanmi llujshichishpa tucui llajtacunaman caita chaita cacharcani. Chaimantami paicuna causana llajtaca, llaquinayaj saquirirca. Pipish mana tigrashpa ricuipaj jatun llaquimi tucurca. Paicuna munashca allpaca, shitashcami saquirirca” ninmi.