Read Chimborazo Highland Quichua MATEO 16 Bible Online

MATEO 16 - Chimborazo Highland Quichua bible

MATEO 16

¹Fariseocuna, saduceocuna chayamushpaca, Jesús imapi pandarijpica juchachingapaj nishpami, jahua pachamanta cashpaca milagrota rurashpa ricuchi nircacuna.

²Ashtahuanpish Jesusca cashnami nirca, cancunaca tutayacujpica: “Cieloca pucayashcamari: “Cayaca alli punllami canga” ninguichijmi.

³Tutamantaman cielo pucayashca p'uyu tapashca cajpica: “Cunanca tamyangami” ninguichijmi. ¡Mishqui shimi jayaj shungucuna! Cielo ima shina cajta ricushpa, punlla ima tucunataca yachanguichijmi. Ashtahuanpish cai milagrocunaca ima punllapi cashpa ruraricushcataca mana entendi tucunguichijchu.

⁴Huahua huahua millaita ruraj huainayajcunaca, shuj señalta rurashpa ricuchichunmi mañancuna. Paicunamanca manataj ricuchishcachu canga. Ashtahuanpish profeta Jonás shina tucushcallatami ricungacuna” nishpaca, paicunata saquishpa rircallami.

⁵Yachacujcunaca cucha ch'imba ladomanmi chayarcacuna. Ashtahuanpish tandata apanataca cungashcacunami carca.

⁶Jesusca: — Riquichij, fariseocunapaj, saduceocunapaj levaduramanta huaquichiringuichij — nircami.

⁷Yachacujcunaca: — Tandata mana apamushcamantami, chashna nin — nishpami paicunapura rimanacurcacuna.

⁸Chaita Jesús yachashpami: — Tandata mana apamushcanchijca nishpa ¿ima nishpataj cancunapura rimanacucunguichij? Ashallata crij runacuna.

⁹¿Manarajchu entendinguichij? Pichca tandamanta, pichca huaranga runacunaman ñuca carajpi, puchushcata mashna canasta jundata tandashcataca ¿manachu yuyaringuichij?

¹⁰Canchis tandamanta chuscu huaranga runacunaman ñuca carajpipish, puchushcataca mashna canasta jundata tandashcataca ¿manachu yuyaringuichij?

¹¹Fariseocunapaj, saduceocunapaj levaduramanta huaquichiringuichij nishpaca, tandata mana apamushcamantaca mana nircanichu. ¿Ima nishpataj manaraj entendinguichij? — nircami.

¹²Jesús chashna nijpimi, tandata ruranapaj levaduramanta mana rimacushcata, ashtahuanpish fariseocunapaj, saduceocunapaj yachachinata mana chasquina cashcata nicushcata entendircacuna.

¹³Filipo callarichishca Cesarea puebloman Jesús chayacushpami, paipaj yachacujcunataca: — Runa Aichayujtaca gentecunaca ¿pi cashcatataj yuyancuna? — nishpa tapurca.

¹⁴Paicunaca: — Shujcunaca, Bautizaj Juanmi. Caishujcunaca, Eliasmi. Chaishujcunaca Jeremiasmi, mana cashpaca ñaupa profetacunamanta maijantajshimari yuyachin nincunami — nircacunami.

¹⁵Jesusca paicunataca: — Cancunaca ñucataca ¿pi cashcatataj yuyanguichij? — nijpi,

¹⁶Simón Pedroca: — Canca causaj Diospaj Churi, Cristomari cangui — nirca.

¹⁷Shina nijpi Jesusca: — Jonaspaj churi Simón, chaitaca mana aichayuj, yahuaryuj runachu ricuchishca, ashtahuanpish jahua pachapi caj ñuca Yayami ricuchishca. Chaimanta cushichishcami cangui.

¹⁸Ñucapish cantaca Pedromi cangui ninimi. Cai rumi jahuapimi, tandanacushca crijcunataca shayachisha. Hadespaj pungucunapish mana mishai tucungachu.

¹⁹Canmanca, jahua pachamanta mandacunpaj llavecunatami cusha. Maijanta cai pachapi can huatajpica, jahua pachapipish huatashcami canga. Maijanta cai pachapi can cacharijpica, jahua pachapipish cacharishcami canga — nircami.

²⁰Chaipimi paipaj yachacujcunataca, Jesusca, Jesusmari Quishpichij Cristoca nishpa pajta piman ninguichijman nirca.

²¹Chashna nishca pachamantami Jesusca, paipaj yachacujcunamanca cashna nishpa huillai callarirca: “Jerusalenmanca rinatajmi cani. Chaipica ancianocunapaj, curacunata mandajcunapaj, mandashcacunata quillcajcunapaj maquipi achca llaquita apashpa huañunami cani. Quimsa punllapica causarishcami cana cani” nircami.

²²Jesús chashna nijpi Pedroca, paillata cayashpami: — Amito, ashtahuanpish can quiquinta llaqui. Chashna tucunataca Dios ama munachun — nishpami ama chashna yuyachun jarcasha nirca.

²³Ashtahuanpish Jesusca tigrarishcahuanmi Pedrotaca: — ¡Ñuca ñaupajmanta anchui, Satanás! Ñuca ñitcanami tucungui. Dios imata pajtachisha nicushcataca mana entendi tucunguichu. Ashtahuanpish runacunapaj yuyaillatami entendi tucungui — nircami.

²⁴Chaipimi Jesusca, paipaj yachacujcunataca cashna nirca: — Maijanpish ñucata catisha nijca, quiquin causaita ama llaquichun. Chacatashca shina llaquita apana tucushpa ñucata catichun.

²⁵Pipish quiquin causaita quishpichisha nijca, chingaringami. Pipish ñucata catishcamanta quiquin causaita chingachijca huiñai causaitami japinga.

²⁶Runaca cai pachapi tucui tiyajcunata japishpapish, paipaj almata chingachishpaca ¿ima allitaj cangari? Paipaj almata quishpichingapajca ¿imatashi cunga?

²⁷Runa Aichayujca, paipaj angelcunandij, paipaj Yayapaj achij nicuj sumaj cashcahuan shamushpaca, cada quiquinmanmi paicuna rurashca shinallataj cunga.

²⁸Runa Aichayuj tucushca mandangapaj shamucujta ricungacama, maijan caipi cajcunaca manaraj huañungacunachu. Chashnatajmi canga — nircami.