Read Chimborazo Highland Quichua MATEO 27 Bible Online

MATEO 27 - Chimborazo Highland Quichua bible

MATEO 27

¹Ña pacarijpimi, curacunata mandajcunapish, israelcunapaj cunaj yuyajcunapish tucuicuna Jesusta huañuchingapaj, shuj yuyailla tucurcacuna.

²Jesustaca huatashcatami, mandaj Poncio Pilatopajman pusharcacuna.

³Jesusta huañuchichun entregaj Judasca, Jesustaca ña huañuchinapaj cajta ricushpami, achcata llaquirishpa pai chasquishca quimsa chunga cullquitaca curacunata mandajcunaman, cunaj yuyajcunaman,

⁴cashna nishpa tigrachigrirca: — Ima millaita mana ruraj runata huañuchichun entregashpaca ñucaca juchallishcanimari — nijpi, paicunaca: — ¿Ñucanchijpajca imataj cangapish? ¡Chaitaca can ricui! — nijpimi,

⁵Diospaj huasi ucupi cullquita shitashpa rishpa, sipi tucurca.

⁶Curacunata mandajcuna chai shitashca cullquita japishpaca: — Huañuchichun entregajman pagashca cashcamanta, cai cullquitaca Diosman cushca cullquita huaquichinapica mana churanallachu — nircacunami.

⁷Paicuna yuyarinacushpaca, shujtaj llajtamanta cajcunata pambangapajmi, chai cullquihuanca mangata rurajpaj allpata randircacuna.

⁸Chaimi chai allpaca, cunan punllacama “Yahuar Allpa” shuti.

⁹Chashnami profeta Jeremías cashna nishcaca pajtarca: “Chai quimsa chunga cullquitaca japircacunami. Israelcuna shuj runa mashna valishcata churashcatami chai runamantaca pagarca.

¹⁰Jatun Dios ñucata mandashca shinallatajmi, chai cullquihuanca allpamanta imatapish rurajpaj allpata randircacuna” nircami.

¹¹Mandaj Pilatopaj ñaupajpi Jesús shayacujpimi, Pilatoca Jesustaca: — ¿Canca, judiocunata jatun mandajchu cangui? — nijpi, Jesusca: — Ari, canllataj ña chashna ninguica — nirca.

¹²Curacunata mandajcuna, cunaj yuyajcuna juchachicujpipish, Jesusca imata mana cutichijpimi,

¹³Pilatoca: — Canta cai tucuita juchachishpa rimashcataca ¿manachu uyangui? — nirca.

¹⁴Ashtahuanpish Jesusca, imata mana rimajpimi chai mandajca achcata mancharirca.

¹⁵Chai llajtata mandajca, Pascua fiesta punllapica maijanta prezumanta shujta cacharichun nijpica, gentecuna munashcatami cacharij carca.

¹⁶Chaipica, tucuicuna rijsishca yallitaj millai Barrabás shuti runatami prezu charicurcacuna.

¹⁷Chaipi tandanacushca cajcunatami, Pilatoca: — Cancunaca: Barrabastachu, Cristo nishca Jesustachu ¿maijantataj cacharichun ninguichij? — nishpa tapurca.

¹⁸Jesustaca envidiallamanta huañuchichun nicushcata yachashpami Pilatoca chashna tapurca.

¹⁹Mandanapi tiyarishpa Pilato tapucujpimi, paipaj huarmica: “Chai cashcata ruraj runataca, ñataj imata ruranguiman. Cunan tuta muscuipica, paimantaca achca llaquitami aparcani” nishpami, huillaj cacharca.

²⁰Curacunata mandajcunapish, cunaj yuyajcunapish, Barrabasta cacharichun, Jesustaca huañuchichun mañaichij nishpami, chaipi cajcunataca yachachicurcacuna.

²¹Chai mandajca: — Cai ishqui runacunamantaca ¿maijantataj cacharichun ninguichij? — nijpi, paicunaca: — Barrabastami cacharichun ninchij — nircacunami.

²²Chaimi Pilatoca: — ¿Imatataj Jesús shuti Cristomi nishca runataca rurasha? — nishpa tapujpi tucui paicunaca: — ¡Chacatachun ninchijmi! — nircacuna.

²³Chai mandajca: — ¿Ima mana allitataj rurashca? — nijpi, paicunaca: — ¡Chacatachun ninchijmi! — nishpami, ashtahuan caparircacuna.

²⁴Tucuicuna imata mana uyashun nishpa, ashtahuan caparicujta ricushpami Pilatoca yacuta japishpa tucuicunapaj ñaupajpi maquita maillashpaca: — Cai cashcata ruraj runata huañuchijpi paipaj yahuarmantaca, ñucaca ima juchachinayuj mana canichu. ¡Cancunapaj jahuami canga! — nircami.

²⁵Tucui chaipi cajcunaca: — Paita huañuchishcamanta yahuarca ñucanchijpaj, ñucanchij huahuacunapaj jahuami canga — nircacuna.

²⁶Chaimi Pilatoca, Barrabasta cacharishpa, Jesustaca achcata azotishcata chacatachun curca.

²⁷Mandaj Pilatopaj soldadocuna, pilatopaj mandana huasi canllaman Jesusta pushashpaca, chaipi caj tucui soldadocunatami Jesuspaj muyundijpi churarca.

²⁸Chaipimi soldadocunaca Jesuspaj churanacunata tucui llujshichishpa, amsa puca capata p'achallichircacuna.

²⁹Paipaj umapica, cashamanta ahuashca coronata churachishpa, alli maquipica carrizota aisachishpa, paipaj ñaupajpi cungurishpami: — ¡Viva judiocunapaj jatun mandaj! — nij tucushpa chanzata rurarcacuna.

³⁰Paicunaca ch'ucashpami, chai carrizollatataj quichushpa umapi garrotircacuna.

³¹Chai q'uipaca, p'achallichishca capata anchuchishpami, paipaj churanallatataj cutin churachishpa, chacatanaman pusharcacuna.

³²Ña llujshishpa ricushpaca, Cirenemanta Simón shuti runahuan ñanpi tupashpami, paitaca soldadocunaca macasha nishpa cai cruzta apari nishpa apachishpa,

³³Gólgota shuti urcumanmi chayarcacuna: (Gólgota nishcaca: “Uma Tullu” nisha ninmi).

³⁴Chai urcupimi Jesusmanca, hielhuan chagrushca vinagreta ubyachishun nircacuna. Ashtahuanpish probashpaca mana ubyasha nircachu.

³⁵Jesusta chacatashpaca paipaj churanacunataca sorteashpami, soldadocunaca chaupircacuna. Profeta huillashca shinallataj: “Ñuca churanataca sorteashpami, paicunapura chaupircacuna” nishca pajtachunmi chaica tucurca.

³⁶Soldadocunaca Jesusta cuidashpami, chaipi tiyacurcacuna.

³⁷Paita chacatashca cruz jahuanijpica, imamanta huañuchishcata huillaj quillcatami churarcacuna. Chaipica: “Caica, judiocunapaj jatun Mandaj Jesusmi” nishpa quillcashcami carca.

³⁸Jesustaca ishqui shuhuacunandijmi chacatarcacuna. Shujtaca alli ladoman, caishujtaca lluqui ladomanmi churarcacuna.

³⁹Chaipi puricujcunaca paicunapaj umata cuyuchishpami,

⁴⁰cashna nishpa c'amircacuna. “Canca: Diospaj huasita urmachishpa, quimsa punllapi cutin shayachishami nircanguica. Canllataj quishpiriyari. Diospaj Churitaj cashpaca, cruzmanta uricuiyari” nircacunami.

⁴¹Chai shinallatajmi curacunata mandajcunapish, mandashcacunata quillcajcunapish, fariseocunapish, cunaj yuyajcunapish Jesustaca, chanzata rurashpa:

⁴²“Shujtajcunataca quishpichircami, ashtahuanpish paillatajca manamari quishpiri tucunchu. Israelcunapaj jatun Mandaj cashpaca, cruzmanta cunanllataj uriyachun. Chaipitajca paita crishunmi.

⁴³Paica: Diospaj Churimi cani nishpamari, Diospi shunguta churashpa puricurca. Paita Dios llaquishpaca, cunanllataj quishpichinmanmari” ninacurcacunami.

⁴⁴Jesushuan chacatashca ishqui shuhuacunapish chashnallatajmi c'amircacuna.

⁴⁵Chaupi punllamanta, quimsa horas chishicamami tucui cai pacha amsayarca.

⁴⁶Chai horasllatajmi Jesusca: “Elí, Elí, ¿lama sabactani?” nishpa, sinchita caparirca. (Chaica: “Ñuca Dioslla, ñuca Dioslla, ¿ima nishpataj ñucallata saquihuanguiyari?” nisha ninmi).

⁴⁷Chaipi cajcunamanta maijancuna chaita uyashpaca: — Caica Eliastami cayacun — nircacunami.

⁴⁸Chaita uyashpaca chaipi cajcunamanta shujmi, callpashpa rishcahuan shuj esponjata japishpa, vinagrepi satishpa carrizo puntapi churashpa Jesusman ubyachisha nirca.

⁴⁹Ashtahuanpish caishujcunaca: — Saqui, Eliasca quishpichinaman shamunchu imamí — nircacunami.

⁵⁰Jesusca cutin sinchita caparishpaca, paipaj espirituta Diosman mingarcallami.

⁵¹Chaipica, Diospaj huasi ucupi jarcachishca linsoca, jahuamanta urimanmi chaupita lliquirirca. Allpapish chujchurcami, jatun rumicunapish chaupirircami.

⁵²Pambashca jutcu pungucuna pascarijpi, Dios agllashca huañushcacunapaj cuerpocunapish, achcacunami causarirca.

⁵³Chaicunaca, Jesús causarishca q'uipami, jutcucunamanta llujshishpa Dios agllashca Jerusalenman yaicurcacuna. Paicunaca achcacunamanmi ricurircacuna.

⁵⁴Patsaj soldadocunata mandaj, paihuan Jesusta cuidacuj soldadocunapish jatunta allpa chujchujta, tucui imalla tucujtapish ricushpaca, achcata mancharinacushpami: “Caica Diospaj Churitajmari cashca” nircacuna.

⁵⁵Jesusta chacatacujtaca achca huarmicunami carullamanta ricucurcacuna. Paicunaca Galileamantami Jesuspajta rurashpa shamushca carca.

⁵⁶Chai huarmicunapurapica Magdalamanta María, Jacobopaj Josepajpish mama María, Zebedeopaj churicunapaj mamapishmi carca.

⁵⁷Ña tutayacujpimi Arimateamanta José shuti achcata charij shuj runa shamurca. Paipish Jesusta catijmi cashca carca.

⁵⁸Pai Pilatopajman rishpa, Jesuspaj cuerpota pambangapaj mañajpimi Pilatoca, Jesuspaj cuerpota paiman cuchun mandarca.

⁵⁹Joseca, Jesuspaj cuerpota japishpaca shuj mushuj linsohuan pilluchishpami,

⁶⁰paita pambanapaj sinchi q'uillinpi quinriman jutcushca mushuj jutcupimi Jesuspaj cuerpotaca churarca. Jatun rumita jutcu punguman singuchishpa huichcashpaca rircallami.

⁶¹Chai jutcu ñaupajpica, Magdalamanta Mariapish, caishuj Mariapishmi tiyacurcacuna.

⁶²Allichirishca cayandij punllaca, curacunata mandajcuna, fariseocunapish Pilatopajman rishpami,

⁶³cashnami nircacuna: — Mandaj, chai llulla runa causacushpaca: “Quimsa punllacuna q'uipaca causarishallami” nishcatami yuyarinchij.

⁶⁴Chaimanta, quimsa punllacama chai jutcuta soldadocuna alli cuidachun cachapai. Ñataj tuta rishpa paipaj yachacujcuna shuhuashpaca: “Huañushcacunapaj chaupimanta causarircami” nincunaman. Chashna rurajpica, pai sarunman llullacushcatapish yalli tucunman — nircacunami.

⁶⁵Chaimi Pilatoca: — Shinashpaca cai soldadocunata pushashpa, cancuna munashca shina allichigrichij — nijpi,

⁶⁶paicuna rishpaca, jutcu punguta alli allichishpa, rumihuan huichcashpami sellashpa churashpa, chai soldadocunataca cuidachun churarcacuna.