Read Chimborazo Highland Quichua MATEO 25 Bible Online

MATEO 25 - Chimborazo Highland Quichua bible

MATEO 25

¹Jahua pachamanta mandanaman shamujpica chunga solteracuna paicunapaj lamparacunata japishpa, cazaracuj noviota tupanaman llujshijcuna shinami canga.

²Chaicunamanta pichcaca alli yuyaiyujmi, pichcaca yuyai illajmi carca.

³Yuyai illajcunaca lamparacunata apashpapish, aceitetaca mana aparcacunachu.

⁴Alli yuyaiyujcunaca lamparatapish aceite apanapi aceitetapish aparcacunami.

⁵Novio mana utca shamujpica, dormi atijpimi tucuicuna dormircacuna.

⁶Chaupi tutapica ñapish: “¡Ñami novioca shamun, tupanaman llujshichij!” nishpa caparishcami uyarirca.

⁷Chaimi chunga solteracunaca tucuicuna jatarishpa, paicunapaj lamparacunata allichircacuna.

⁸Chaipica yuyai illaj pichca solteracunaca, alli yuyaiyujcunataca: “Ñucanchij lamparacunami huañugrin, ashalla aceiteta cuhuaichij” nircacunami.

⁹Ashtahuanpish alli yuyaiyuj pichca solteracunaca: “Ñucanchijpajpish, cancunapajpish ama illachun, c'atujcunapajman rishpa, cancunapajtaj cachun randigrichij” nircacunami.

¹⁰Paicuna randinaman ringacamaca novio ña chayamujpica allichirishcacunaca noviohuan bodata rurana huasiman yaicujpimi, pungutaca huichcarca.

¹¹Chai q'uipa, caishuj pichca solteracunapish chayamushpaca: “¡Amito, amito, punguta pascapai!” nircacuna.

¹²Ashtahuanpish novioca: “Cancunataca manataj rijsinichu, pipishchari canguichij” nircami. Chashnatajmi canga.

¹³Ima punlla, ima hora Runa Aichayuj shamunata mana yachashcamanta, chaparacuichij.

¹⁴Jahua pachamanta mandacunca, shuj runa caru llajtaman ricushpa, paipajta rurajcunata cayashpa, paipaj charishcacunata mingaj shinami.

¹⁵Shujmanca pichca talento cullquita, caishujmanca ishqui talento cullquita, chaishujmanca shuj talento cullquitami saquirca. Chaitaca paicuna imallata rurai tucuna shinaman saquishpami, caru llajtaman rirca.

¹⁶Pichca talentocunata chasquijca randishpa, c'atushpami shujtaj pichca talentohuan mirachirca.

¹⁷Ishqui talentota chasquijpish, shujtaj ishqui talentohuanmi mirachirca.

¹⁸Ashtahuanpish shuj talentota chasquijca, paipaj amopaj talentotaca pambata jutcushpami pacarca.

¹⁹Tauca huatacuna q'uipami chai amoca paipajta rurajcunapajman tigramurca. Chaipica pai saquishca talentocunata mashnata mirachishcata tapungapajmi paipajta rurajcunataca cayarca.

²⁰Pichca talentota chasquij c'uchuyashpaca, mirachishca pichca talentondij apamushpami: “Amito, pichca talentotami mingarcangui. Shujtaj pichca talentohuanmi mirachircani, caillahuan japipai” nijpi,

²¹paipaj amoca: “Allimi rurashcangui, canca allita ruraj, alli cazujmi cangui. Cai ashalla talentohuanpish allita rurashcamanta, ashtahuan yallitami mingasha. Cambaj amohuan cushicunaman yaicui” nircami.

²²Ishqui talentota chasquijpish c'uchuyashpaca: “Amito, ishqui talentotami mingarcangui. Shujtaj ishqui talentohuanmi mirachircani, caillahuan japipai” nijpi,

²³paipaj amoca: “Allimi rurashcangui, canca allita ruraj, alli cazujmi cangui. Cai ashalla talentohuanpish allita rurashcamanta, ashtahuan yallitami mingasha. Cambaj amohuan cushicunaman yaicui” nirca.

²⁴Ashtahuanpish shuj talentota chasquijpish c'uchuyashpaca: “Amito, canca mana tarpushpapish japij, mana chagrashpapish tandaj, p'iñarijlla cashcatami yacharcani.

²⁵Chaimantami manchashpa, cambaj talentotaca allpapi pacanaman rircani. Cambaj cashcaca, caipimi japipai” nircami.

²⁶Chaimi paipaj amoca: “Canca millai, q'uilla servijmi cangui. Mana tarpushpapish japij, mana chagrashpapish tandaj cashcataca ñucataca yachashcanguimi.

²⁷Chaimanta ñuca talentotaca bancopi churanguiman carcaca. Ñuca shamushpaca huahua cullquihuanmi japiman carcani” nircami.

²⁸Chai talentota quichushpa, chunga talentota charijman cuichij.

²⁹Charijmanca ashtahuan cujpi, ashtahuanmi charinga. Ashtahuanpish mana charijtaca, pai ashalla charishcatapish quichushcami canga.

³⁰Chai mana valij servijtaca, canlla amsaman llujshichishpa shitaichij. Chaipica jatunta huacana, quirucuna canirinapishmi canga.

³¹Runa Aichayuj tucuita rurai tucushcahuan mandangapaj shamushpaca, jucha illaj tucui paipaj angelcunandijmi shamunga. Chashna shamushpaca, sumaj achijnicuj tiyarinapimi tiyaringa.

³²Chaimantaca tucui mama llajtacunamantami, paipaj ñaupajpi tandanacunga. Chaipica chivocunamanta ovejacunata michij ch'icanchij shinami allicunataca millaicunamanta ch'icanchinga.

³³Ovejacunataca paipaj alli ladoman, chivocunataca paipaj lluqui ladomanmi churanga.

³⁴Chaipimi jatun Mandajca, paipaj alli ladoman cajcunataca cashna ninga: “Ñuca Yaya alli nishcacuna, cancuna mandana cashcata shamuichij japinguichij. Chashna mandanataca cai pacha callarimanta pachami ña allichishca.

³⁵Cancunaca ñuca yaricaihuan cajpipish, cararcanguichijmi. Ñuca yacunaihuan cajpipish, yacuta curcanguichijmi. Shujtaj llajtamanta shamushpa ñuca puricujpipish, chasquircanguichijmi.

³⁶Churana illajlla ñuca cajpipish, churachircanguichijmi. Ungushca cajpipish, carcelpi tiyacujpipish ñucataca ricuj shamurcanguichijmi” ningami.

³⁷Chaipica cashcata rurajcunaca, paitaca: “Amito, ¿maipitaj can yaricaihuan puricujta ricushpa cararcanchij? ¿Maipitaj can yacunaihuan cajpi yacuta curcanchij?

³⁸¿Maipitaj cantaca, shujtaj llajtamanta shamushpa puricujta ricushpa chasquircanchij? ¿Maipitaj churana illaj cajta ricushpa, churachircanchij?

³⁹¿Maipitaj ungushca cajpi, carcelpi cajpipish ricugrircanchij?” ningacunami.

⁴⁰Chaipica jatun Mandajpish: “Tucuimanta yalli uchilla ñuca huauquicunapaj ima allita rurashpaca, ñucapajmari rurarcanguichij” ningami. Chashnatajmi canga.

⁴¹Chai q'uipaca, lluqui ladoman cajcunatapish: “Ñuca ñaupajmanta anchuichij llaquiman rinapaj cajcuna. Cancunaca, diablopaj paipaj angelcunapajpish allichishca huiñaita rupacuj ninaman richij.

⁴²Cancunaca ñuca yaricaihuan cajpipish, mana cararcanguichijchu. Ñuca yacunaihuan cajpipish, mana curcanguichijchu.

⁴³Shujtaj llajtamanta shamushpa ñuca puricujpipish, mana chasquircanguichijchu. Churana illajlla ñuca cajpipish, mana churachircanguichijchu. Ungushca cajpipish, carcelpi tiyacujpipish ñucataca mana ricuj shamurcanguichijchu” ningami.

⁴⁴Chaipimi paicunapish: “Amito, ¿maipitaj yaricaihuan, yacunaihuan, shujtaj llajtamanta shamushpa puricujpi, churana illajlla, ungushca, mana cashpaca carcelpi cajta ricushpapish mana servircanchigari?” nishpami cutichingacuna.

⁴⁵Chaimi paicunataca: “Tucuimanta yalli cai uchillacunapaj ima allita mana rurashpaca, ñucapajmari mana rurarcanguichij” ninga. Chashnatajmi canga.

⁴⁶Chashnacunaca, huiñaipaj llaquimanmi ringacuna. Shinallataj cashcata rurajcunaca, huiñai causaimanmi ringacuna — nircami.