Read Chimborazo Highland Quichua MARCOS 7 Bible Online

MARCOS 7 - Chimborazo Highland Quichua bible

MARCOS 7

¹Fariseocunapish, mandashcacunata quillcajcunapish Jerusalenmanta maijan shamushcacunami Jesuspajman c'uchuyashpaca,

²Jesuspaj maijan yachacujcuna mapa maquihuan tandata micucujta ricushpaca, cai maquita mana maillashpa micujcunaca mana allichu nishpa rimarcacuna.

³(Fariseocunapish, tucui judiocunapish paicunapaj ñaupa yayacuna yachachishca shina maquita cutin cutin mana maillashpaca mana micuncunachu.

⁴Plazamanta tigramushpapish, mana maillashpaca imata mana micuncunachu. Shujtaj achca ruranacunatapishmi, chaitataj rurashpa pajtachincuna. Ubyana pilchicunata, huallucunata, fierromanta rurashca imacunatapish maillancunami. C'atacunata, mantacunatapish tajshancunami).

⁵Chaimi fariseocunapish, mandashcacunata quillcajcunapish Jesustaca: — ¿Ima nishpataj cambaj yachacujcunaca, ñaupa yayacuna yachachishca shina mana purishpa ashtahuanpish mapa maquihuan tandata micunllacuna? — nishpa tapurcacuna.

⁶Chaimi Jesusca: — ¡Mishqui shimi, jayaj shungucuna! Profeta Isaiasca allimi cancunamantaca cashna nishpa quillcashca: “Cai gentecunaca ñucataca shimillahuanmi allimari cangui nincuna. Ashtahuanpish paicunapaj shunguca, ñucamanta carupimi.

⁷Ñucataca yangallami allimi cangui nij tucunguichij. Runacuna yachachishcallatami Taita Dios mandashcami nishpa yachachinguichij” nishcami — nircami.

⁸Cancunaca Taita Dios mandashcata saquishpami, runacuna yachachishcata pajtachina yuyailla pajtachishpa causacunguichij: Huallucunata, ubyana pilchicunatapish maillajcunami canguichij. Chai shinallataj shujtajcunatapish rurajcunami canguichij — nircami.

⁹Caitapishmi nirca: — Cancuna yachachishcallata pajtachingaraicullami, Taita Dios mandashcataca yangalla cashcata ruranguichij.

¹⁰Moisesca: “Cambaj yaya mamata alli ningui. Yaya mamata maijanpish llaqui tucushca canman nijtaca, huañuchishcataj cachun” nishcami.

¹¹Ashtahuanpish cancunaca: “Yayata mamata ayudana cashcata mana ayudashpaca, cancunapaj yayamanca mamamanca cashpa ninguichijlla nishpami yachachinguichij: Tucui ñuca charishcatamari Corbán nircani chaimanta canman ayudana cashcataca mana cui tucunichu nichunmi” yachachinguichij. (Corbán nishpaca: “Taita Diospaj ofrendami” nisha ninmi).

¹²Chashna yachachishpaca paicunapaj yaya mamapaj ashtahuan allicunata rurachunmi mana saquinguichij.

¹³Cancunapaj yuyaimanta yachachishcacunata rurachishpami, Taita Diospaj Shimitaca yangata ruranguichij. Achca shujtajcunatami, chai shinallataj ruracunguichij — nircami.

¹⁴Tucui chaipi cajcunata Jesús cayashpaca: — Caita alli uyashpa entendichij:

¹⁵Shimita yaicujca, runataca mana juchayujta ruranchu. Ashtahuanpish shungumanta shimiman llujshijmi runataca juchayujta ruran.

¹⁶Maijanpish uyanapaj rinrinta charijca uyaichigari — nircami.

¹⁷Tucui chaipi cajcunamanta rishpa huasiman Jesús yaicujpimi, yachacujcunaca yuyachij parlocuna imata nisha nishcata tapurcacuna.

¹⁸Chaimi Jesusca: — ¿Cancunapishchu paicuna shinallataj mana entendi tucunguichij? Shimita imapish yaicujca, pita mana mapayachij cashcataca ¿manachu entendinguichij?

¹⁹Imapish shimita yaicujca shungumanca mana yaicunchu. Ashtahuanpish huijsaman rishpa q'uipataca mapa tucushpa llujshinllamari — nircami. Chashna nishpaca, tucui imatapish micunalla cashcatami huillarca.

²⁰Ashtahuanpish shungumanta llujshijmi pitapish mapayachin.

²¹Shungu ucumantaca caicunami llujshin: Millai yuyaicuna, huainayana, apanacushpalla causana, huañuchina,

²²shuhuana, quiquinpajlla charinata munana, millai munaicunata rurana, umana, yallitaj aicha munaita mana jarcari tucuna, envidiana, yanga juchachina, jatun tucuna, c'hahuan canapishmi llujshin.

²³Cai tucui millai yuyaicunaca shungumanta llujshishpami, pita cashpapish mapayachin — nircami.

²⁴Chaimanta Jesús jatarishpaca, Tiro, Sidón llajtacunamanmi rirca. Chaipica pi ama yachachun nishpami, shuj huasiman yaicurca. Ashtahuanpish mana miticui tucurcachu.

²⁵Shuj huarmica Jesús chaipi cashcata yachaj chayashcahuanmi paipajman shamushpa paipaj ñaupajpi cungurirca. Chai huarmipaj ushushica millai espíritu japishcami carca.

²⁶Paica Sirofeniciapi huacharishca griega huarmimi carca. Paipaj ushushimanta supaita llujshichichunmi Jesustaca rogarca.

²⁷Chaimi Jesusca: — Shuyairaj, huahuacunaraj mana nijta micuchun, huahuacunapaj tandata japishpa allcucunamanraj shitanaca mana allichu — nijpi,

²⁸chai huarmica: — Ari, Amito. Shina cajpipish huahuacuna micucushpa urmachishcataca allcucunapish micunllacunami — nircami.

²⁹Chaimi Jesusca: — Can chashna nishcamantaca cambaj ushushimantaca, supaica ñami llujshirca, rilla — nijpi.

³⁰Chai huarmi paipaj huasiman chayashpaca, paipaj ushushimanta supai ña llujshijpi alli tucushpa camapi siricujtami japirca.

³¹Chai q'uipami Jesusca Tiro shuti llajtamanta tigramushpaca, Sidón shuti llajtatapish, Decápolis llajtatapish pasamushpa Galilea cuchaman chayamurca.

³²Jesús chaipi cajpimi, mana uyaj, mana rimaj runata pushamushpaca, paipaj jahuapi maquita churachun rogarcacuna.

³³Chaimi Jesusca chai runataca chaipi cajcunamanta ashata caruyachishpa rinrincunapi dedocunata churashpa, c'allupipish c'hucahuan churashpa,

³⁴jahuata huichilla ricushpa, aij nishpaca: “¡Efata!” nirca. (Efata nishpaca: “Pascari” nisha ninmi).

³⁵Jesús chashna nincami paipaj rinrincunaca pascarirca, c'allupish cacharirijpi alli rimarcallami.

³⁶Chaitaca amataj piman huillanguichijchu nishpa chaipi cajcunata cutin cutin mandacujpipish, ashtahuan ashtahuan huillarcallacunami.

³⁷Chaita uyajcunaca achcata mancharishpami: — Tucuitamari allita ruran. Mana uyajcunatapish uyajtami ruran, mana rimajcunatapish rimajtami ruran — nircacuna.