Read Chimborazo Highland Quichua MATEO 11 Bible Online

MATEO 11 - Chimborazo Highland Quichua bible

MATEO 11

¹Jesusca, paipaj chunga ishqui yachacujcunaman yachachishca q'uipaca, chai llajtallapitaj caj shujtaj pueblocunapi yachachingapaj huillangapajpishmi chaimantaca rirca.

²Juanca carcelpi cashpami, Cristo imallata ruracushcata uyashpa, paipaj yachacujcunamanta ishquita,

³Jesusta tapunaman cacharca. Paicunataca: — ¿Canchu chai shamuna cashcaca cangui, mana cashpaca shujtajtachu shuyana canchij? — nichunmi cacharca.

⁴Paicuna tapujpica Jesusca: — Richij, cancuna imata ricushcata, uyashcata Bautizaj Juanmanca huillagrichij.

⁵Ñahui mana ricujcuna ricushcata, cojocuna purishcata, leprahuan cajcuna alliyashcata, rinrin mana uyajcuna uyashcata, huañushcacunata causachishcata, huajchacunamanpish alli huillaita huillashcata Juanmanca huillagrichij.

⁶Maijanpish ñucapi mana ñitcarijca cushichishcami canga — nircami.

⁷Bautizaj Juan cachashcacuna rishca q'uipami, Jesusca chaipi cajcunaman Juanmanta cashna parlai callarirca: — Shitashca pambapica ¿imata ricungapajtaj rircanguichij? ¿Shuj carrizota huaira caiman chaiman cuyuchicujtachu ricugrircanguichij?

⁸Mana cashpaca ¿Shuj runa sumaj churanacunata churarishcatachu ricugrircanguichij? Sumajta churarishcacunaca, jatun mandajcunapaj huasicunallapimi tiyan.

⁹Shinashpaca ¿imata ricungapajtaj rircanguichij? ¿Shuj profetatachu ricugrircanguichij? Ari, profetatatajmari ricugrircanguichij. Paica profetatapish yallimari.

¹⁰Juanmantaca, cashna quillcachishcami tiyacun: “Ñuca ima nishcata huillajtaca cambaj ñaupami cachani. Paimi cambaj ñaupa rishpa, can purina ñanta allichinga” nishcami.

¹¹Cai pachapi huacharishcacunapurapica, bautizaj Juanta yalli allica pi mana tiyashcachu. Shina cajpipish cai pachapi imapish mana caj shinacunami jahua pachamanta mandacunpica Juanta yalli cangacuna. Chashnatajmi canga.

¹²Bautizaj Juan huillai callarishca punllamanta cunancamami, jahua pachamanta mandacunca llaquita apacun. Chai mandacunman yaicusha nijcuna ama yaicuchunmi millaicunaca chingachisha nicuncuna.

¹³Profetacunapish, mandashcacunapish, jahua pachamanta mandaj shamuna cashcataca Juan huillai callaringacamami huillacurca.

¹⁴Eliastami cachasha nishpa Taita Dios nishcaca bautizaj Juanmi. Paita crisha nishpaca crichijlla.

¹⁵Maijanpish uyanapaj rinrinta charijca uyaichigari.

¹⁶Cunan cai punllapi causacujcunataca ¿imahuantaj ch'imbapurashari? Paicunaca, plazacunapi tiyacuj huambracuna paicunahuan caj huambracunata cashna caparicuj shinami:

¹⁷“Flautapi tocajpipish, mana bailarcanguichijchu. Huañuipi cantanata tocajpipish, mana huacarcanguichijchu” nicuj shinamari canguichij.

¹⁸Juan shamushpaca, mana micurcachu. Mana ubyarcachu. Chaimanta paitaca: “Supaitami charin” nincunami.

¹⁹Runa Aichayuj tucushpa shamujca micujmi, ubyajmi. Chaimanta chai runaca: “Achcata micujmi, vinotapish ubyajmi, impuestota japijcunahuan, juchayujcunahuanpish tandanacunllami” nincunami. Chashna nijpipish Taita Dios yachaj cashcataca Taita Diospaj huahuacunallami allimi nincuna — nircami.

²⁰Jesusca tauca pueblocunapimi, achca milagrocunata rurarca. Chai pueblopi causajcunaca chaita ricushpapish, mana allita ruracushcata mana saquishpa Taita Diosman mana cutirijpimi, paicunataca sinchita cashna rimai callarirca:

²¹“Aij Corazinpi causajcunalla, aij Betsaidapi causajcunalla. ¡Imachari tucunguichij! Cancunapajpi rurashca shina milagrocunata Tiropi, Sidonpi rurashca cajpica, paicunarajchari mana allita ruracushcata saquishcata ricuchingapaj cañamazuta churarishpa, ushpata shitarinman carcacuna.

²²Chaimantami cancunaman huillani: Imalla rurashcata Taita Dios ricuchi punllapica, cancunataca Tiropi, Sidonpi causajcunata yallimi jatunta llaquichinga.

²³Capernaumpi causajcunalla, jahua pachamanmi apashca cashun yuyacunguichijmi. Ashtahuanpish ucu pachamanmari shitashca canguichij. Cancunapajpi rurashca shina milagrocunata, Sodomapi rurashca cajpica, cunan punllacamami chai puebloca tiyacunmanraj carca.

²⁴Chaimantami cancunaman huillani: Imalla rurashcata Taita Dios ricuchi punllapica, cancunataca Sodomapi causajcunata yallimi jatunta llaquichinga” nircami.

²⁵Chaipimi Jesusca cashna nirca: “Jahua pachata, cai pachata Mandaj ñuca Yaya, ñucaca cantami alabani. Alli yuyaiyuj, yachaisapacunamanca caicunataca pacarcanguimari. Ashtahuanpish uchilla huahuacunamanmari ricuchircangui.

²⁶Ñuca Yayitu, canllatajmari chashna tucuchun munashcangui.

²⁷Ñuca Yayaca tucuitami ñucamanca curca. Churi pi cashcatapish pi mana rijsinchu, Yayallami rijsin. Yayatapish pi mana rijsinchu, Churillami rijsin. Pi cashpapish Churi rijsichisha nishcacunallami, Yayataca rijsin.

²⁸Tucui imalla ruranacunahuan shaicushcacuna, aparishcacuna tucuicuna ñucapajman shamuichij. Ñucami cancunataca samachisha.

²⁹Ñucataca manso, mana jatun tucushca shungu cashcata ñuca yugota aparishpa yachaichij. Chashnami cancunapaj alma samarinata japinguichij.

³⁰Ñuca yugoca p'anguillami, ñuca apachinapish mana llashajchu” nircami.