Read Chimborazo Highland Quichua MARCOS 15 Bible Online

MARCOS 15 - Chimborazo Highland Quichua bible

MARCOS 15

¹Ñalla pacarimugrijpimi, curacunata mandajcunaca, cunaj yuyajcunahuan, mandashcacunata quillcajcunahuan, mandajcunapuralla tandanacushcacunahuanpish tandanacushpa parlanacurcacuna. Chai q'uipami Jesustaca huatashcata Pilatopajman pusharcacuna.

²Pilatoca Jesustaca: — ¿Canca, judiocunata jatun Mandajchu cangui? — nijpi, Jesusca: — Ari, canllataj ña chashna ninguica — nirca.

³Chaimi curacunata mandajcunaca, Jesustaca caita chaita nishpa ashtahuan juchachircacuna.

⁴Cutinmi Pilatoca: — Riqui, cantaca achcata juchachicujpipish ¿manachu imata cutichingui imamí? — nirca.

⁵Ashtahuanpish Jesusca, imata mana nircachu. Chaimantami Pilatoca achcata mancharirca.

⁶Pilatoca pascua fiesta punllapica, paicuna maijanta cacharichun nishca shuj prezutami cacharij carca.

⁷Chaipica Barrabás shuti shuj runami tiyarca. Paica quiquin llajtamanta macanacungapaj jatarichishpami shujta huañuchishca carca. Chaimantami paihuan jatarijcunandij prezu tiyacurca.

⁸Pilatopajman achcacuna shamushpaca, paicuna ima shina ruraj cashca shinallatajmi shuj prezuta cacharichun mañai callarircacuna.

⁹Chaimi Pilatoca: — ¿Judiocunapaj jatun Mandajtachu cacharichun ninguichij? — nirca.

¹⁰Curacunata mandajcunaca, Jesustaca envidiallamanta huañuchichun nishcatami Pilatoca yacharca.

¹¹Ashtahuanpish curacunata mandajcunaca, Barrabasta cacharichun nichij nishpami, gentecunataca caparichun yachachircacuna.

¹²Cutinllatajmi Pilatoca: — Cancunallataj judiocunata jatun Mandaj nicushcataca ¿imatataj rurachun ninguichij? — nijpi,

¹³paicunaca: — ¡Paitaca chacatachun ninchijmi! — nishpami caparircacuna.

¹⁴Cutinllataj Pilatoca: — ¿Ima mana allitataj rurashcari? — nircami. Ashtahuanpish paicunaca: — ¡Chacatachun ninchijmi! — nishpami ashtahuan caparircacuna.

¹⁵Pilatoca gentecunapi alli ricurisha nishpami, Barrabasta cacharirca. Jesustaca azotichishca q'uipami, chacatachun curca.

¹⁶Chaimi soldadocunaca, Pilato mandana huasi canllaman Jesusta pushashpa, chaipi caj tucui soldadocunata tandachircacuna.

¹⁷Paicunaca amsa puca capata p'achallichishpami, umapica cashamanta ahuashca coronata churachircacuna.

¹⁸Chashna rurashpaca: — ¡Judiocunapaj jatun Mandaj allimari cangui! — nij tucunatami callarircacuna.

¹⁹Chaipica shuj carrizohuan umapi garrotishpami, ch'ucashpa, paipaj ñaupajpi cungurishpa adoraj tucurcacuna.

²⁰Chanzata rurashca q'uipaca, p'achallichishca amsa puca capata anchuchishpami, paipaj churanallatataj cutin churachishpa, chacatanaman pushangapaj llujshichircacuna.

²¹Jesusta chacatanaman pushacushpaca, chagramanta shamucuj Cirenemanta Simonhuanmi tuparca. Paitaca cai cruzta apari nishpami mandarcacuna. Paica Alejandropaj, Rufopaj yayami carca.

²²Jesustaca Gólgota shuti urcumanmi pusharcacuna. (Gólgota nishcaca: “Uma Tullu” nisha ninmi).

²³Chaipica, mirrahuan chagrushca vinotami ubyachishun nircacuna. Jesusca mana ubyarcachu.

²⁴Jesusta chacatashpaca maijanlla imata apana cashcata ricungapajmi Jesuspaj churanacunataca sorteashpa chaupircacuna.

²⁵Jesustaca iscun horas tutamantatami chacatarcacuna.

²⁶Imamanta huañuchishcata huillaj quillcapica: “Judiocunapaj jatun Mandajmi” nishcami tiyacurca.

²⁷Jesushuanca ishqui shuhuacunatapishmi chacatarcacuna. Shujtaca alli ladoman, caishujtaca lluqui ladomanmi chacatarcacuna.

²⁸Paicunahuan chacatajpimi: “Millaita rurajcunata shinallatajmi paicunahuan llaquichishca canga” nishpa Quillcachishcapi nishcaca pajtarca.

²⁹Chaita puricujcunaca, paicunapaj umata cuyuchishpami cashna nishpa c'amircacuna: — ¡Jajai! Canca, Taita Diospaj huasita urmachishpa, quimsa punllallapica cutin shayachishami nircanguica.

³⁰Canllataj quishpirishpa cruzmanta uricuiyari — nircacunami.

³¹Chai shinallatajmi curacunata mandajcunapish, mandashcacunata quillcajcunapish Jesustaca chanzata rurashpa, caishuj chaishuj cashna ninacurcacuna: — Shujtajcunataca quishpichircami, ashtahuanpish paillatajca manamari quishpiri tucunchu.

³²¡Israelcunapaj jatun Mandaj Cristo cashpaca, ñucanchij ricushpa cringapaj, cruzmanta cunanllataj uriyachun! — nircacunami. Jesushuan chacatashcacunapish c'amircacunami.

³³Chaupi punllamanta quimsa horas chishicamami tucui cai pacha amsayarca.

³⁴Chai horallatajmi Jesusca: — ¡Eloi, Eloi!, ¿lama sabactani? — nishpa sinchita caparirca. (Chaica: “Ñuca Dioslla, ñuca Dioslla, ¿ima nishpataj ñucallata saquihuanguiyari?” nisha ninmi).

³⁵Chaipi cajcunamanta maijancuna chaita uyashpaca: — Riquichij, Eliastamari cayacun — nircacunami.

³⁶Chaita uyashpaca chaipi cajcunamanta shujmi, callpashpa rishcahuan shuj esponjata japishpa vinagrepi satishpaca, carrizo puntapi churashpa Jesusman ubyachirca. Chashna rurashpaca: — Ricushunchij, ¿cruzmanta Elias uriyachij shamunchu, imamí? — nircami.

³⁷Jesusca, sinchita caparishpa huañurcallami.

³⁸Jesús huañujpica, Taita Diospaj huasi ucupi jarcachishca linsoca jahuamanta urimanmi chaupirirca.

³⁹Jesusta chacatashca ñaupajpi caj patsaj soldadocunata mandajca, caparishpa huañujta ricushpami: — ¡Caica Taita Diospaj Churitajmari cashca! — nirca.

⁴⁰Jesusta chacatashcataca achca huarmicunami carullamanta ricucurcacuna. Chai huarmicunapurapica, Magdalamanta María, q'uipa Jacobopaj, Josepaj mama Mariapish, Salomepishmi carca.

⁴¹Paicunaca Galileapi Jesús puricujpimi, paipajta rurashpa catimurcacuna. Jerusalenman Jesushuan huichiyamuj achca huarmicunapishmi carca.

⁴²Samana punllapaj allichina punllaca ñami chishiyarca.

⁴³Chai chishimi mandajcunalla tandanacushcapuramanta Arimateamanta caj José shamurca. Paica paicunapurapica alli nishcami carca. Paipish Taita Dios mandana punllata shuyacujmi carca. Paimi mana manchashpa, Pilatopajman shamushpaca Jesuspaj cuerpota pambangapaj mañarca.

⁴⁴Jesusca ñami huañushca nijta Pilato uyashpaca, mancharishpami huañurcatajchu imashi nishpa yuyacurca. Patsaj soldadocunata mandajta cayashpa, ñachu huañun nishpa,

⁴⁵tapujpimi patsaj soldadota mandajca: — Ari, ñami huañun — nijpi Pilatoca: Shinashpaca Jesuspaj cuerpotaca pambagrichun Joseman cugrichij nirca.

⁴⁶Joseca shuj linsota randishpami, Jesuspaj cuerpota uricuchishpaca linsohuan pilluchirca. Chaimantaca sinchi q'uillinpi quinriman jutcushcapi churashpami, jatun rumita singuchishpa jutcutaca huichcarca.

⁴⁷Jesusta maipi churajtaca, Magdalamanta Mariapish, Josepaj mama Mariapishmi ricurcacuna.