Read Chimborazo Highland Quichua MALAQUÍAS 3 Bible Online

MALAQUÍAS 3 - Chimborazo Highland Quichua bible

MALAQUÍAS 3

¹Chaimantami Mandaj Diosca cashna nin: “Ñuca huillajtami ñaupachishpa cachasha. Paimi ñuca purina ñantaca allichinga. Cancuna mashcacushca Amoca, paipaj huasimanca ñapish yaicungallami. Cancuna shuyacushca ari ninacushcata pajtachij angelpishmi shamunga. Riquichij, ñamari shamucun” ninmi.

²Pai shamui punllapica, ¿pitaj c'ari c'ari shayari tucungari? ¿Pitaj paipaj ñaupajpica mana pingaringari? Paica mapacunata anchuchij nina shinamari. Paica mapacunata llujshichij tajshana jabón shinamari.

³Paica paipaj tiyarinapi tiyarishpami, levitacunapaj juchacunataca cullquita, curita ninapi rupachishpa mapata anchuchij shina anchuchinga. Chashna ima mapa illajlla cashpami, Mandaj Diosman imalla cuna cashcatapish cungapaj apamungacuna.

⁴Ima shinami ñaupa huatacunapi, ñaupa punllacunapi imallata cuna cashcacunata cushicushpa Mandaj Diosca chasquirca, chai shinallatajmi Judapi, Jerusalenpi causajcuna imallata cuna cashcata cushcataca cushicushpa chasquinga.

⁵Tucuita Mandaj Diostajmi cashna nini: Ñucami cancuna imalla rurashcacunata ricuj shamusha. Chai punllapimi yumbucunatapish, huainayajcunatapish, llullashpa huillajcunatapish, trabajajcunaman cullquita mana tucui pagajcunatapish, viudacunata, yaya mama illajcunata p'iñajcunatapish, caru llajta runacunata llaquichijcunatapish, ñucata mana manchajcunatapish llaquichisha.

⁶Jacobpaj huahuacuna, Mandaj Dios ñucaca manataj shujtajyanichu. Chaimantami cancunaca mana chingachishca canguichij.

⁷Cancunapaj ñaupa yayacunamanta callarishpa cunancamami, ñuca mandashcacunataca mana cazunguichij, mana huaquichinguichij. Chashna cashpapish ñucapajman tigramuichij, ñucapish cancunapajman tigrashami. Tucuita Mandaj Diostajmi chashna nini. Chashna nishcata uyashpapish cancunaca: ¿Imapajtaj cambajmanca tigrashunri? ninguichijmi.

⁸¿Runaca, Diospajtaca shuhuai tucunchu? Cancunaca ñucapajtaca shuhuacunguichijmari. Chashna shuhuashca jahuapish cancunaca: ¿Imatataj cambajtaca shuhuacunchigari? ninguichijmi. Cancunaca chungamanta shujta cunatapish, ñucaman imalla cuna cashcatapish mana cushpamari shuhuashcanguichij.

⁹Cai llajtapi tucui causajcuna ñucapajta shuhuashcamantaca, llaquita apana cashca shinallatajmi llaquitaca apanguichij.

¹⁰Chungamanta shujta ñucaman cuna cashcataca tucuita ñuca huasiman apamuichij. Cancuna apamujpimi, ñuca huasipica micuna tiyanga. Cancuna chashna cujpica, ñucapish manachu jahua pacha ventanacunata pascashpa, tucui imatapish Cancuna mana huaquichi tucuipajta cuni imamí ricuichigari. Tucuita Mandaj Diostajmi chashna nini.

¹¹Cancuna tarpushca granocunata chingachijtapish jarcashami. Chaimantami granocunataca, imata mana chingachinga. Cancunapaj uva chagracunapish allimi p'ucunga. Tucuita Mandaj Diostajmi chashna nini.

¹²Chashna sumaj llajtata ricushpami, shujtaj llajtapi causajcunaca paicunaca cushicushpamari causacuncuna ningacuna. Tucuita Mandaj Diostajmi chashna nini nircami.

¹³Mandaj Diosca cashnami nin: “Cancunaca mana jahuallatami ñucataca rimarcanguichij. Chashna rimashca jahuapish: ¿Imatataj cantaca huashalla rimanchigari? ninguichijmi.

¹⁴Cashnapishmi nishcanguichij: Yallitajmi Diostaca servishpa causanchij. Pai mandashcata pajtachishpapish, tucuita Mandaj Diospaj ñaupajpi llaquijlla purishpapish manamari imata japinchijchu.

¹⁵Chaimanta cunanca ñucanchijca cashnami ninchij: Jatun tucushpa causajcunarajmi cushijlla causancuna, millaita rurajcunaca mana paicunallataj imayuj tucuncunachu. Ashtahuanpish Diosta umashpami, ima llaquimantapish quishpirincuna ninguichijmi” ninmi.

¹⁶Chaimantami Mandaj Diosta manchajcunapura tandanacushpa, caishuj chaishuj parlanacurca. Paicuna parlanacushcataca, Mandaj Diosca tucuitami uyarca. Paicuna imalla parlanacushcata yuyaringapajmi, Mandaj Diosca paipaj libropi quillcachirca. Chaimantami Mandaj Diosca maijanlla paita manchashpa causajcunapaj, maijanlla paita yuyarishpa causajcunapaj shuticunataca quillcarca.

¹⁷Tucuita Mandaj Diosca cashnami nin: “Ñuca tucuita ricunaman shamui punllami ñucapajllata rurasha. Paicunaca ñucapajca achca valij charinacuna shinami cangacuna. Shuj yayaca, paita servij huahuataca perdonanmi, chashnallatajmi ñucapish paicunataca perdonasha.

¹⁸Ñucapajman cutirishpami cashcata rurajtapish, millaita mana rurajtapish, Diosta servijtapish, Diosta mana servijtapish yachaj chayanguichij” ninmi.