Read Chimborazo Highland Quichua MATEO 15 Bible Online

MATEO 15 - Chimborazo Highland Quichua bible

MATEO 15

¹Chaipimi mandashcata quillcajcunapish, fariseocunapish Jerusalenmanta Jesuspajman shamushpaca:

²— Cambaj yachacujcunaca ¿ima nishpataj maquita mana maillashpa micuncuna? Chashna rurashpaca ñaupa yayacuna yachachishcacunatami p'aquincuna — nircacunami.

³Shina nijpi Jesusca: — ¿Ima nishpataj cancunapish, Dios mandashcata p'aquishpa, cancunapaj ñaupa yayacuna yachachishcacunallata caticunguichij?

⁴Taita Diosca cashna nishpami mandarca: “Cambaj yaya mamata alli ningui. Yaya mamata maijanpish llaqui tucushca canman nijtaca, huañuchishcataj cachun” nircami.

⁵Ashtahuanpish cancunaca paicunataca: “Cancunapaj yaya mamataca cancunaman ayudana cashcataca, Taita Diosmanmari ña tucuita cushcani cancunamanca ña mana imata cui tucunichu ninguichij nishpami yachachinguichij.

⁶Chashna nishpaca yaya mamata alli nishpa ayudanataj cashcatami” saquichinguichij. Cancunapaj yuyaimanta yachachinata chashna yachachishpami, Dios mandashcataca yangata ruranguichij.

⁷¡Mishqui shimi jayaj shungucuna! Profeta Isaiasca, allimi cancunamantaca cashna nishca:

⁸“Cai llajtapi causajcunaca, ñucataca shimillahuanmi allimari cangui nincuna. Ashtahuanpish paicunapaj shunguca ñucamanta carupimi.

⁹Ñucataca yangallami allimi cangui nij tucunguichij. Runacuna yachachishcallatami Dios mandashcami nishpa yachachinguichij” nishcami — nircami.

¹⁰Tucui chaipi cajcunata Jesús cayashpaca: — Uyaichij, entendichij:

¹¹Shimita yaicujca, runataca mana juchayujta ruranchu. Ashtahuanpish shimiman llujshijmi, runataca juchayujta ruran — nircami.

¹²Chashna nicujpi yachacujcuna c'uchuyashpaca: — Cai shimicunata nishcamanta fariseocuna p'iñaricujtaca ¿yachanguichu? — nircacunami.

¹³Ashtahuanpish Jesusca: — Maijan yurapish jahua pachapi caj ñuca Yaya mana tarpushca cajca, sapimanta llujshichishcami canga.

¹⁴Chaicunataca saquichijlla. Paicunaca mana ricujcuna. Mana ricujcunallatataj pushajcunami. Mana ricujllataj caishuj mana ricujta pushajca, ishquindijtajmi jutcupi urmangacuna — nircami.

¹⁵Chaimi Pedroca: — Cai yuyachij parlotaca, alli entendichipayari — nirca.

¹⁶Shina nijpi Jesusca: — ¿Cancunapish manarajchu entendinguichij?

¹⁷Tucui imapish shimita huijsaman yaicujca, mapa tucushpa llujshij cashcataca, ¿manachu entendinguichij?

¹⁸Ashtahuanpish shimiman llujshijca, shungumantami llujshin. Chaimi runataca juchayujta ruran.

¹⁹Huañuchina, huainayana, apanacushpa causana, shuhuana, llullashpa huillana, Diosta p'iñashpa c'amina, cai tucui millai yuyaicunaca shungumantami llujshin.

²⁰Tucui caicunami runataca juchayujta ruran. Ashtahuanpish maquita mana maillashpa micushcallamantaca, runaca mana juchayuj tucunchu — nircami.

²¹Chaimanta Jesús llujshishpaca, Tiro, Sidón llajtacunamanmi rirca.

²²Chai llajtamanta Cananea shuj huarmi llujshishpaca: — ¡Amito, Davidpaj Churi, ñucata llaquihuai! Ñuca ushushitami, supai japishpa yallitaj llaquichicun — nishpami caparirca.

²³Ashtahuanpish Jesusca, mana shimi llujshircachu. Chaimi paipaj yachacujcuna c'uchuyashpaca: — Tigrachishpa cachai — nijpi,

²⁴Jesusca: — Diosca ñucataca israelcunapajllamanmi cacharca. Paicunami ñucapajca chingarishca ovejacuna shina puricun — nircami.

²⁵Shina nicujpi chai huarmi c'uchuyashpaca Jesuspaj ñaupajpi cungurishpami: — ¡Amito, ayudahuai! — nijpi,

²⁶Jesusca: — Quiquin huahuacuna micucushcata quichushpa, allcucunamanraj caranaca mana allichu — nirca.

²⁷Chai huarmipish: — Ari, amito. Shina cajpipish amocuna micucushpa urmachishcataca allcucunapish micunllami — nirca.

²⁸Shina nijpi Jesusca: — ¡Huarmi, can crishcaca tucuita yalli jatunmi. Can ima shina munashca shina rurarichunlla! — nircami. Jesús chashna nincami paipaj ushushica alliyashcalla carca.

²⁹Jesusca chaimanta rishpa, Galilea cucha uriman chayashpaca, urcuman llujshishpami chaipi tiyarirca.

³⁰Jesús chaipi cajpica achcacunami, chulla chaqui illajcunata, mana ricujcunata, mana rimajcunata, chulla maqui illajcunata, shujtaj ungüihuan ungushcacunatapish pushamushpa, Jesuspaj ñaupajpi churajpi tucuicunata alliyachirca.

³¹Mana rimajcunapish rimarcami, chulla maqui illajcunapish alliyarcami, chulla chaqui illajcunapish purircami, mana ricujcunapish ricurcacunami. Tucui chaipi cajcunami mancharinacushpa, israelcunapaj Diosta jatunyachircacuna.

³²Jesusca paipaj yachacujcunata cayashpaca: — Caipi cajcunaca ñamari quimsa punllacunata ñucahuan caipi. Ima micunata mana charijpimi, paicunataca llaquinayan. Mana micushcata huasiman cachajpica, ñahui amsayashpa ñanpi urmanamantami paicunataca mana cachai tucuni — nijpimi,

³³paipaj yachacujcunaca: — ¿Maimantataj ñucanchijca cai shitashca pambapica, cai tucui achcacuna yaricaihuan cajcunaman carangapajca, achca tandacunataca japishun? — nircacunami.

³⁴Jesusca paicunataca: — ¿Mashna tandatataj charinguichij? — nijpi: — Canchis tandata, asha chalhuacunallatami charinchij — nircacuna.

³⁵Tucui chaipi cajcunata, pambapi quinrilla siririchunmi mandarca.

³⁶Chai canchis tandata, chalhuacunatapish japishpaca, Diosta pagui nishpami chaupishpa paipaj yachacujcunaman curca. Yachacujcunaca tucui chaipi cajcunamanmi cararcacuna.

³⁷Paicunaca tucuicunami mana nijta micurcacuna. Puchushca mirga mirgataca, canchis canasta jundatami tandarcacuna.

³⁸Chai micujcunaca huarmicunata, huahuacunata mana yupashcami, c'aricunalla chuscu huaranga carca.

³⁹Tucuicunata cayacamachij nishca q'uipaca, Jesusca barcoman yaicushpami, Magdala llajtaman rirca.