Read Chimborazo Highland Quichua MARCOS 3 Bible Online

MARCOS 3 - Chimborazo Highland Quichua bible

MARCOS 3

¹Cutinmi Jesusca sinagogaman yaicurca. Chaipica, chaquishca maquiyuj shuj runami tiyarca.

²Chai samana punllapi chai runata alliyachijpi, juchachingapajmi Jesustaca chaparacurcacuna.

³Chaquishca maquiyuj runataca Jesusca: — Jatari, caicunapaj chaupipi shayari — nircami.

⁴Jesusca chaipi cajcunataca: — Samana punllapica: ¿Allita ruranachu, mana cashpaca mana allita ruranachu, huañuimanta quishpichinachu, mana cashpaca huañuchinachu, imata ruranataj samana punllapica alli canga? — nishpa tapujpi paicunaca mana rimarcacunachu.

⁵Chaimi Jesusca p'iñarishpa paicunapaj ñahuita ricurashpa paicunapaj shungu rumi shina cajpi llaquirishpa chai ungushca runataca: — Cambaj maquita chutai — nijpi, pai chutajpica chai maquica alliyarcalla.

⁶Chaimanta fariseocuna llujshishpaca, Herodespura caj maijancunahuan tandanacushpami, Jesusta ima shina chingachinata yuyarircacuna.

⁷Jesús chaimanta paipaj yachacujcunandij cucha uriman rijpica, Galileamanta achcacunami catircacuna. Judeamantapish,

⁸Jerusalenmantapish, Idumeamantapish, Jordán yacu ch'imbanijmantapish, Tiro, Sidón muyundijcunamantapishmi catircacuna. Jesusca achca allicunata ruracun nijta uyashpami yallitaj achcacuna paipajman shamurcacuna.

⁹Chaimi Jesusca paipaj yachacujcunataca, chai tucuicuna jundamushpa paita ama llapichun, shuj barcotaca rinallata charichun nirca.

¹⁰Achca ungushcacunata Jesús alliyachishcamantami, tucui laya yallitaj millai unguihuan cajcunapish alliyashca cashun nishpa Jesuspi tuparingapaj c'uchuyacurcacuna.

¹¹Millai espiritucuna japishcacunapish Jesusta ricushpaca, paipaj ñaupajpi cungurishpa cumurishpaca: — ¡Canca Taita Diospaj Churimi cangui! — nishpami caparircacuna.

¹²Ashtahuanpish Jesusca, pi cashcata paicuna ama yachaj chayachichunmi sinchita rimashpa jarcarca.

¹³Chai q'uipami Jesusca urcuman huichiyashpa, paita catijcunataca pai cayasha nishcacunallata cayajpi paipajman c'uchuyarcacuna.

¹⁴Chaicunataca chunga ishquicunatami paihuan cachun, paimanta huillanaman cachangapaj,

¹⁵ungushcacunata alliyachij canata cungapaj, supaicunata llujshichi tucuipaj canata cungapaj cayarca.

¹⁶Paicunaca caicunami: Shujca Pedro shutita Jesús shutichishca Simón,

¹⁷Zebedeopaj churi Jacobo, Jacobopaj huauqui Juanpishmi carca. Paicunatami Jesusca Boanerges nishpa shutichirca. Chaica “C'ulun nijpaj churicuna” nisha ninmi.

¹⁸Shinallataj Andrés, Felipe, Bartolomé, Mateo, Tomás, Alfeopaj churi Jacobo, Tadeo, llajtapi quiquin mandajta charingapaj macanacujpuramanta Simonpish,

¹⁹Jesusta huañuchichun japichij Judas Iscariotepishmi carca. Chaimantaca huasiman tigrajpimi,

²⁰cutinllataj yallitaj achcacuna tandanacumujpi, micungapajllapish mana pajtarircacuna.

²¹“Jesustaca yuyai illaj tucushpami puricun” nijta paipaj familiacuna uyashpami japishpa pushangapaj shamurcacuna.

²²Mandashcacunata quillcajcuna Jerusalenmanta shamushpaca: “Caica Beelzebuhuanmari. Paica supaicunata mandajhuan cashpami, supaicunataca llujshichin” nircacunami.

²³Chaimi paicunata cayashpaca, yuyachij parlocunahuan cashna rimarca: — ¿Maitataj Satanasca, Satanasllatatajca llujshichingari?

²⁴Maijan llajtapi mandajcunapurallataj p'iñanacushpa chaupirijpica, paicuna mandacushcaca chingarinmanllami.

²⁵Shuj huasipi causajcunapish quiquinpurallataj p'iñanacushpa chaupirinacujpica, chai huasi familiaca chingarinmanllami.

²⁶Chai shinallatajmari Satanaspurallataj p'iñanacushpa chaupirinacujpica, pai mandacushcaca ña chingarinman.

²⁷Maijanpish c'ari c'ari runapaj huasiman yaicushpa imalla charishcacunata shuhuasha nishpaca, paita manaraj huatashpaca imata mana shuhuai tucunmanchu.

²⁸Gentecunataca ima juchacunatapish, p'iñashpa c'amishcacunatapish perdonangami. Chashnatajmi canga.

²⁹Ashtahuanpish jucha illaj Espirituta p'iñashpa c'amijcunataca manataj perdonangachu. Huiñaipaj jatun llaquiman rinapajtajmi — nircami.

³⁰“Millai espiritutamari charin” nishcamantami Jesusca paicunataca chashna nirca.

³¹Chashna yachachicujpimi Jesuspaj huauquicunapish paipaj mamapish chayamushpaca, mana yaicushpa canllamanta cayaj cacharca.

³²Chaimi Jesuspaj muyundijpi tiyacujcunaca: — Cambaj mamapish, huauquicunapish canllapimari canta mashcacuncuna — nircacuna.

³³Chaimi Jesusca: — ¿Pitaj ñuca mama, pitaj ñuca huauquicunaca? — nirca.

³⁴Shina nishpaca paipaj muyundijpi tiyacujcunata ricuchishpami cashna nirca: — Caicunami ñuca mama, ñuca huauquicuna.

³⁵Taita Dios munashcata maijanpish cazujcunami ñuca huauqui, ñuca pani, ñuca mamaca — nircami.