Read Chimborazo Highland Quichua MATEO 10 Bible Online

MATEO 10 - Chimborazo Highland Quichua bible

MATEO 10

¹Chai q'uipami Jesusca, paipaj chunga ishqui yachacujcunata cayashpaca, mapa espiritucunata llujshichi tucunatapish, tucui ungüihuan, tucui nanaihuan cajcunata alliyachi tucunatapish curca.

²Chunga ishqui apostolcunapaj shuticunaca caicunami: Puntaca Pedrota shutichishca Simonpish, paipaj huauqui Andrés, Zebedeopaj churi Jocobopish, paipaj huauqui Juanpish,

³Felipe, Bartolomé, Tomás, impuestota japij Mateo, Alfeopaj churi Jacobo, Tadeo nishca Lebeo,

⁴Canaán quiquin llajtamanta macanacujpuramanta Simonpish, Jesusta huañuchichun japichij Judas Iscariotepishmi carca.

⁵Jesusca chunga ishqui yachacujcunata huillanaman cachacushpaca cashna nishpa yachachishpami cacharca: “Mana israelcunapajman rina ñantaca, ama ringuichij. Samariacunapaj pueblocunamanpish ama yaicunguichij.

⁶Ashtahuanpish Israelpaj huahua huahuacuna chingarishca ovejacuna shina puricujcunapajman” richij.

⁷Paicunapajman rishpaca: “Jahua pachamanta mandanamari ña mandagrin” nishpa huillaichij.

⁸Ungushcacunata, alliyachichij, leprahuan cajcunata chuyayachichij, huañushcacunata causachichij, supai japishcacunamantapish supaicunata llujshichichij. Chaicunataca cancunaca Taita Dios c'uyashpa cushcallatami chasquircanguichij. Cancunapish c'uyashcallamanta alliyachinguichijlla.

⁹Curitapish cullquitapish, cobretapish ama apashpa ringuichij.

¹⁰Ñanpi micunapaj cucayutapish ama apanguichij. Camizatapish, pargatetapish shujtajtaca ama apanguichij. Taunatapish ama apanguichij. Imata rurajpish chaipi rurashcamantami micunata charin.

¹¹Ashtahuanca cancuna mai puebloman, mai llajtaman chayashpaca, maijanpish chasquipaj alli shungu cajta mashcashpa chaiman chayanguichij. Shujtaj llajtaman ringacama chai huasillapitaj saquiringuichij.

¹²Huasiman yaicugrishpaca, sumaj causai cancunahuan cachun nishpa yaicunguichij.

¹³Sumaj causai cancunahuan cachun nishcata chasquinalla cashpa huasiyuj alli chasquijpica, chashna nishcaca paicunahuanmi saquiringa. Ashtahuanpish chasquinapaj mana cashpa mana chasquijpica cancunapajllamantajmi tigranga.

¹⁴Maijan huasipi cashpa, pueblopi cashpapish cancunata mana chasquisha nishpa, huillashcatapish mana uyashun nijpica, cancunapaj chaquimanta ñutu allpatapish chaspishpa chaimanta llujshishpa ringuichijlla.

¹⁵Mana chasquisha nij pueblocunapajca, imalla rurashcata Taita Dios ricuchi punllapica Sodoma, Gomorra llajtacunapi causajcunapajta yalli mana apaipaj llaquimi canga. Chashnatajmi canga.

¹⁶Cancunataca ovejacunata atujcunapaj chaupiman cachaj shinami cachani. Culebra shina yachaj, paloma shina manso caichij.

¹⁷Runacunamanta huaquichiringuichij. Cancunataca mandajcunapuralla tandanacushcaman apangacunami. Paicunapaj sinagogacunapi azotingacunami.

¹⁸Llajtata mandajcunapaj ñaupajman, jatun mandajcunapaj ñaupajmanpishmi ñucata caticushcamantaca apashca canguichij. Jatun mandajcunamanpish mana israelcunamanpish ñucamanta huillachunmi chashna apashca canguichij.

¹⁹Cancunata paicunapaj maquipi churajpica: “Imatataj nishun, imatataj rimashun” nishpa ama chai yuyailla canguichijchu. Cancuna ña rimagrijpica, imalla rimana cashcata Taita Diosmi rimachinga.

²⁰Mana quiquincunapaj yuyaimantachu rimanguichij, ashtahuanpish cancunapaj Yayapaj Espiritumi cancunataca rimachinga.

²¹Huauquita huañuchichunca huauquillatajmi japichinga. Yayaca churitami japichinga. Huahuacunapish, yaya mamata p'iñashpa jatarishpami huañuchichinga.

²²Ñuca shutimantaca tucuicuna p'iñashcami canguichij. Ashtahuanpish tucuringacama catirajllami quishpiringa.

²³Shuj pueblopi cancunata llaquichina yuyailla llaquichijpica, shujtaj pueblopi miticugringuichij. Israelpi tiyaj tucui pueblocunapica, Runa Aichayuj tigramungacama manaraj tucui huillanguichijchu. Chashnatajmi canga.

²⁴Yachacujca paita yachachijtaca mana yallichu. Amopajta rurajpish paipaj amotaca mana yallichu.

²⁵Yachacujpish paita yachachij shinallataj, amopajta rurajpish paipaj amo shinallataj tucushpaca, allimi canga. Yayatapish supaicunata mandaj nicujcunaca huahuacunatacarin ¡Imatapishchari ningacuna!

²⁶Chaimanta ama manchaichijchu. Pacalla cashcacunaca ima pacalla mana saquiringachu, tucuimi yacharishca canga. Shinallataj pacallapi cashcaca ricuchishcami canga.

²⁷Cancunaman tuta yachachishcataca punlla huillanguichij. Rinrinllapi huillashcataca, huasi jahuamanta caparishpa huillanguichij.

²⁸Cuerpota huañuchijcunataca, ama manchaichijchu. Paicunaca, almataca mana huañuchi tucunchu. Chaipaj randica almandij, cuerpondij ucu pachapi chingachi tucuj Taita Diosta manchaichij.

²⁹¿Manachu ishqui pajarocunata shuj cullquipi c'atuncuna? Chashna c'atujpipish cancunapaj Yaya huañuchun mana munajpica shujllapish mana huañunchu.

³⁰Cancunapaj uma ajchapish tucui yupashcami canguichij.

³¹Chaimanta amataj manchaichijchu. Cancunacarin, achca pajarocunatapish yalli valijmi canguichij.

³²Maijanpish ñucata catij cashcata runacunapaj ñaupajpi huillajpica, ñucapish jahua pachapi caj ñuca Yayapaj ñaupajpica paicunaca ñucapajmi nishami.

³³Maijanpish runacunapaj ñaupajpi paitaca mana rijsinichu nijtaca, ñucapish jahua pachapi caj ñuca Yayapaj ñaupajpica paitapish mana rijsinichu nishami.

³⁴Cai pachapi sumaj causai tiyachun shamushcataca ama yuyanguichij. Sumaj causai tiyachunca mana shamurcanichu, ashtahuanpish macanacui tiyachunmi shamurcani.

³⁵Runacunapica churica yayata, ushushica mamata, nuerapish suedrata p'iñachunmi shamurcani.

³⁶Runacunapi chashna p'iñajca quiquin huasi ucupurallapitajmi canga.

³⁷Maijanpish yayata, mamata ñucata yalli c'uyajca, mana ñucapaj cai tucunchu. Churita, ushushita ñucata yalli c'uyajpish mana ñucapaj cai tucunchu.

³⁸Ñucata catij tucushpaca llaquita apanataj cashcata mana alli yuyarishpa ñucata catijca, mana ñucapajchu.

³⁹Pipish paipaj causaita c'uyajca, chingaringami. Pipish ñucamanta paipaj causaita chingachijca huiñai causaitami japinga.

⁴⁰Maijanpish cancunata chasquishpaca, ñucatami chasquin. Ñucata chasquijca, ñucata cachajtami chasquin.

⁴¹Profetataj cashcata yachashcamanta paipaj huasipi paita chasquijmanca, pai japina cashcataca profetaman shinallatajmi cunga. Maijanpish cashcata rurajtaj cashcata yachashcamanta paipaj huasipi paita chasquijmanca, pai japina cashcataca cashcata rurajman shinallatajmi cunga.

⁴²Cai imapish mana caj shinaman ñucata caticuj cashcamanta paicunaman vaso chiri yacullatapish cujmanca, Taita Diosca pai japina cashcataca cungatajmi. Chashnatajmi canga.