Read Chimborazo Highland Quichua MATEO 9 Bible Online

MATEO 9 - Chimborazo Highland Quichua bible

MATEO 9

¹Chai q'uipami Jesusca, barcopi yaicushpa cuchata ch'imbashpaca, paipaj puebloman chayarca.

²Chaipi pai cajpica, mana cuyurij runatami, huandunapi huandushpa apamurcacuna. Jesusca paicuna crishcata ricushpami, mana cuyurij runataca: — Huahua, ama manchaichu cambaj juchacunaca perdonashcami — nirca.

³Chaimantami mandashcacunata quillcaj maijancunaca: “Caica, Taita Diosta p'iñashpamari c'amicun” nishpa yuyacurcacuna.

⁴Jesusca paicuna ima shina yuyacushcata yachashpami: — ¿Ima nishpataj cancunapaj shungupica, millaita yuyacunguichij?

⁵¿“Cambaj juchacunataca perdonashcami” ninachu, mana cashpaca: “Jatarishpa puri” ninachu, imata ninataj ashtahuan jahualla canga?

⁶Runa Aichayujca cai pachapi causajcunapaj juchacunata perdongapaj cashcataca cunanmi ricuchisha — nishpaca, mana cuyurij runataca: — ¡Jatari, canta huandumushcata apashpa, cambaj huasiman ri! — nircami.

⁷Chashna nijpimi paica jatarishcahuan paipaj huasiman rirca.

⁸Chaita ricushpaca, tucuicuna mancharinacushpami, Taita Diosca runacunamanmi cai tucui rurai tucunata cushca nishpa Taita Diostaca jatunyachircacuna.

⁹Jesús chaimanta rishpaca, Mateotami, tributocunata japinapi tiyacujta ricurca. Paita ricushpaca: — Ñucata cati — nijpi Mateoca jatarishcahuan Jesusta catircallami.

¹⁰Chaimanta rishpa, Jesusca Mateopaj huasipi mizapi micushpa tiyacujpica, impuestota japijcunapish, juchayujcunapish achcacuna chayashpami Jesusndij paipaj yachacujcunandij mizapi micungapaj tandalla tiyarircacuna.

¹¹Chaita fariseocuna ricushpami, Jesuspaj yachacujcunataca: — ¿Ima nishpataj cancunata Yachachijca impuestota japijcunahuan, juchayujcunahuan micucunchu imamí? — nircacuna.

¹²Chaita Jesús uyashpaca: — Mana ungushcacunaca jambijtaca mana mashcanchu, ungushcacunallami mashcancuna.

¹³“Sacrificiocunataca mana ninichu. Ashtahuanpish llaquij cachunmi munani” nishcaca imata nisha nishcataraj yachamugrichij. Ñucaca cashcata rurajcunataca mana cayaj shamurcanichu. Ashtahuanpish mana allita ruracushcata saquishpa cutirichunmi cayaj shamurcani — nircami.

¹⁴Juanpaj yachacujcuna Jesuspajman c'uchuyashpaca: — Ñucanchijpish, fariseocunapish achca cutinmi ayunanchij. ¿Ima nishpataj cambaj yachacujcunaca mana ayunancuna? — nircacunami.

¹⁵Shina nijpi Jesusca: — Bodapi cajcunaca novio paicunahuan cajpica mana llaquilla cai tucunchu. Ashtahuanpish noviota paicunapajmanta quichuna punllami chayamunga. Chaipimi ayunangacuna.

¹⁶Pipish mauca churanata mushuj linsohuanca mana llachapanchu. Mushujhuan llachapajpica, uchillayashpa mauca churanataca ashtahuanmi lliquin.

¹⁷Shinallataj mushuj vinotaca, mauca capachucunapica pi mana churanchu. Chai mauca capachucuna tugyajpi vinopish, capachupish chingarinmanmi. Ashtahuanpish mushuj vinotaca, mushuj capachucunapimi churana. Chashna cashpami caishujpish chaishujpish mana chingaringa — nircami.

¹⁸Jesús chashna yachachicujpirajmi, judiocunata mandaj chayamushpa paipaj ñaupajpi cungurishpaca: — Ñuca ushushimi huañun. Jacupai, cambaj maquita paipaj jahuapi churajpica, causaringallami — nirca.

¹⁹Shina nijpi Jesusca jatarishcahuanmi, paipaj yachacujcunandij chai runata catishpa rirca.

²⁰Chaipica chunga ishqui huatacunata yahuar cacharirishpa ungushca shuj huarmimi, Jesuspajman huashata c'uchuyashpa Jesuspaj churana puntapi tuparirca.

²¹Paica paipaj yuyaipimi: “Jesuspaj churanapi tuparishpalla alliyanata yuyashpa” tuparirca.

²²Jesús chai huarmita tigrarishpa ricushpaca: — Huahua, ama manchaichu canca alliyachinata crishcamantami alliyashcangui — nirca. Jesús chashna ninca alliyarcallami.

²³Jesús chai mandajpaj huasiman yaicunapajca, flautacunapi tocacujta, gentecuna bullacujta ricushpami,

²⁴Jesusca — Caimanta llujshichij, huambraca mana huañushcachu, dormicunllami — nijpimi paitaca asircacuna.

²⁵Gentecunata ña canllaman llujshichijpi Jesús huasi ucuman yaicushpa huambrapaj maquipi japijpica huambraca jatarircallami.

²⁶Jesús chashna rurashcaca tucui chai llajtapimi huashan huashan uyarirca.

²⁷Jesús chaimanta llujshishpa ricujpica, mana ricuj ishqui runacunami: — ¡Davidpaj Churi, ñucanchijta llaquihuayari! — nishpa caparihuan caticurcacuna.

²⁸Jesús ña huasiman chayajpi, ñahui mana ricujcuna paipajman c'uchuyajpi Jesusca: — ¿Cancunaca ñuca alliyachina cashcata cringuichijchu? — nijpi paicunaca: — Ari, amito — nircacuna.

²⁹Jesusca, paicunapaj ñahuicunapi maquihuan tuparishpaca: — Cancuna crishca shinallataj alliyaichij — nircami.

³⁰Paicunapaj ñahuicunaca ricurcallami. Paicunataca Jesusca: — Riquichij, pajta piman parlanguichijman — nirca.

³¹Shina nijpipish paicunaca chaimanta rishpaca, Jesús imallata ruracujtaca tucuicunamanmi huillaihuan huillaihuan rircacuna.

³²Alliyashcacuna llujshishpa rincami, supai japishcamanta mana rimaj shuj runata pushamurcacuna.

³³Supaita Jesús llujshichincami, mana rimaj runaca rimarca. Chaipi caj gentecunaca mancharinacushpami: — Cashnataj rurajtaca, Israelpica manataj ricushcanchijchu — nircacuna.

³⁴Ashtahuanpish fariseocunaca: — Supaicunata mandajhuan cashpami, supaicunata llujshichin — nircacunami.

³⁵Jesusca tucui pueblocunata llajtacunata purishpami, Taita Dios mandana alli huillaita paicunapaj sinagogacunapi yachachishpa tucui laya ungüihuan cajcunata, nanaihuan cajcunata tucuicunata alliyachirca.

³⁶Chaipica michij illajlla, ovejacuna caita chaita puricuj shinata, achcacunata ricushpami paicunataca achcata llaquirca.

³⁷Chaimantami paipaj yachacujcunataca: “Granocunata tandanaca achcami, ashtahuanpish tandajcunaca ashallami.

³⁸Tandajcunata cachachun, Chagrayuj amota mañaichij” nircami.