Read Chimborazo Highland Quichua MARCOS 13 Bible Online

MARCOS 13 - Chimborazo Highland Quichua bible

MARCOS 13

¹Taita Diospaj huasimanta Jesús llujshicujpimi, paipaj yachacujcunamanta shujca: — Yachachij, cai huasicunata chai huasipaj jatun rumicunata ricuyari — nijpimi,

²Jesusca: — Taita Diospaj cai huasica ima shinalla rurashca cashcata ricushpachu ¿mancharingui? Caica shuj rumillapish mana pircashca saquiringachu, tucuimi urmachishca canga — nircami.

³Chai q'uipaca, Taita Diospaj huasi ch'imbapurapi caj Olivocuna tiyan urcupimi Jesusca tiyarirca. Chaipimi Pedro, Jacobo, Juan, Andrespish Jesustaca paillata cashna tapurcacuna:

⁴— Huillahuayari can huillacushcaca ¿ima punllataj chashna tucungari? ¿Ima ricuchinata ricushpataj tucui chaicuna pajtamucushcataca yachashun? — nircacuna.

⁵Chaimi Jesusca, cashna huillai callarirca: — Cancunataca pi ama umachun yuyaihuan canguichij.

⁶Achcacunami ñuca shutipi shamushpaca: “Ñucami Cristo cani” nishpa, achcacunata umangacuna.

⁷Jatun macanacuicunami tiyan, shujtaj llajtacunapipish ñami macanacugrin ninacujtami uyanguichij. Cancunaca ama pandaringuichij yuyaihuan canguichij. Tucui caicunaca pajtanatajmi. Chashna tucujpipish cai shina causaica manaraj tucuringachu.

⁸Mama llajtaca caishuj mama llajtahuan macanacungami, shinallataj jatun mandajcunapurapish macanacungacunami. Pamba chujchushpa t'imburicuna, yaricaicuna, caparinacuicunapishmi tiyanga. Cai tucui llaquicunaca, nanai callaricuj shinallami canga.

⁹Ashtahuanpish cancunallataj huaquichiringuichij. Cancunataca, mandajcunapuralla tandanacushcaman apangacunami. Paicunapaj sinagogacunapi azotingacunami. Llajtata mandajcunapaj ñaupajman, jatun mandajcunapaj ñaupajmanpishmi ñucata caticushcamantaca, pushangacuna. Chaipimi ñucamanta huillanguichij.

¹⁰Cai shina causai tucurinapajca alli huillairajmi tucui cai pachapi huillashca canga.

¹¹Cancunata pushajpica imatataj nishun, imatataj rimashun nishpa ama chai yuyailla canguichijchu. Cancuna ña rimagrijpimi, imalla rimana cashcataca Taita Dios rimachinga. Mana quiquin yuyaimantachu rimanguichij, ashtahuanpish cancunataca Taita Diospaj Espiritumi rimachinga.

¹²Huauquita huañuchichunca huauquillatajmi japichinga. Yayaca churitami japichinga. Huahuacunapish yaya mamata p'iñashpa japichishpami huañuchichinga.

¹³Ñuca shutimantaca, tucuicuna p'iñashcami canguichij. Ashtahuanpish tucuringacama catirajllami quishpiringa.

¹⁴(Maijanpish caita rezajca entendichun) Profeta Daniel nishca shinaca, millanana chingachij runa ricurishpami manapish pai tiyarinapi tiyaringa. Chaita ricushpaca, Judeapi cajcunaca urcucunapi miticugrichun.

¹⁵Huasi jahuapi cajpish ima charishcata apanaman ama yaicuchun.

¹⁶Chagrapi cajpish, churanata apanaman ama tigrachun.

¹⁷Chai punllacunapica chichu huarmicunapish, chuchucuj huahuayujcunapish ¡aij imachari tucunga!

¹⁸Cancuna miticushpa rina punllaca amalla tamya punllacuna cachun Taita Diosta mañaichij.

¹⁹Chai punllacunaca jatun llaquimi canga. Cai pachata Taita Dios rurashca punllamanta cunancamaca, chashna llaquica mana tiyashcachu, cutinpish manataj tiyangachu.

²⁰Chai llaqui punllacunata Jatun Dios mana utca tucuchijpica, pi mana causanmanchu. Ashtahuanpish Taita Diosca pai agllashcacunata c'uyashcamantami, chai llaqui punllacunataca utca tucuchinga.

²¹Chai punllacunapi maijanpish cancunata: “Riquichij, Cristoca caipimari, mana cashpaca chaipimari” nijpipish, amataj cringuichijchu.

²²Chai punllacunaca: “Ñucami Cristo cani” nishpa llullajcunapish, profetami canchij nishpa llullajcunapish tiyangami. Chai llullajcunaca jatun ricuchinacunata, milagrocunata rurashpami umangacuna. Taita Dios agllashcacunatapish crichi tucushpaca crichingacunami.

²³Ashtahuanpish cancunaca yuyaihuan canguichij. ¡Ñucaca ñaupamanmi imalla tucuna cashcataca ña huillani!

²⁴Chai jatun llaqui punllacuna ña tucurijpica intica amsayangami, lunapish mana achijyachingachu.

²⁵Luzerocunapish jahua pachamanta urmangacunami, jahua pachacunapi caj jatun mana cuyuripajcunapish chujchungami.

²⁶Runa Aichayujtaca jahua pachamanta p'uyupi tucuita rurai tucuj cashcahuan, achijnicuj sumaj shamucujtami ricungacuna.

²⁷Pai shamushpaca paipaj angelcunatami cachanga. Paicunami Runa Aichayuj agllashcacunataca cai pachapi tiyaj tucui llajtacunamanta uramanta, janajmanta, tucuicunata tandachingacuna.

²⁸Higo yura ima shina cajta ricushpa yuyarichigari: Higo yurapi caj ramacuna verdeyashpa p'angacuna huiñashpa jundarijpica usia punllacuna ña chayamucushcatami yachanguichij.

²⁹Chashnallatajmi cai ñuca huillashcacuna pajtacujta ricushpaca, Runa Aichayuj shamunaca pungullapi cashcata cancunaca yachanguichij.

³⁰Cunan punllacunapi causajcunaca, cai huillashcacuna pajtangacama manaraj huañungacunachu. Chashnatajmi canga.

³¹Jahua pachapish, cai pachapish tucuringami. Ashtahuanpish ñuca huillashca shimicunaca manataj tucuringachu.

³²Ima punlla ima hora shamunataca pi mana yachanchu. Jahua pachapi caj angelcunapish, Churipish mana yachanchu. Ñuca Yayallami yachan.

³³Cancunaca ima punlla Runa Aichayuj shamuna cashcata mana yachashcamanta, ricuraichij, chaparaichij, mañaraichij.

³⁴Tucui chashna tucunaca shuj runa huasita saquishpa, caru llajtata rij shinami. Chai runaca paipajta rurajcunataca, ch'ican ch'ican ruranacunata rurachun mandashpami saquin. Shinallataj pungupi cuidajtapish alli chaparacungui nishpami saquin.

³⁵Chai shinallataj huasiyuj amo shamunata cancunapish mana yachashcamanta, yuyaihuan chaparaichij. Paica tutayaitachari, chaupi tutachari, gallo cantaitachari, pacaritachari shamunga.

³⁶Cungaimanta shamushpaca, dormicujta ñataj japinman.

³⁷Cancunaman huillashcataca, tucuicunamanmi chai shinallataj huillani: ¡Chaparanguichij! — nircami.