Read Chimborazo Highland Quichua MATEO 4 Bible Online

MATEO 4 - Chimborazo Highland Quichua bible

MATEO 4

¹Chai q'uipami Jesustaca, diablo pandachisha nichun Taita Diospaj Espirituca, shitashca pambaman pusharca.

²Chuscu chunga punllacunata, chuscu chunga tutacunata ayunashca q'uipaca yaricachircami.

³Pandachij diablo paipajman c'uchuyashpaca: — Taita Diospaj Churitaj cashpaca, cai rumicunata tanda tucuchun niyari — nijpimi,

⁴Jesusca: — Quillcachishcapica: “Runaca mana tandallahuan causangachu. Ashtahuanpish Taita Diospaj shimimanta llujshishca shimicunahuanmi causanga” ninmi — nirca.

⁵Chaimi diabloca, Taita Diospajlla puebloman pushashpa Jesustaca Taita Diospaj huasi jahua puntapi churashpa,

⁶cashna nirca: — Taita Diospaj Churitaj cashpaca, caimanta huashicui. Quillcachishcapica: “Canta japichun Taita Diosca paipaj angelcunata cachangami. Cambaj chaqui rumipi ama ñitcarichun, paicunapaj maquipi cantaca charirangami” ninmi — nircami.

⁷Chaimi Jesusca: — Quillcachishcapica cashnapish ninmi: “Mandaj cambaj Jatun Diostaca ama pandachisha ningui” ninmi — nircami.

⁸Cutinllatajmi Diabloca, tucuimanta yalli jatun urcu jahuaman Jesusta pushashpa, tucui cai pachapi mandanacunata, sumajcunata ricuchishpaca,

⁹cashna nirca: — Ñucata cungurishpa adorajpica, tucui caicunatami cusha — nirca.

¹⁰Shina nijpi Jesusca: — Anchui, Satanás. Quillcachishcapica: “Mandaj cambaj Jatun Diosllata adorangui, paipajllata rurangui” ninmi — nijpimi,

¹¹diabloca pandachisha ninataca saquirca. Angelcuna shamushpami Jesuspajtaca rurarcacuna.

¹²Bautizaj Juan prezupi nijta uyashpami Jesusca Galileaman tigrarca.

¹³Paica Nazaretpica mana saquirishpami cucha uripi caj Zabulón, Neftalí llajtacuna chaupipi caj Capernaumpi causagrirca.

¹⁴Profeta Isaías nishca pajtachunmi, chashna tucurca. Isaiasca:

¹⁵“¡Jordán ch'imba ladota cuchaman rina ñanpi caj llajtacuna Zabulón llajta, Neftalí llajta uyaichij Galileapi causaj mana israelcuna uyaichij!

¹⁶Amsapi churashca puebloca, jatun luztami ricurca. Huañunalla amsapi churashca llajtacunataca luzmi lamyachinga” nishcami carca.

¹⁷Chai punllamanta pacha Jesús huillai callarishpaca: “Mana allita ruracushcata saquishpa cutirichij. Jahua pachamanta mandanamari ña c'uchuyamushca” nircami.

¹⁸Jesusca, Galilea cucha urita puricushpami, huauquindij ishqui runacunata ricurca. Pedrota shutichishca Simonmi, paipaj huauqui Andresdij chalhuata japijcuna cashcamanta linchita cuchapi shitacurcacuna.

¹⁹Paicunatami Jesusca: — Ñucata catichij. Chalhuacunata japijta shinallataj, gentecunata pushamujcunatami rurasha — nirca.

²⁰Paicunaca, linchicunata saquishcahuanmi Jesusta catircacuna.

²¹Chaimanta rishpaca, shujtaj ishqui huauquindijcunatami ricurca. Paicunataca Zebedeopaj churi Jacobo, paipaj huauqui Juandij, paicunapaj yaya Zebedeohuan barcopi linchicunata allichicujta ricushpami cayarca.

²²Paicunapish paicunapaj yayata, barcota saquishcahuanmi Jesusta catircacuna.

²³Jesusca, tucui Galileata rishpami paicunapaj sinagogacunapi yachachishpa, Taita Dios mandana alli huillaita huillashpa, tucui laya ungüihuan cajcunatapish, ima nanaihuan cajcunatapish tucuicunata alliyachirca.

²⁴Chaitaca tucui Siria llajtapi huashan huashan yachaj chayashpami, tucui nanaicunahuan cajcunata, ch'ican ch'ican ungüihuan llaquita apacujcunata, supai japishcacunata, uraticucunata, mana cuyuri tucujcunatapish pushamujpi tucuicunata alliyachirca.

²⁵Chaimantami Galileamanta, Decapolismanta, Jerusalenmanta, Judeamanta, Jordán yacu ch'imbanijmantapish achca gentecuna catircacuna.