Read Chimborazo Highland Quichua MARCOS 14 Bible Online

MARCOS 14 - Chimborazo Highland Quichua bible

MARCOS 14

¹Levadura illaj tandata micuna Pascua fiestapajca, ishqui punllami illarca. Chaipimi curacunata mandajcuna, mandashcacunata quillcajcunapish ima shinataj Jesustaca, umashpalla japishpa huañuchinchij nishpa yuyarinacucurcacuna.

²Ashtahuanpish paicunaca: “Cai fiesta punllacunapica ama japishunchijchu, ñataj gentecuna ñucanchijtaraj imata ninman” nircacunami.

³Jesusca Betaniapi cashpaca lepra ungüihuan cashca Simonpaj huasipimi mezapi micushpa tiyacurca. Chaipi cajpimi, shuj huarmica, alabastro botellapi achca valij mishquijllata ashnacuj nardota apashpa Jesuspajman shamurca. Chaipimi alabastro botellata p'aquishpa, Jesuspaj umapi tallirca.

⁴Chaipica maijancunaca paicunapuralla p'iñarinacushpami, cashna ninacurca: — ¿Ima nishpataj cai mishquijllata ashnacujtaca, yanga tallin?

⁵Chaitaca quimsa patsaj yalli denariocunapi c'atushpa huajchacunaman cushpachari alli canman carca — nishpami, chai huarmitaca huashalla rimarcacuna.

⁶Chaimi Jesusca cashna nirca: — Saquichij ¿ima nishpataj chai huarmitaca chashna rimanguichij? Paica ñucapajca allitamari ruran.

⁷Huajchacunaca mana illangachu, paicunapaj allita ruranata munashpaca ruracunguichijlla. Ashtahuanpish ñucaca, ña mana cancunahuan causacushallachu.

⁸Cai huarmica, pai tucui rurai tucushcatami rurashca. Pambanapaj ñuca cuerpo allichishca cachunmi, cashna rurashca.

⁹Tucui cai pachapica, maipipish cai alli huillaita huillacushpaca, cai huarmi imata rurashcatapishmi huillangacuna. Chaipica, allitamari rurashca nishpami yuyaringacuna. Chashnatajmi canga — nircami.

¹⁰Chai q'uipami, chunga ishqui yachacujcunapuramanta Judas Iscarioteca, Jesusta japichisha nishpa curacunata mandajcunahuan parlanacugrirca.

¹¹Jesusta japichisha nijta curacuna uyashpaca, achcata cushicushpami cullquita cushun nircacuna. Chai pachamantami Judasca, ima shinapish Jesusta japichinata yuyacurca.

¹²Pascua fiesta callari punllapica, levadura illaj tandata micuna, malta c'ari ovejata Taita Diosman cushpa rupachinapishmi carca. Chaipimi Jesustaca yachacujcunaca: — Pascua fiestapi quiquin micuchunca ¿maipitaj allichigrichun ningui? — nijpi,

¹³Jesusca paipaj yachacujcunamanta ishquita cashna nishpa cacharca: — Puebloman richij. Chaiman chayashpaca, puñu yacu aparishca shuj runahuanmi tupanguichij. Paihuan tupashpaca paita catishpa ringuichijlla.

¹⁴Pai maiman yaicujpica, huasiyuj runataca: “Ñucanchij yachachijca: ¿Mai ucupitaj Pascua micuitaca ñuca yachacujcunahuan micusha? ninmi” ninguichij.

¹⁵Paica, altibajopi ña allichishca shuj jatun ucutami ricuchinga. Chaipica, ñucanchij micunata allichinguichij — nishpami cacharca.

¹⁶Yachacujcuna rishpa puebloman chayajpica, Jesús nishca shinallatajmi pajtarca. Chaipimi Pascuapi micunataca allichircacuna.

¹⁷Ña tutayamucujpica, chunga ishqui yachacujcunandijmi Jesusca chayarca.

¹⁸Mezapi ña micucushpami Jesusca: — Cancunapuramanta ñucahuan micucuj shujmi, ñucataca huañuchichun entregagrin. Chashnatajmi canga — nircami.

¹⁹Chaimi paicunaca llaquirishpa caishuj chaishuj: — ¿Ñucachu cani? ¿Ñucachu cani? — nishpa tapunacui callarircacuna.

²⁰Chaimi Jesusca cashna nirca: — Chunga ishquipuramanta shuj, ñucahuan cai platopi tandata jucuchijmi japichinga.

²¹Runa Aichayujtaca, quillcachishcapi nishca shinallatajmi huañuchigrin. ¡Aij, Runa Aichayujta huañuchichun entregaj runalla! Cai runaca mana huacharishca cashpachari, alli canman carca — nircami.

²²Chashna micucushpami Jesusca tandata japishpa, Taita Diosta pagui nirca. Chaita chaupishpaca: — Japichij, caica ñuca cuerpomi — nishpami curca.

²³Tandata micushca q'uipaca copata japishpa, Taita Diosta pagui nishpa cujpimi, chai copamantaca tucuicuna ubyarcacuna.

²⁴Chaipimi Jesusca: — Caica, achcacunata quishpichingapaj mushuj ruranata callarichishcata ricuchij ñuca jichana yahuarmi.

²⁵Taita Dios mandacujpi mushujta ubyangacama, uvamanta capishca vinotaca cutinca mana ubyashachu. Chashnatajmi canga — nircami.

²⁶Cantota cantashca q'uipa chaimanta llujshishpaca, Olivocuna tiyan urcumanmi rircacuna.

²⁷Chaipimi Jesusca: — Quillcachishcapica: “Michijtaca huañuchishami, oveja canllaca caita chaitami ringacuna” ninmi. Chaipi nishca shinallatajmi cunan tutallataj ñucataca mana crishpa tucuicuna shitashpa ringuichij.

²⁸Ashtahuanpish Taita Dios causachishca q'uipaca, cancunapaj ñaupami Galileaman risha — nijpimi,

²⁹Pedroca: — Tucuicuna shitashpa rijpipish, ñucaca manataj saquishachu — nirca.

³⁰Chaimi Jesusca: — Cunan tutallataj gallo manaraj ishqui cutin cantajpimi, ñucataca quimsa cutin mana rijsinichu ningui. Chashnatajmi canga — nirca.

³¹Ashtahuanpish Pedroca: — Canhuan huañuna cajpipish, ñucaca manataj chashna nishachu — nijpica, caishuj yachacujcunapish tucuicunami chashnallataj nircacuna.

³²Chai q'uipami Jesusca paipaj yachacujcunandij Getsemaní shuti huertaman chayashpaca: — Taita Diosta ñuca mañangacama, cancunaca caillapi tiyacuichij — nirca.

³³Chaimantaca Pedrota, Jacobota, Juantapish pushashpa ricushpaca, Jesusca yallitajmi llaquiri callarirca.

³⁴Chaipica: — Ñuca almaca llaquihuan huañucunmari. Cancunaca caipi saquirishpa ama dormishpa yuyaihuan caichij — nircami.

³⁵Jesusca chaimanta ashallata rishpaca, pambacama cumurishpami, ima shinamanta llaquita mana apana cajpica, chai llaquita apanata jarcachun nishpami, Taita Diosta cashna nishpa mañarca:

³⁶“¡Yayitu! Cambajca tucui imapish jahuallami. Ima shinamanta jayajta ubyanata ñucamanta anchuchina cajpica anchuchipai. Ñuca chashna nijpipish ama ñuca munashca shinaca rurapaichu, ashtahuanpish can munashca shina rurapai” nircami.

³⁷Jesús tigramushpaca dormicujta japishpami, Pedrotaca: — Simón, ¿dormicunguillachu? ¿Manachu shuj horallatapish mana dormishpa chapai tucungui?

³⁸Llaquicunapi ama urmangapaj chaparaichij, mañaraichij. Espirituca mañanata yuyanmi, ashtahuanpish aichaca shaicushcami — nirca.

³⁹Cutin rishpaca, ñaupaman shinallatajmi Taita Diosta mañarca.

⁴⁰Cutin tigramushpapish dormicujtami japirca. Paicunapaj ñahuicunaca, yallitaj dorminaihuan cashcamantami, imata mana cutichi tucurcacuna.

⁴¹Caihuanca quimsa cutin tigramushpaca, cashnami nirca: — ¡Cancunaca ashtahuan dormishpa samaricunguichijllachu imamí! ¡Ña chailla dormichij! Riquichij, Runa Aichayujta juchayujcunapaj maquipi entreganaca ñami pajtashca.

⁴²¡Jatarichij, jacuchij! Riquichigari ñucata huañuchichun entregajca, ñami c'uchuyamucun — nircami.

⁴³Jesús chashna rimacujpirajmi, chunga ishquipuramanta caj Judasca ña chayamurca. Paihuanca achca runacunami espadacunahuan, caspicunahuan shamurcacuna. Chaicunaca curacunata mandajcuna, mandashcacunata quillcajcuna, cunaj yuyajcunapish cachashcacunami carca.

⁴⁴Jesusta japichij Judasca: “Maijantami muchani, chaimi canga. Paita japishpaca, alli huatashpa pushanguichij” nishpami yachachishca carca.

⁴⁵Ña chayamushpa, Jesuspajman c'uchuyashpaca: — ¡Yachachij, Yachachij! — nishpami mucharca.

⁴⁶Judas chashna rurajpica, paicunaca huaicashpami japircacuna.

⁴⁷Ashtahuanpish Jesushuan cajcunamanta shujca, espadata surcushcahuanmi, curacunata mandajpajta rurajtaca, rinrinta p'itirca.

⁴⁸Chaipimi Jesusca paicunataca: — ¿Shuhuata shinachu espadacunahuan, caspicunahuan ñucataca japij shamunguichij?

⁴⁹Ñucaca Taita Diospaj huasipica, punllantami yachachishpa cancunallahuantaj carcani. Chaipica mana japircanguichijchu. Ashtahuanpish Quillcachishcacunapi nishca shina pajtachunmi, cashnaca ruracunguichij — nircami.

⁵⁰Yachacujcunaca tucuicunami Jesusta saquishpa miticushpa rircacuna.

⁵¹Jesusta pushacujpica shuj mosomi linsohuan pillurishca caticushca carca. Paitapish japircacunami.

⁵²Paitapish japijpica, llushpirishpami pillurishca linsotapish shitashpa lluchulla miticushpa rirca.

⁵³Curacunata mandajpajmanmi, Jesustaca pushamurcacuna. Chaipica curacunata tucui mandajcuna, cunaj yuyajcuna, mandashcacunata quillcajcunapishmi tandanacurcacuna.

⁵⁴Jesusta pushajpica Pedroca, huasha huashalla catishpami curacunata mandajpaj huasi canllacama rishca carca. Chaipimi huasita cuidajcunahuan, ninapi cunushpa tiyacurca.

⁵⁵Curacunata jatun mandajcuna, tucui mandajcunapuralla tandanacushcacunapish tandanacushpami, Jesusta huañunami cangui ningapaj Jesusmanta llullashpa huillachun mashcarcacuna. Ashtahuanpish ima juchachinata mana japircacunachu.

⁵⁶Achcacunami Jesusmantaca, llullashpa huillarcacuna. Chashna huillashpapish shujtaj shujtajtami huillarcacuna.

⁵⁷Cutin maijancuna shayarishpaca cashnami Jesusmantaca llullashpa huillarcacuna:

⁵⁸— “Maquihuan rurashca Taita Diospaj huasitaca urmachishpami, quimsa punlla q'uipaca maquihuan mana rurashca shujtaj huasita shayachisha” nijtami ñucanchijca uyarcanchij — nircacunami.

⁵⁹Ashtahuanpish chashna huillashpapish shuj shinallaca manataj huillarcacunachu.

⁶⁰Chaimi curacunata mandajca, chaupipi shayarishcahuan Jesustaca: — Canta caicuna juchachicujpipish ¿manachu imata cutichingui? — nishpa tapujpipish,

⁶¹Jesusca imata mana cutichishpa upalla carcallami. Chaimi curacunata mandajca: — ¿Canca tucuicuna alli nishca Taita Diospaj Churi, Cristochu cangui? — nishpa cutin tapujpi,

⁶²Jesusca: — Ari, ñucaca chaimi cani. Runa Aichayujtaca, tucuita rurai tucuj Taita Diospaj alli ladoman tiyacujtapish, jahua pachamanta p'uyupi shamucujtapishmi ricunguichij — nircami.

⁶³Chaimi curacunata mandajca, yallitaj p'iñarishpa paipaj churanacunata lliquirishpa cashna nirca: — Ña mana ashtahuan huillajcunata ninchijchu.

⁶⁴Dios tucushpa mana manchashpa c'amijtaca, cancunallataj uyanguichijmi. Cunanca ¿imatataj yuyanguichij? — nijpimi, tucuicuna paica huañunatajmi can nircacuna.

⁶⁵Chashna nishpaca maijancunaca ch'ucashpami, ñahuita linsohuan huatashpa huajtarcacuna. Chaimantaca: “¡Maijantaj huajtanchij huillaiyari!” nircacunami. Huasita cuidajcunapish ñahuipimi c'hajyachircacuna.

⁶⁶Ucu huasi canllapi Pedro cajpimi, curacunata mandajpajta rurajcunamanta shuj servij huarmi shamurca.

⁶⁷Chai huarmica Pedro cunucujta ricushpami: — Canpish Nazaretmanta Jesushuanmi carcangui — nijpi,

⁶⁸Pedroca: — Paitaca mana rijsinichu. Can pimanta rimacushcatapish mana entendinichu — nirca. Chashna nishpa huasi canllaman yaicuna punguta llujshicujpica galloca cantarcallami.

⁶⁹Chai servij huarmillataj cutin Pedrota ricushpaca, tucui chaipi cajcunamanca: — Cai runapish, paicunapurallatajmari — ni callarijpimi,

⁷⁰Pedroca cutinllataj, mana rijsinichu nirca. Chai asha q'uipaca chaipi cajcunaca cutinmi Pedrotaca: — Canpish paicunapurallatajmi cangui. Galileamantatajmi cangui. Chaitajmari paicuna shinallataj rimangui — nircacuna.

⁷¹Chaimi Pedroca, ñuca llullajpica Taita Dios ñucata llaquichichun: — ¡Chai runataca mana rijsinichu. Pitachari nicunguichij! — nirca.

⁷²Pedro chashna nincami, galloca cutin cantarca. Chaimi Pedroca: “Gallo manaraj ishqui cutin cantajpimi, ñucataca quimsa cutin mana rijsinichu ningui” nishpa, Jesús nishcata yuyarishpa huacarca.