Read Chimborazo Highland Quichua MATEO 2 Bible Online

MATEO 2 - Chimborazo Highland Quichua bible

MATEO 2

¹Herodes mandacui punllacunapi Judeapi caj Belenpi Jesús huacharijpica, yachaj runacunami inti llujshinmanta Jerusalenman chayamushpaca,

²— Judiocunata mandangapaj huacharishca huahuaca ¿maipitaj canga? Pai huacharishcata ricuchij lucerotami inti llujshin ladopi ricurcanchij. Chaimi paita adorangapaj shamurcanchij — nishpa tapurcacuna.

³Chaita uyashpaca jatun mandaj Herodespish, Jerusalenpi tucui causajcunapish achcatami mancharircacuna.

⁴Chaimi Herodesca curacunata mandajcunata, mandashcacunata quillcajcunatapish tucuicunata tandachishpa, maipitaj Cristoca huacharina carca nishpa tapurca.

⁵Paicunaca: — Judeapi caj Belenpimi huacharinga ninmi. Profeta quillcashcapica:

⁶“Judapi caj Belenlla, canca jatun nishcami cangui. Judapi mandajcunapurapica, manataj uchillaca canguichu. Canmantami shuj pushaj llujshinga. Ñucapaj caj israelcunataca, paimi michinga” ninmi — nircacunami.

⁷Chaimi Herodesca, yachaj runacunata pacalla cayashpa, ima punllamanta lucerota ricushcata callarishpa allitaj tapushpaca,

⁸Belenman richij: — Chaiman chayashpaca huahua maipi cashcata alli callarishpa tapunguichij. Japishpaca huillaj shamunguichij, ñucapish adoragringapaj — nircami.

⁹Jatun mandaj chashna nishcata uyashpaca, paicunaca rircallacunami. Inti llujshinpi ricurishca lucerollatajmi paicunata ñaupashca rishpa chaipi chayashpaca, chai luceroca maipimi huahua carca chai jahuapi shayarirca.

¹⁰Chai lucerota ricushpaca, jatuntami cushicurcacuna.

¹¹Huasiman yaicushpaca, huahuataca paipaj mama Mariahuan cajta ricushpami, cungurishpa adorarcacuna. Paicuna cungapaj apamushcacunata pascashpami achca valij curitapish, inciensotapish, mirratapish curcacuna.

¹²Paicuna dormicujpi muscuipi ricurishpami: — Herodespajmanca ama tigranguichij — nishpa Taita Dios huillachishcamanta, paicunaca paicunapaj llajtamanca shujtaj ñanta tigrarcacuna.

¹³Yachaj runacuna rishca q'uipami, Jatun Diospaj shuj ángel muscuipi Joseman ricurishpaca: “Jatari, huahuata paipaj mamandij pushashpa Egiptopi miticugri. Ñuca canman cutin huillangacama chaipi saquiringuichij. Herodesca huahuata huañuchingapaj mashcangami” nirca.

¹⁴José rijcharishpaca, chai tutallataj huahuata, paipaj mamandij pushashpami Egiptoman rirca.

¹⁵Herodes huañungacamami chaipi carca. “Egiptomantami ñuca Churitaca cayarcani” nishpa, profetaman Jatun Dios huillachishca pajtachunmi chashna tucurca.

¹⁶Herodesca yachaj runacuna paita chanzata rurashcata yachashpaca yallitaj p'iñarishpami Belenpipish, chai muyundij llajtacunapipish, manaraj ishqui huatata charij tucui c'ari huahuacunata huañuchichun mandarca. Yachaj runacunata tapushca punllamanta yupashpami chashna rurarca.

¹⁷Chaica, profeta Jeremías cashna nishca shinallatajmi pajtarca. Paica:

¹⁸“Ramá pueblopica caparishcami uyaringa. Jatunta llaquirishpa jigyashpa huacashcami uyaringa. Raquelmi paipaj huahuacunamanta huacacun. Ama huacaichu nijpipish, paipaj huahuacuna huañushcamantami mana upallashpa huacacun nishcami canga” nircami.

¹⁹Herodes huañushca q'uipami, Jatun Diospaj shuj ángel Egiptopi, Joseman muscuipi ricurishpaca:

²⁰“Jatari, huahuata paipaj mamandij pushashpa Israelman tigrai. Huahuata huañuchishun nicujcunaca ñamari huañun” nirca.

²¹Shina nijpi José jatarishpaca, huahuata paipaj mamandij pushashpami Israelman tigrarca.

²²Judeapica Arquelaomi, paipaj yaya Herodespaj randi mandacun nijta uyashpami, chaiman tigranataca mancharca. Muscuipi Taita Dios huillashcamantami, Joseca Galileaman rishpa,

²³Nazaret pueblopi causarca. Quishpichijca Nazareno nishcami canga nishpa profetacuna huillashca pajtachunmi chashna pajtarca.