Read Chimborazo Highland Quichua MATEO 23 Bible Online

MATEO 23 - Chimborazo Highland Quichua bible

MATEO 23

¹Chaipimi Jesusca chaipi cajcunaman, paipaj yachacujcunamanpish cashna nishpa rimarca:

²“Mandashcacunata quillcajcuna, fariseocunapish Moisés tiyarishpa yachachij shinallatajmi pai yachachishcata yachachincuna.

³Chaimanta paicuna imallata yachachishcataca ama cungarishpa ruranguichij. Shina cashpapish paicuna rurashca shinataca, ama catinguichij. Paicunaca allita yachachishpapish, paicuna yachachishca shinaca mana rurancunachu.

⁴Paicunaca pi mana apai tucuipaj jatun quipitami gentecunamanca apachincuna. Ashtahuanpish paicunaca shuj dedollahuanpish mana tuparincunachu.

⁵Paicunaca tucui imata rurashpapish, gentecuna ricuchunllami rurancuna. Paicunaca Dios mandashca maijan shimicunata quillcashcata frentepipish, maquipipish tucuicuna ricuchun huatarishpa purinatami munancuna. Churanatapish shujtajcunata yalli suni flecosyuj churanata churashpa purinatami munancuna.

⁶Ima jatun micuicunapipish, sinagogacunapipish puntapi tiyarinatami munancuna.

⁷Plazacunapi tupajcunapish, allillachu cangui nishpa: “Yachachij, yachachij” nichunpishmi munancuna.

⁸Ashtahuanpish cancunaca: “Yachachij” nichunca, ama munanguichij. Cancunata Yachachijca shujllami tiyan, paica Cristomi. Cancunaca tucuicunami huauquindijcuna canguichij.

⁹Cai pachapica, cancunaca pitapish ama yaya ninguichij. Cancunapaj Yayaca shujllami tiyan, paica jahua pachapimi.

¹⁰Yachachijcuna nichunpish, ama munanguichij. Cancunata Yachachijca shujllami tiyan, paica Cristomi.

¹¹Cancunapurapi maijanpish jatun cajca, cancunapajta ruraj cachun.

¹²Maijanpish jatun tucujtaca, pingachishcami canga. Mana jatun tucujtaca, jatunyachishcami canga.

¹³Mandashcacunata quillcajcuna, fariseocuna, mishqui shimi jayaj shungucuna, ¡aij cancunalla! Jahua pachamanta mandacunman gentecuna yaicunatami jarcanguichij. Cancunapish mana yaicunguichijchu, yaicucujcunatapish mana yaicujta saquinguichijchu.

¹⁴Mandashcacunata quillcajcuna, fariseocuna, mishqui shimi jayaj shungucuna ¡aij cancunalla! Viudacunapaj huasicunata quichushpa millpujcunami canguichij. Chashna rurashcamanta alli ricuringa raicullami Diostaca unita mañaj tucunguichij. Chashna rurashcamantaca jatunta llaquichishcami canguichij.

¹⁵Mandashcacunata quillcajcuna, fariseocuna, mishqui shimi jayaj shungucuna ¡aij cancunalla! Shujllapish cancuna yachachishcata catichun nishpami, allpata mama cuchata maita rishpapish yachachinguichij. Ña cancunata catijpica, ucu pachaman rinapajlla ishqui cutinhuan cancunata yalli millaicuna cachunmi yachachinguichij.

¹⁶Cancunaca ñahui mana ricuj pushajcunami canguichij. ¡Aij cancunalla! “Imata rurangapaj Diosta adorana huasipaj shutipi ari nishpaca, mana pajtachingapajpish rimanallami ninguichijmi. Imata rurangapaj Diosta adorana huasipi tiyaj curipaj shutipi ari nishpaca pajtachinatajmi” nishpami yachachinguichij.

¹⁷¡Yuyai illajcuna, mana ricujcuna! Curichu mana cashpaca, curita Diospajllata ruraj Diospaj huasichu ¿maijantaj ashtahuan yalli alli?

¹⁸Cancunaca: “Imata rurangapaj altarpaj shutipi ari nishpaca, mana pajtachingapajpish rimanallami ninguichijmi. Ashtahuanpish altar jahuapi caj ofrendapaj shutipi ari nishpaca, pajtachinatajmi” nishpami yachachinguichij.

¹⁹¡Yuyai illajcuna, mana ricujcuna! ¿Ofrendachu, mana cashpaca ofrendata Diospajllata ruraj altarchu, maijantaj ashtahuan yalli alli?

²⁰Imata rurangapaj altarpaj shutipi ari nishpaca, Diosman imallata cushca altar jahuapi tiyacujtapishmi rimanguichij.

²¹Shinallataj imata rurangapaj Diospaj huasipaj shutipi ari nishpaca, chai huasitapish, chai huasipi causaj Diostapishmari riman.

²²Imata rurangapaj jahua pachapaj shutipi ari nishpaca, Diospaj jatun tiyarinata, chaipi tiyacuj Diostapishmi riman.

²³Mandashcacunata quillcajcuna, fariseocuna, mishqui shimi jayaj shungucuna ¡aij cancunalla! Mentata, anista, cominotapish chungamanta shujta cujcunami canguichij. Ashtahuanpish cashcata ruranata, llaquij canata, crinatapish, chai ashtahuan alli Mandashcatarajmari saquishcanguichij. Diosman cunatapish mana saquishpami, chai Mandashcacunataraj rurana carcanguichij.

²⁴¡Mana ricuj pushajcuna, chuspitaca anchuchishpami ubyanguichij. Ashtahuanpish camellondijca millpunguichijllami!

²⁵Mandashcacunata quillcajcuna, fariseocuna, mishqui shimi jayaj shungucuna ¡aij cancunalla! Vasotapish, platotapish jahuallatami maillanguichij. Ashtahuanpish ucu shunguca shuhuana yuyaihuan, imatapish mana allita rurana yuyaihuan jundami canguichij.

²⁶¡Ñahui mana ricuj fariseo! Jahuapish ucupish chuya cachunca vasotapish, platotapish ucutaraj maillayari.

²⁷Mandashcacunata quillcajcuna, fariseocuna, mishqui shimi jayaj shungucuna ¡aij cancunalla! Bovedacunata yurajyachishca shinami canguichij. Canllata ricujpica sumajmi, ashtahuanpish ucumanca huañushcacunapaj tullucuna, tucui mapacunapish jundami.

²⁸Shinallatajmi cancunapish canllata ricujpica, cashcata rurajcuna shina shujtajcunapica ricuringuichij. Ashtahuanpish ucu shunguca jayacuj, millaita ruranahuan jundami canguichij.

²⁹Mandashcacunata quillcajcuna, fariseocuna, mishqui shimi jayaj shungucuna ¡aij cancunalla! Ñaupa profetacunata pambashca jahuapi pircashpa sumajyachijcuna, cashcata rurajcuna huañushcata churashca bovedacunatapish sumajyachijcunami canguichij.

³⁰Chashna rurashpaca: “Ñucanchij yayacuna causai punllacuna causashca cashpaca, chai profetacunata huañuchichunca mana saquinchijmanchu carca” ninguichijmi.

³¹Cancuna chashna nishpaca, profetacunata huañuchijcunapaj huahuacuna cashcatami huillanguichij.

³²¡Cancunapaj yayacuna callarichishcataca tucuringacama rurashpa catichijlla!

³³¡Culebra shina millaicuna, cancunaca culebracuna causanami canguichij! Cancunaca ucu pacha llaquiman rinamantaca mana quishpiri tucunguichijchu.

³⁴Ñucaca profetacunata, yachaisapacunata, Mandashcacunata quillcajcunatapish cancunapajman cachashami. Chai cachashcacunataca maijancunataca huañuchinguichijmi, maijancunataca chacatanguichijmi. Shinallataj shujcunataca, cancunapaj sinagogacunapi azotinguichijmi, maijancunataca pueblon pueblon catirashpami llaquichinguichij.

³⁵Chaimantaca, cashcata rurashpa causaj ñaupa gentecunata huañuchishca yahuarmanta llaquitaca, cancunami apanguichij. Cashcata ruraj Abelmanta callarishpa, Berequiaspaj churi Zacariastapish huañuchishcacamami, chai llaquitaca apana canguichij. Diospaj huasihuan, altarhuan chaupipimi Zacariastaca huañuchircanguichij.

³⁶Chai tucui mana allita rurashcamantaca, cunan punlla causajcunatami jatun llaquicunaca japinga. Chashnatajmi canga.

³⁷¡Jerusalenpi causajcunalla, Jerusalenpi causajcunalla cancunaca profetacunata huañuchijcuna, Dios cachashca huillajcunata rumihuan shitajcunapishmi canguichij! ¡Tauca cutinmi mama atillpa paipaj huahuacunata alas ucupi ugllaj shina tandachisha nircani! Ashtahuanpish mana uyarcanguichijchu.

³⁸Chaimantami cancunapaj huasica shitashca saquiringa.

³⁹Ñucataca cunanmanta pachami: “¡Jatun Diospaj shutipi shamucuj allimari cangui!” ningacama manataj ricunguichij” nircami.