Read Chimborazo Highland Quichua MATEO 5 Bible Online

MATEO 5 - Chimborazo Highland Quichua bible

MATEO 5

¹Jesusca chai tucuicunata ricushpami, urcuman huichiyashpa chaipi tiyarirca. Paipaj yachacujcunapish c'uchuyarcacunami.

²Chaipi Jesusca tucuicuna uyajta yachachishpaca:

³Espiritupi huajcha cajcunaca cushichishcami. Jahua pachamanta mandanaca ñami paicunapi mandacun.

⁴Huacajcunaca cushichishcami. Paicunami cushicuita chasquingacuna.

⁵Manso shungucunaca, cushichishcami. Japina cashca allpataca paicunami chasquingacuna.

⁶Cashcata ruraj canata yaricaihuan, yacunaihuan shina mashcajcunaca cushichishcami. Paicunaca mana nijtami micungacuna.

⁷Llaquijcunaca, cushichishcami. Paicunataca Taita Diosmi llaquinga.

⁸Chuya shungucunaca, cushichishcami. Paicunami Taita Diostaca ricungacuna.

⁹P'iñanacushcata alli tucunacuchijcunaca cushichishcami. Paicunaca Taita Diospaj huahuacuna nishcami cangacuna.

¹⁰Cashcata ruraj cashcamanta llaquichina yuyailla llaquichishcacunaca cushichishcami. Jahua pachamanta mandanaca ñami paicunapi mandacun.

¹¹Ñucata caticushcamanta tucui laya millai shimicunata rimashpa, llullashpa, c'amishpa, llaquichina yuyailla llaquichijpi llaquita apajcunaca cushichishcami.

¹²Chashna rurajpipish jatunta cushicushpa contentarichij. Cancuna jahua pachapi japina cashcaca tucuita yalli jatunmari. Cancunapaj ñaupa shamuj profetacunatapish, chashnallatajmi llaquichircacuna.

¹³Cancunaca, cai pachapaj cachimi canguichij. Cachica mishquiyachinata chingachishpaca, imapaj mana allichu. Canllaman shitajpi runacuna sarushca canapajllami.

¹⁴Cancunaca cai pachapaj luzmi canguichij. Urcu jahuapi tiyaj puebloca, mana pacalla cai tucunchu.

¹⁵Luzta japichishpaca, cajón ucupi churangapajca pi mana japichinchu. Ashtahuanpish huasi ucupi tiyajcunata achijyachichunmi, lámpara tiyanapi churan.

¹⁶Cancunapish chai luz shinallatajmi runacunapaj ñaupajpica achijyachina canguichij. Cancunapaj alli rurashcacunata ricushpa, jahua pachapi caj cancunapaj Yayata jatunyachichunmi chashna cana canguichij.

¹⁷Mandashcacunata anchuchingapaj, profetacuna quillcashcacunata anchuchingapaj shamushca canataca ama yuyaichijchu. Ashtahuanpish chai huillashcacuna pajtachunmi shamurcani.

¹⁸Jahua pachapish, cai pachapish manaraj tucurijpimi mandashcacunamanta huillashcacunaca shuj puntollapish, shuj tildellapish mana chingarishpa, chashnataj pajtanga. Chaica chashnatajmi canga.

¹⁹Chaimanta maijanpish, cai mandashcacunapi uchilla cajta p'aquishpa, shujtajcunatapish chashna p'aquij canata yachachijca, jahua pachamanta mandacunpica, uchilla nishcami canga. Ashtahuanpish chaitataj pajtachishpa yachachijca, jahua pachamanta mandacunpica jatun nishcami canga.

²⁰Chaimanta cashnami nini: Mandashcata quillcajcunata, fariseocunata yalli cashcata rurashpa mana causashpaca, jahua pachamanta mandacunpica mana yaicunguichu.

²¹Ñaupa yayacunamanca: “Ama huañuchingui. Maijanpish huañuchijca, jatunta llaquichishca canapaj juchachishcami canga” nishcatami uyarcanguichij.

²²Ashtahuanpish ñucaca cashnami nini: Maijanpish shujtajta p'iñajtaca, jatunta llaquichinapaj juchachishcami canga. Shinallataj shujtajta: “Ch'ahuan” nijtaca, mandajcunalla tandanacushcapaj ñaupajpi juchachishcami canga. Maijanpish shujtajta: “Muspa” nijca, ucu pacha ninapi shitanapajmi saquiringa.

²³Chaimanta Taita Diosman cungapaj ofrendata altarman apamucushpa, cambaj huauqui canhuan imamanta p'iñarishcata yuyarishpaca,

²⁴Taita Diosman cuna ofrendata altar ñaupajpi saquishpa, cambaj huauquihuanraj alli tucugringui. Chashna rurashpaca, Taita Diosman cunaman tigranguilla.

²⁵Maijanpish canta imamanta juchachishpa juezpajman apacujpica ñanta ricushparaj paihuan alli tucungui. Mana chashna rurajpica, juezpajman chayachijpi, juezca soldadoman cujpi carcelpimi churanga.

²⁶Tucui cullquita pagangacama manataj llujshinguichu. Chaica chashnatajmi canga.

²⁷Cancunaca: “Ama huainayanguichij” nishcatami uyarcanguichij.

²⁸Ashtahuanpish ñucaca: Maijanpish shujtaj huarmita ricushpa munajca, paipaj shungupi ñami chai huarmihuan huainayan ninimi.

²⁹Chaimanta cambaj alli lado ñahui imapi pandachisha nijpica, surcushpa shitangui. Cambaj tucui cuerpondij ucu pachapi shitashca canapaj randica, cambaj cuerpomanta shuj partellata surcushpa shitanami ashtahuan alli canga.

³⁰Shinallataj cambaj alli lado maqui juchapi urmachisha nijpica, p'itishpa shitangui. Cambaj tucui cuerpondij ucu pachapi shitashca canapaj randica, cambaj cuerpomanta shuj partellata surcushpa shitanami alli.

³¹Shinallataj: “Maijan cashpapish huarmita shitajca, chaita ricuchij quillcata cuchun” nishcatami yacharcanguichij.

³²Ashtahuanpish ñucaca cashnami nini: Maijan cusapish, manapish huarmi huainayashca cajpi shitajca, shujtajhuanmi huainayachin. Cusa shitashca huarmihuan cazarajpish huainayanmi.

³³Shinallataj ñaupa yayacunamanca: “Manapish pajtachingapajca, pajtachishami ama ningui. Ashtahuanpish can pajtachishami nishcataca Jatun Diospaj ñaupajpi pajtachingui” nishcatami uyarcanguichij.

³⁴Ashtahuanpish ñucaca cashnami nini: Imata rurasha nishpapish ama rurashatajmi niringuichijchu. Jahua pacha nishpapish ama niringuichijchu. Jahua pachaca, Taita Diospaj jatun tiyanami.

³⁵Cai pacha nishpapish ama niringuichijchu. Cai pachaca, Taita Diospaj chaqui sarunami. Jerusalén nishpapish ama niringuichijchu. Jerusalenca, jatun Mandajpaj pueblomi.

³⁶Cambaj shutillapitajpish pajtachishami ama niringuichu. Shuj ajchallatapish yurajta yanata mana rurai tucunguichu.

³⁷Ashtahuanpish canca: “Ari cajpica ari, mana cajpica mana ningui”. Imatapish yalli mana nirinaca millaimantami shamun.

³⁸Cancunaca: “Ñahuita surcujtaca paitapish ñahuita surcunami. Quiruta surcujtaca paitapish quiruta surcunami” nishcatami uyarcanguichij.

³⁹Ashtahuanpish ñucaca cashnami nini: Maijan ima mana allita rurajpipish, ama c'ariyangui. Alli lado quijaduspi maijan huajtajpica, caishuj ladopipish huajtachingui.

⁴⁰Maijanpish ucu churanata quichusha nishpa demandajpica, jahua churanatapish apachun saquingui.

⁴¹Maijan canta shuj cuadracama macanahuan caita apai nijpica ishqui cuadracama apangui.

⁴²Maijanpish canta imata mañajpica cunguilla. Maijanpish canta imata mañachi nijpica, mañachinguilla.

⁴³Cancunaca: “Canhuan alli cajcunallata c'uyangui, p'iñajtaca p'iñangui” nishcatami uyarcanguichij.

⁴⁴Ashtahuanpish ñucaca cashnami nini: Cancunata p'iñajcunatapish c'uyanguichij. Cancunata llaqui tucushca cachun nijcunatapish alli cashca cachun ninguichij. P'iñajcunapajpish allita ruranguichij. Maipish cachun rimashpa, llaquichina yuyailla llaquichijcunamantapish Taita Diosta mañanguichij.

⁴⁵Cancunaca jahua pachapi caj Yayapaj huahuacuna cashcata ricuchingapajmi chashna rurana canguichij. Paimi allicunaman, mana allicunamanpish intita cachan. Shinallataj cashcata rurajcunaman, mana cashcata rurajcunamanpish tamyata cachan.

⁴⁶Cancunata c'uyajcunallata c'uyashpaca, cancuna japina cashcataca imata mana japinguichijchu. ¿Manachu impuestota japijcunapish paicunata c'uyajcunataca c'uyancuna?

⁴⁷Cancunahuan alli cajcunallata allillachu canguichij nishpaca, ima allita mana ruranguichijchu. ¿Manachu Taita Diosta mana rijsijcunapish, chashnallataj rurancuna?

⁴⁸Cancunapaj jahua pacha Yaya, cashcata ruraj caj shinallataj cancunapish cashcata rurajcuna caichij.