Read Chimborazo Highland Quichua MALAQUÍAS 1 Bible Online

MALAQUÍAS 1 - Chimborazo Highland Quichua bible

MALAQUÍAS 1

¹Cai huillanataca, Mandaj Diosmi tucui israelcunata llaquichina cashcata Malaquiasta huillachirca.

²Mandaj Diosca cashnami nin: “Cancunataca ñucaca c'uyarcanimi” ninmi. Chashna cajpipish cancunaca: “¿Ima shinataj canca ñucanchijtaca c'uyarcanguiyari?” nircanguichijmi. “¿Manachu Esauca Jacobopaj huauqui carca imatagari?” ninmi Mandaj Diosca. “Chashna huauquindijcuna cajpipish, Jacobollatami c'uyarcani,

³Esautaca p'iñarcanimi. Chaimantami Esaú causana urcucunatapish llaquinayajta saquircani. Paipaj allpacunatapish shitashca pambacunapi causaj chacalcuna causanatami rurarcani” ninmi.

⁴Edom llajtapi causajcunaca: “Ñucanchijca huajchayashcanchijmari. Chashna cashpapish, cutinllataj allichirishunmi” ningacunami. Shina nijpipish, tucuita Mandaj Diosca cashnami nirca: “Paicuna allichijpipish, ñucami cutin urmachisha. Chaimantami Diosta mana manchaj, Mandaj Dios huiñaipaj p'iñashca llajta ningacuna.

⁵Chashna rurajta cancunapaj quiquin ñahuihuantaj ricushpami: Mandaj Diostaca tucui shujtaj llajtapi causajcunacama jatunyachichun ninguichijmi” nircami.

⁶Curacuna, tucuita Mandaj Diosca cashnami nin: “Huahuaca, paipaj yayataca cazunmi. Servij runapish, paipaj amo ima mandashcata ruranmi. Ñuca cancunapaj yaya cajpica, ¿ima nishpataj mana cazunguichigari? Ñuca cancunapaj amo cajpica, ¿ima nishpataj ñuca mandashcataca mana ruranguichigari? Cancunaca ñuca shutita yangapi churashca jahuamari: ¿Ima shinataj cambaj shutitaca yangapi churarcanchigari? ninguichij.

⁷Cancunaca ñuca altartaca yanga cashcata yuyashpamari, imatapish mapacunatami ñucaman cushpa altar jahuapi rupachinguichij. Chashna rurashca jahuapish: ¿Ñucanchijca cantaca imata rurashpataj mana cazunchigari? ninguichijmi. Cancunaca ñuca mezapica, mana munashcacunatapish churanallami yuyanguichijchari.

⁸Shinallataj ñahui mana ricuj animalta ñucaman cushcapish, cancunapajca ¿allichu imatagari? Shinallataj patojota cashpa, ungushcata cashpa ñucaman cushcapish cancunapajca ¿allichu imatagari? Alli cajpica cancunata mandajman chashna animalcunata cugrichigari. Paipish cancuna cushca mana alli animalcunataca cushicushpa chasquinllachu imami, tucuita Mandaj Diostajmi chashna nini.

⁹Chaimantaca: Cunanca Taita Dios ñucanchijpaj allita rurachun, ñucanchijta llaquichun mañapaichigari ninguichijmi. Ashtahuanpish chashna imapish mana allicunata cujpica, maitataj ñucaca cushicushari. Tucuita Mandaj Diostajmi chashna nini.

¹⁰Ñuca altar jahuapi imata cushpa rupachinaman ama yanga shamuchunca, cancunapuramanta maijan ¿manachu ñuca huasi punguta huichcanguichijman? Ñucaca cancunapica manataj cushicuitaca charinichu. Cancuna ñucaman imalla cuna cashcata cujpipish, manataj chasquishachu. Tucuita Mandaj Diostajmi chashna nini.

¹¹Ñucaca inti llujshinpi tiyaj llajtacunamantaca, inti huashicunpi tiyaj llajtacunapi causajcunacama rijsishcami cani. Chaimantami tucuipi ñucamanca inciensotapish, imalla cuna cashcatapish mapa illajllata cuncuna. Chaimanta ñucaca tucui llajtacunapi rijsishcami cani. Tucuita Mandaj Diostajmi chashna nini.

¹²Cancunaca: Mandaj Diospaj altarpish mapami, paipaj micunapish millananami nishpami yangata rurashcanguichij.

¹³Cashnapishmi nircanguichij: Mandaj Diosman imatapish cucushpallaca, ñami shaicunchij nishpami, ñucata p'iñachishcanguichij. Tucuita Mandaj Diostajmi chashna nini. Cancunaca shuhuashcata, patojota, ungushca animaltami apamushpa ñucamanca curcanguichij. Chashna mana alli animalcunata cujpica ¿maitataj chasquishari? Mandaj Diostajmi chashna nini.

¹⁴Maijanpish c'ari animalcunata canllata charishca jahua cusha nishpapish, mana alli animaltaraj ñucaman cushpa huañuchishpa umashcamantaca, paipaj jahuallatajmi canga. Ñucaca, jatun mandajcunatapish yalli Jatun Mandajmi cani. Ñucaca, tucui llajtacunapi causajcuna manchanami cani” ninmi tucuita Mandaj Diosca.