Read Chimborazo Highland Quichua MATEO 14 Bible Online

MATEO 14 - Chimborazo Highland Quichua bible

MATEO 14

¹Chai punllacunapimi Galileata mandaj Herodesca, Jesús imallata ruracushcata uyashpa,

²paipajta rurajcunataca: “Bautizaj Juanmari huañushcacunapaj chaupimanta causarishca canga. Chaimi pi mana rurai tucuipajta ruracunga” nircami.

³Herodesca paipaj huauqui Felipepaj huarmi Herodiashuanmi causacurca. Chai huarmi mandashcamantami, Juantaca cadenahuan huatashpa carcelpi churarca.

⁴Juanca Herodestaca: “Apanacushpa causanaca mana allichu” nishcami carca.

⁵Chaimi Herodesca Juantaca huañuchisha yuyacurca. Ashtahuanpish Juantaca israelcunaca profetami nijcuna cashcamantami, paicunata manchashcamanta mana huañuchi tucurca.

⁶Herodesca, pai huacharishca huatacuna pajtashca fiestatami ruracurca. Chaipimi Herodiaspaj ushushica, tucuicunapaj ñaupajpi tushushpa Herodesta cushichijpi,

⁷Herodesca can tucui ima mañashcata cushatajmi nirca.

⁸Paipaj mama yachachijpimi chai ushushica: “Bautizaj Juanpaj umata shuj platopi cunantaj cuhuai” nirca.

⁹Jatun mandajca llaquirishpami, chai mizapi paihuan cajcunapaj ñaupajpi imata mañashcata cushatajmi nishcamanta,

¹⁰Juanpaj umataca, carcelpi p'itimuchun cacharca.

¹¹Juanpaj umata platopi apamushpa, chai huambraman cujpi huambraca paipaj mamamanmi curca.

¹²Juanpaj yachacujcuna shamushpa, paipaj cuerpota japishpa pambashpaca Jesusmanmi huillagrircacuna.

¹³Juan huañushcata yachashpami Jesusca, chai llajtamantaca shuj barcopi shitashca pambaman pailla rirca. Chaita gentecuna yachashpaca, achcacunami pueblocunamanta llujshishpa chaquillahuan Jesuspajman rircacuna.

¹⁴Barcomanta Jesús llujshishpaca, achcacuna chaipi cajta ricushpami, paicunata llaquishpa ungushca cajcunataca alliyachirca.

¹⁵Ña chishiyamujpimi yachacujcuna Jesuspajman c'uchuyashpaca: — Caipica shitashca pamballami, ñamari yalli chishi. Cai muyundij uchilla llajtacunaman rishpa, micunapaj imallatapish randigrichij nishpa cayacama ni — nircacunami.

¹⁶Ashtahuanpish Jesusca: — Paicunaca imapaj mana rinachu can, cancunallataj caraichijlla — nijpimi,

¹⁷paicunaca: — Caipica imata mana charinchijchu. Pichca tandata, ishqui chalhuallatami charinchij — nijpi,

¹⁸Jesusca: — Caiman apamuichij — nirca.

¹⁹Chaipica, tucuicunatami bulluj jahuapi quinrilla siririchun mandarca. Pichca tandata, ishqui chalhuata japishpa huichilla ricushpa Diosta pagui nishpaca, chai tandataca chaupishpa yachacujcunaman cujpimi, paicunaca chai tucuicunaman cararcacuna.

²⁰Tucuicunami mana nijta micurcacuna. Puchushcacunatapish chunga ishqui canasta jundatami tandarcacuna.

²¹Chaipi micujcunaca huarmicunata, huahuacunata mana yupashcami, c'aricunalla pichca huaranga carcacuna.

²²Chai tucuicunaman carashcahuanmi Jesusca, paipaj yachacujcunataca barcopi yaicuchishpa cucha ch'imba lado uriman ñaupaichij nishpa cacharca. Chaicamaca paica, tucui chaipi cajcunatami cayacamachij nicurca.

²³Chai tucuicunata cayacamachij nishca q'uipaca, Taita Diosta pailla mañangapajmi urcuman huichiyarca. Ña tutayajpipish Jesusca paillami chaipiraj carca.

²⁴Chaicamaca barcohuanca ñami chaupi cuchata rirca. Achca huairahuan yacu jatarishpami jarcarca.

²⁵Ñalla pacarimugrijpica, Jesusca yacu jahuata purishpami, paicunapajman c'uchuyagrirca.

²⁶Yacu jahuata purishpa Jesús shamucujta yachacujcuna ricushpaca, achcata mancharishpami: — ¡Ayamari! — nishpa caparircacuna.

²⁷Ashtahuanpish Jesusca: — Ñucamari cani. ¡Ama mancharichijchu! — nircami.

²⁸Chaimi Pedroca: — Amito, cantaj cashpaca yacu jahuata cambajman shamuchun ñucata cayai — nirca.

²⁹Shina nijpi Jesusca: — Shamui — nijpi, Pedroca barcomanta llujshishpami, Jesuspajman cuchuyangapaj yacu jahuata puricurca.

³⁰Ashtahuanpish achca huaira yacuta cuyuchicujta ricushpami, mancharishpa yacupi ñalla millpurigrishpaca: — ¡Amito, quishpichihuai! — nishpa caparijpi,

³¹Jesusca, maquimanta japishpaca: — Ashallata crij runa ¿ima nishpataj caita chaita yuyacunguiyari? — nirca.

³²Paicuna barcoman huichiyajpica, huairaca casijlla tucurcallami.

³³Chaimantami barcopi cajcuna Jesuspajman c'uchuyashpaca: — Diospaj Churitajmi cangui — nishpa adorarcacuna.

³⁴Ña cuchata ch'imbashpaca, Genesaret llajtamanmi chayarcacuna.

³⁵Chaipi cajcunaca Jesús cashcata rijsishpaca, tucui chai muyundij llajtacunapi causajcunamanmi huillanacunata cachashpa yachaj chayachirca. Chaimi tucui ungushcacunata paipajman apamushpaca,

³⁶cambaj churana puntallapipish tuparichun saquihuai nircacuna. Jesuspaj churanapi tuparijcunaca tucuicunami alliyarcacuna.