Read Chimborazo Highland Quichua MATEO 20 Bible Online

MATEO 20 - Chimborazo Highland Quichua bible

MATEO 20

¹Jahua pachamanta mandacunca, chagrayuj shuj runa paipaj chagrapi uvascunata pallachun mashcanaman utca llujshij shinami.

²Pallajcunahuanca shuj punlla trabajashcamantaca shuj denario cullquitami pagasha nishpa ari ninacushpaca paicunataca, paipaj uvas chagramanmi cacharca.

³Chagrayujca iscun horas tucucujpi cutin rishpaca, imata mana ruranata charijcuna plazapi tiyacujta ricushpami,

⁴paicunatapish: “Ñuca chagrapi uvascunata pallagrichij. Mashnata pagana cashcata pagashallami” nijpimi, paicunapish rircacuna.

⁵Cutin chaupi punllata, quimsa horas chishita rishpapish, chashnallatajmi rurarca.

⁶Shinallataj pichca horas chishita rishpapish, ima rurana illajllata ricushpami paicunatapish: “¿Ima nishpataj tucui punlla imata mana rurashpa cainacunguichij?” nirca.

⁷Chaimi paicunaca: “Imata rurachun pi mana cunchu” nijpi, chagrayujca: “Cancunapish ñuca uvas chagraman richij, cancuna japina cashcata cushallami” nishpa cacharca.

⁸Ña tutayajpimi, chagrayuj amoca paipaj mayordomota cayashpaca: “Pallajcunata cayai, tucuicunapaj q'uipa shamujcunamanta callarishpa, punta shamujcunacama pallashcamanta pagai” nirca.

⁹Pichca horas chishita pallai callarijcunaraj cayajpi shamushpaca, tucuicunami shuj denario, shuj denario chasquircacuna.

¹⁰Shinallataj tucui punlla pallajcuna chayashpaca, ñucanchijcarin yallitami chasquishun yuyarcacunami. Ashtahuanpish paicunapish tucuicunami shuj denario, shuj denariollatataj chasquircacuna.

¹¹Chasquishca q'uipaca, chagrayujhuan p'iñarishpami paitaca:

¹²“Pichca horas chishita shamujcunaca shuj horasllatami pallarcacuna. Ashtahuanpish ñucanchijca, rupaipimari tucui punlla llaquita aparcanchij. Chashna cajpipish paicunamanca, ñucanchijman shinallatajmi pagangui” nircacuna.

¹³Chaipimi chagrayujca, chashna nijcunapuramanta shujtaca: “Riqui, amigo. Cantaca mana imata llaquichicunichu. ¿Manachu shuj denariota cusha nijpica, ari nircangui?

¹⁴Can japina cashcata japishpa ri. Ashtahuanpish cambaj q'uipa shamujmanpish, canman shinallatajmi cusha nini.

¹⁵Ñucapaj cashcataca ¿manachu imatapish rurai tucuni? Ñuca alli cashpa chashna cushcamantaca ¿ima nishpataj p'iñaringui?” nircami.

¹⁶Shinallatajmi puntapi cajcunaca huashayachishca cangacuna, huashaman cajcunaca puntapimi cangacuna. Achcacunaca cayashcacunalla cashcamanta, ashtahuanpish agllashcacunaca ashacunalla cashcamantami — chashna tucunga nishpami parlarca.

¹⁷Jesusca, Jerusalenman rina ñanta huichiyacushpami, paipaj chunga ishqui yachacujcunallata cayashpa cashna nirca:

¹⁸“Cunanca Jerusalenmanmi huichiyacunchij. Chaipimi Runa Aichayujtaca, curacunata mandajcunaman, mandashcata quillcajcunaman cungacuna. Paicunaca huañunami cangui nishpa,

¹⁹mana israelcunaman cujpimi, chaicunaca chanzata rurangacuna, azotingacuna, chacatangacuna. Ashtahuanpish huañuchijpipish quimsa punllapica causaringallami” nircami.

²⁰Chaipica Zebedeopaj huarmimi, paipaj ishqui churicunandij imata cashpaca mañangapaj Jesuspajman c'uchuyashpa paipaj ñaupajpi cungurijpi.

²¹Jesusca: — ¿Imatataj ningui? — nijpi, chai huarmica: — Can mandacushpaca, ñuca cai ishqui churicunata shujtaca alli ladoman, caishujtaca lluqui ladoman tiyachingui — nirca.

²²Chaimi Jesusca: — Imata mañacushcatapish mana yachanguichijchu. ¿Ñuca ubyana cashca vasomantaca ubyai tucunguichijchari, ñuca imahuan bautizarishcapipish bautizari tucunguichijchari? — nijpi paicunaca: — Ari, chashna rurai tucunchijmi — nircacuna.

²³Chaimi Jesusca: — Ari, vasomantaca ñuca ubyashca shina ubyanguichijmi, ñuca imahuan bautizarishcapipish bautizaringuichijmi. Chashna cajpipish ñuca alli ladoman, lluqui ladoman maijanta tiyachinaca mana ñucapajchu. Chaitaca ñuca Yayami maijancunapaj allichishca cashpaca, chaipica tiyachinga — nircami.

²⁴Caishuj chunga yachacujcuna uyashpaca, chai ishqui huauquindijcunahuanmi p'iñarircacuna.

²⁵Chaimi Jesusca paicunata cayashpaca: — Llajtacunata mandajcunallami paicuna yuyashca shina madancuna. Paicunallami paicuna jatun tucushcahuan mandancuna. Chaitaca yachanguichijmi.

²⁶Ashtahuanpish cancunapurapica, mana chashnachu canga. Cancunapuramanta maijanpish puntapi casha nijca, cancunapajta rurajraj tucuchun.

²⁷Cancunapuramanta maijanpish puntapi casha nishpaca, cancunapajta rurajraj tucuchun.

²⁸Runa Aichayujca, servishca cangapajca mana shamurcachu. Ashtahuanpish servingapaj, paipaj causaita cushpa tucuicunata randishpa cacharichingapajmi shamurca. Puntapi casha nijca Runa aichayuj shinallataj cachun — nircami.

²⁹Jericomanta paicuna llujshishpa ricujpica, achcacunami catishpa rircacuna.

³⁰Paicuna chai ñanta ricujpica, mana ricuj ishqui runacunami ñan c'uchullapi tiyacurcacuna. Paicunami Jesús pasacun nijta uyashpaca: — ¡Amito, Davidpaj Churi, ñucanchijta llaquihuai! — nishpa caparircacuna.

³¹Chaimi chaipi cajcunaca, upalla caichij nishpa jarcarcacuna. Ashtahuanpish paicunaca: — ¡Amito, Davidpaj Churi ñucanchijta llaquihuai! — nishpami, ashtahuan caparircacuna.

³²Chaipi Jesús shayarishpa cayashpaca: — ¿Imatataj rurachun ninguichij? — nijpi,

³³paicunaca: — Amito, ñucanchij ñahuicunamari ricuj cachun ninchij — nircacuna.

³⁴Chaimi Jesusca paicunata llaquishpa, paicunapaj ñahuicunapi tuparijpi, paicunapaj ñahuicuna ricujpi, paita catircallacuna.