Read Chimborazo Highland Quichua MATEO 12 Bible Online

MATEO 12 - Chimborazo Highland Quichua bible

MATEO 12

¹Chai punllacunallatajmi Jesusca, samana punllapi trigo chagra chaupi ñanta ricurca. Paipaj yachacujcunaca yaricachishpami, trigo caspata c'utsashpa c'acushpa micui callarircacuna.

²Chaita fariseocuna ricushpaca: — Cambaj yachacujcunaca, samana punllapi ama rurangui nishcatamari ruracuncuna — nircacunami.

³Chaimi Jesusca: — Davidpish, paihuan cajcunapish yaricaihuan cashpa, imata rurashcataca ¿manachu rezashcanguichijllapish?

⁴Paica, Taita Diospaj huasiman yaicushpa, Taita Diosman cushca tandatami micurca. Chai tandataca paipish, paihuan cajcunapish mana micunallachu carca. Chaitaca curacunallami micuna carca.

⁵Curacunapish Taita Diospaj huasipica, samana punllapimi yanga punllapi shinallataj Taita Diospajta rurancuna. Chashna rurashpapish mana juchayuj tucushcataca Moisés Mandashcapica ¿manachu rezashcanguichij?

⁶Cancunataca cashnami nini: Taita Diospaj huasitapish yalli jatun cajmari caipi.

⁷Quillcachishcapi: “Sacrificiocunataca mana ninichu. Ashtahuanpish llaquij cachunmi munani” nishca imata nisha nishcata yachashpaca, manapish millaita rurajcunataca mana llaquichinguichijmanchu.

⁸Runa Aichayujca, samana punllatapish Mandajmi — nircami.

⁹Chaimanta rishpaca, Jesusca judiocunapaj sinagogamanmi yaicurca.

¹⁰Chaipica chaquishca maqui shuj runami tiyacurca. Jesusta juchachingapajmi, fariseocunaca: — ¿Samana punllapica alliyachina ninchu? — nishpa tapurcacuna.

¹¹Shina nijpi Jesusca: — Cancunapuramanta maijancunataj shujlla ovejata charijpi, samana punllapi jutcuman huashicujpica ¿manachu llujshichinguichijman?

¹²Runacarin ovejata maihuan yallimari. Chashna cashcamantami, samana punlla cajpipish allita ruranataca mandashcaca mana jarcan — nircami.

¹³Shina nishpa Jesusca chai runataca: — Cambaj maquita chutai — nijpi chutajpica, caishuj maqui shinallataj alli tucurcallami.

¹⁴Fariseocuna chaimanta llujshishpaca Jesusta ima shina huañuchinatami yuyarinacurcacuna.

¹⁵Jesusca chashna huañuchisha nicujta yachashpami, chaimanta llujshishpa rirca. Achcacuna paita catishpa rijpi, tucuicunata alliyachishpaca,

¹⁶ñucamantaca pajta piman huillanguichijman nishpami mandarca.

¹⁷Profeta Isaías cashna nishca shinallatajmi chashna pajtarca. Isaiasca:

¹⁸“Paica ñucapajta rurajmi. Paitaca ñucami agllarcani. Paica ñuca c'uyashcami, paillami ñuca munashcata ruraj. Ñuca Espiritutaca, paipaj jahuapimi churasha. Paica cashcata rurashpa ñuca mandana cashcatami, mana israelcunaman huillanga.

¹⁹Paica mana p'iñanacungachu, caparirishcapish mana uyaringachu. Ñancunapi jatunta rimaricushcallatapish pi mana uyangachu.

²⁰P'aquirinalla carrizotapish, mana p'aquingachu. Huañunalla cushnicuj mechatapish, pai tucuita mishashpa mandana punllacama mana huañuchingachu.

²¹Mana israelcunapish tucuicunami paipi shunguta churangacuna” nishcami pajtarca.

²²Chai q'uipami Jesuspajmanca, supai japishca, mana ricuj, mana rimaj shuj runata pushamurcacuna. Chai mana ricuj, mana rimaj runaca, Jesús alliyachijpica ricurca, rimarcallami.

²³Chaita tucui ricujcunaca, jatunta mancharishpami: “¿Caica Davidpaj Churichu imashi?” ninacurcacuna.

²⁴Ashtahuanpish fariseocuna chaita uyashpaca: “Caica, supaicunata mandaj Beelzebú diablohuan cashpamari, supaicunataca llujshichin” nircacunami.

²⁵Jesusca paicuna ima shina yuyacujta yachashpami cashna nirca: “Maijan llajtapipish mandajcunapurallataj p'iñanacushpa chaupirijpica, paicuna mandacushcaca chingarinmanllami. Maijan pueblopi causajcunapish, huasi ucupi causajcunapurapish quiquinpurallataj p'iñanacujpica chingarinmanllami.

²⁶Satanasca, Satanasllatataj llujshichishpaca, pai mandacushcatami chingachinman.

²⁷Ñucataca Beelzebú diablohuan cashcamantami, supaicunataca llujshichicun ninguichijmi. Cancunapaj yachacujcunapish ¿pihuan cashpataj supaicunataca llujshichincunari? Supaicunata paicuna llujshichishpaca, ñucaca Taita Diosmanta cashcata, cancuna pandaricushcatami ricuchin.

²⁸Ashtahuanpish ñucaca, Taita Diospaj Espirituhuanmi supaicunataca llujshichini. Ñuca chashna rurashpaca, jahua pachamanta mandana cancunapajman ña chayamucushcatami ricuchini.

²⁹Maijanpish c'ari c'ari runapaj huasiman yaicushpa, imalla charishcacunata shuhuasha nishpaca, paita manaraj huatashpaca imata mana shuhuai tucunmanchu. Paita huatashpallami shuhuai tucun.

³⁰Maijanpish ñucahuan mana shujlla cajca, ñucata p'iñajmi. Maijanpish mana ñucahuan tucushpa tandachijca ñuca tandachisha nishcatapish urata janajta cachashpa chingachijmi.

³¹Chaimantami cancunamanca cashna nini: Tucui juchacunata, p'iñashpa c'amishcacunataca Taita Diosca perdonangami. Ashtahuanpish jucha illaj Espirituta p'iñashpa c'amishcataca, manataj perdonangachu.

³²Runa Aichayujta maijancuna imata rimashpa c'amishcataca perdonashcami canga. Ashtahuanpish jucha illaj Espirituta p'iñashpa c'amijtaca, cunan causaipipish, shamuj causaipipish manataj perdonangachu.

³³Alli yura cajpica, alli granomi p'ucun. Mana alli yura cajpica, mana alli granomi p'ucun. Ima yura cashcataca granota p'ucujpimi rijsinchij.

³⁴¡Culebrapaj huahua huahuacuna! Cancunallataj millai cashpaca ¿ima shinataj allitaca rimai tucunguichigari? Shungupi junda tiyashcatami shimica riman.

³⁵Alli runaca, imapish allicunallata paipaj shungupi huaquichishca cashpami, alli sumajcunallata llujshichin. Mana alli runaca imapish mana allicunallata paipaj shungupi huaquichishca cashpami mana alli millaicunallata llujshichin.

³⁶Chashna cajpipish: Gentecunaca maipish cachun rimashcacunataca, imalla rurashcata Taita Dios tapucui punllapimi imamanta chashna rimashcataca paicunallataj huillacungacuna.

³⁷Chai punllapica, cambaj shimi allita rimaj cashca cashpaca, alli nishcami cangui. Cambaj shimi mana allita rimaj cashca cashpaca, llaquichishcami cangui” nircami.

³⁸Chaipica Mandashcata quillcajcunapish, fariseocunapish maijancunaca Jesustaca: — Yachachij, shuj señaltami rurashpa ricuchichun ninchij — nijpimi,

³⁹Jesusca: — Huahua huahua millaita ruraj, huainayaj runacunaca, shuj señalta rurashpa ricuchichunmi mañancuna. Paicunamanca manataj ricuchishcachu canga. Ashtahuanpish profeta Jonás shina tucushcallatami ricungacuna.

⁴⁰Jonas, shuj jatun chalhuapaj huijsa ucupi quimsa punllata, quimsa tutata cashca shinallatajmi. Runa Aichayujpish, allpa ucupi quimsa punllata, quimsa tutata canga.

⁴¹Imalla rurashcata Taita Dios ricuchi punllapica, cunan cai punllapi causajcunataca Ninivepi causajcunami, mana allitamari rurashcanguichij ningapaj shamungacuna. Ninivepi causajcunaca Jonás huillajpimi, paicuna juchayuj cashcamanta Taita Diosman cutirircacuna. Caipica Jonastapish yallimari huillacun.

⁴²Imalla rurashcata Taita Dios ricuchi punllapica, ura llajtata jatun mandaj huarmipishmi, cunan cai punllapi causajcunataca mana allitamari rurashcanguichij ningapaj shamunga. Chai huarmica ñaupa mandaj Salomón yachaisapa cajpimi, pai yachachishcata uyangapaj caru llajtamanta shamurca. Riquichij, caipica Salomontapish yallimari yachachicun — nircami.

⁴³“Mapayachij espíritu runamanta llujshishpaca, shitashca pambacunatami samarinata mashcashpa purin.

⁴⁴Samarinata mana japishpaca: “Ñaupa ñuca causacushcallamantaj cutin tigrashalla” nishpami tigran. Ña tigrashpaca p'ichashca, allichishca, chushajlla huasi ucu shinatami chai runataca ricun.

⁴⁵Chashna cajta ricushpaca, paita yalli millai canchis supaicunata pushamushpami, chai runaman yaicushpa causancuna. Chaimantami chai runaca ñaupa ima shina cashcatapish yalli millai tucun. Cunan punllacunapi causacuj millaicunapish chashnallatajmi tucungacuna” nircami.

⁴⁶Chaipi cajcunaman Jesús huillacujpirajmi, paipaj mamapish, huauquicunapish paihuan rimangapaj canllapi shuyacurcacuna.

⁴⁷Chaimantami shujca: — Cambaj mama, cambaj huauquicunamari canhuan parlashun nishpa canllapi shuyacuncuna — nirca.

⁴⁸Jesús cutichishpaca: — ¿Pitaj ñuca mama, pitaj ñuca huauquicunaca? — nishpa,

⁴⁹paipaj yachacujcunata maquihuan ricuchishpami: — Caicunami ñuca mama, ñuca huauquicuna.

⁵⁰Maijanpish jahua pachapi caj ñuca Yayapaj munaita rurajcunami ñuca huauqui, ñuca pani, ñuca mamaca — nircami.