Read Chimborazo Highland Quichua MATEO 28 Bible Online

MATEO 28 - Chimborazo Highland Quichua bible

MATEO 28

¹Samana punlla cayandij, semana callari punlla pacarigrijpimi, Magdalamanta María, caishuj Mariapish pambashca jutcuta ricugrircacuna.

²Chaipica ñapish allpaca jatunta chujchurcallami. Jatun Diospaj shuj angelpishmi jahua pachamanta uriyamurca. Paica utcuman c'uchuyashpami rumita anchuchishpa, chai jahuapi tiyarirca.

³Paica relampa achij nij shinami ricurirca. Churashcapish rasu shina yurajllami carca.

⁴Chai angelta manchashpami, soldadocunaca chujchushpa, huañushca shina tucurcacuna.

⁵Ashtahuanpish angelca, chai huarmicunamanca: “Cancunaca ama manchaichijchu. Chacatashca cashca Jesusta mashcacujtaca, ñucaca yachanimi.

⁶Paica mana caipichu. Pai nishca shinallatajmi causarirca. Mandaj Jesusta maipi churashca cashcapi ricuj shamuichij.

⁷Paica, huañushcacunapaj chaupimanta causarishcami nishpa paipaj yachacujcunaman huillagrichij. Cancunapaj ñaupa, Galileaman chayangapajmi paica ña rin. Chaipimi paitaca ricunguichij. Caitaca cancunaman huillanimi” nircami.

⁸Chai huarmicunaca, jutcumanta llujshishpaca manchaihuan cashpapish, achcata cushicushpami, paipaj yachacujcunaman huillangapaj callpashpa rircacuna.

⁹Yachacujcunaman paicuna huillanaman ricujpica Jesusca: — ¡Allillachu canguichij! — nishpa ñapish ricurijpica, chai huarmicunaca Jesuspajman c'uchuyashpa, paipaj chaquita ugllarishpami adorarcacuna.

¹⁰Chaimi Jesusca: — Ama manchaichijchu. Ñuca huauquicuna Galileaman richun, richij huillagrichij. Chaipimi ñucataca ricungacuna — nirca.

¹¹Huarmicuna ñanta ricujpirajmi, soldadocunamanta maijancunaca Jerusalenman rishpa, curacunata mandajcunaman tucui imalla tucushcata huillarcacuna.

¹²Chai curacunaca, cunaj yuyajcunahuan tandanacushpa yuyarinacushca q'uipaca, soldadocunaman achca cullquita cushpami:

¹³“Cancunaca: “Paipaj yachacujcunami, ñucanchij dormicujpi tuta shamushpa shuhuashcacuna” ninguichij.

¹⁴Mandaj Pilato caita yachajpica, cancunata ama imata nichun, ñucanchij paihuan rimashunllami” nircacunami.

¹⁵Soldadocuna cullquita japishpaca, paicuna yachachishca shinallatajmi nircacuna. Chaimi judiocunapurapica, cunan punllacunacama Jesustaca shuhuashcami nishpa parlancuna.

¹⁶Jesuspaj chunga shuj yachacujcunaca, pai mandashca shinallatajmi Galileapi tiyaj urcuman rircacuna.

¹⁷Maijancuna: Paichu manachu pai nishpa yuyacujpipish Jesusta chaipi ricujcunaca adorarcacunami.

¹⁸Chaipi Jesús paicunapajman c'uchuyashpaca: “Jahua pachapi, cai pachapipish tucuita mandanataca ñucamanmi curca.

¹⁹Chaimanta tucui cai pachata richij, ñuca yachacujcunata ruraichij. Paicunataca Yayapaj, Churipaj, jucha illaj Espiritupaj shutipi bautizaichij.

²⁰Cancunata ñuca tucui imalla mandashcacunata paicunapish rurachun yachachinguichij. Cai pacha tucuringacamami, tucui punllacuna ñucaca cancunahuan casha” nircami. Chashna cachun.