Read Chimborazo Highland Quichua MARCOS 8 Bible Online

MARCOS 8 - Chimborazo Highland Quichua bible

MARCOS 8

¹Chai punllacunami achcacuna Jesuspajman shamushpa tandanacurcacuna. Chaicunaca ima micunapish illajlla cajta ricushpami Jesusca paipaj yachacujcunata cayashpa:

²— Caipi cajcunaca ñamari quimsa punllacunata ñucahuan caipi. Ima micunata mana charijpimi paicunataca llaquinayan.

³Taucacunami caru llajtamanta shamushcacuna. Mana micushcata huasiman cachajpica, ñahui amsayashpa ñanpi urmanamantami paicunataca mana cachai tucuni — nirca.

⁴Chaimi yachacujcunaca: — ¿Pitaj maimantataj cai shitashca pambapica, cai tucuicunamanca carangari? — nijpi,

⁵Jesusca: — ¿Mashna tandatataj charinguichij? — nijpi paicunaca: — Canchis tandallatami charinchij — nircacuna.

⁶Chaimi tucui chaipi cajcunataca pambapi quinrilla siririchun mandarca. Chai canchis tandata japishpaca, Taita Diosta pagui nishpami chaupishpa chaupishpa paipaj yachacujcunaman curca. Yachacujcunaca tucui chaipi cajcunamanmi cararcacuna.

⁷Yachacujcunaca asha chalhuacunatapishmi charircacuna. Taita Diosta pagui nishpaca, chaicunatapish carachunmi curca.

⁸Chaitaca tucuicunami mana nijta micurcacuna. Puchushca mirga mirgataca canchis canasta jundatami tandarcacuna.

⁹Micujcunaca chuscu huaranga shinami carca. Carashca q'uipaca Jesusca cayacamachij nishpaca,

¹⁰yachacujcunandij barcoman yaicushpami, Dalmanuta llajtaman rirca.

¹¹Fariseocuna shamushpaca, Jesús imapi pandarijpica juchachingapaj nishpami, jahua pachamanta cashpaca milagrota rurashpa ricuchi nishpa Jesushuan rimanacui callarircacuna.

¹²Chaimi Jesusca shungu llujshishpa: — Cai punllacunapi causajcunaca ¿ima nishpataj milagrota rurachun nincunachu imamí? Paicunamanca ima milagrota manataj ricuchishcachu canga. Chashnatajmi canga — nirca.

¹³Paicunata chaipi saquishpaca, barcoman cutin yaicushpami cucha caishuj lado uriman ch'imbarca.

¹⁴Yachacujcunaca tandata apanatami cungashca carca. Barcopica shuj tandallatami charircacuna.

¹⁵Jesusca: — Riquichij, fariseocunapaj Herodespaj levaduramantaca huaquichiringuichij — nijpimi,

¹⁶yachacujcunaca: — Tandata mana apamushcamantami chashna nin — ninacurcacuna.

¹⁷Chaita Jesús yachashpami: — ¿Imatataj rimanacucunguichij? ¿Tandata mana charishcamantachu rimanacunguichij? ¿Manarajchu entendinguichij, manarajchu yuyaita japinguichij? ¿Cancunapaj shunguca rumi shinarajchu?

¹⁸¿Ñahuita charishpapish manachu ricunguichij, rinrinta charishpapish manachu uyanguichij? ¿Manatajchu yuyaringuichij?

¹⁹Pichca huaranga gentecunaman pichca tandamanta ñuca chaupishpa chaupishpa carajpica ¿mashna canasta jundatataj puchushcacunataca tandarcanguichij? — nijpica, paicunaca: — Chunga ishqui canastata — nircacunami.

²⁰— Shinallataj canchis tandamanta chuscu huaranga gentecunaman ñuca chaupishpa chaupishpa carajpica ¿mashna canasta jundatataj puchushcacunataca tandarcanguichij? — nijpi paicunaca: — Canchis canastata — nircacunami.

²¹Chaimi Jesusca: — Chaita ricushca jahuachu ¿manaraj entendinguichij? — nirca.

²²Chai q'uipami Jesusca, Betsaidaman chayarca. Jesús chaipi cajpimi, mana ricuj runata pushamushpa, paipi tuparichun rogarcacuna.

²³Chaimi Jesusca mana ricuj runataca maquimanta japishpa, chai pueblomanta llujshichishpa, chai runapaj ñahuipi ch'ucata churashpa, maquicunata paipaj jahuapi churashpaca: ¿Imallatapish ricunguichu? nishpa tapujpi,

²⁴ña ricushpaca: — Runacunaca yuracuna shinami ricurin. Paicunaca puricuncunamari — nirca.

²⁵Chaimi Jesusca, maquicunata ñahuipi churashpaca: “Cutin ricui” nirca. Chaipica ña alliyashpa mai carutapish tucuita alli ricucujmi saquirirca.

²⁶Chaimi Jesusca: — Chai pueblomanpish ama tigrashpa, alliyachishcatapish piman ama huillashpa cambaj huasiman rilla — nishpa cacharca.

²⁷Jesusca paipaj yachacujcunandij, Filipo callarichishca Cesarea pueblocunaman ñanta ricushpami, paipaj yachacujcunataca: — Gentecunaca ¿pi cashcatataj ñucataca yuyancuna? — nishpa tapujpi,

²⁸paicunaca: — Shujcunaca, Bautizaj Juanmi. Caishujcunaca, Eliasmi. Maijancunaca profetacunamanta maijantajshimari yuyachin nincunami — nircacuna.

²⁹Chaimi Jesusca: — Cancunaca ñucataca ¿pi cashcatataj yuyanguichij? — nijpi, Pedroca: — Canca Cristomi cangui — nirca.

³⁰Chaimi paipaj yachacujcunataca: “Ñuca pi cashcataca pajta piman huillanguichijman” nirca.

³¹Chaipimi Jesusca, Runa Aichayujca achca llaquita apanatajmi can nishpa yachachi callarirca. Cunaj yuyajcunapish, curacunata mandajcunapish, mandashcacunata quillcajcunapish paitaca yangallami nishpami huañuchingacuna. Huañuchijpipish quimsa punllapica causaringallami nircami.

³²Yachacujcuna alli entendichunmi chashna nishpa huillarca. Pedroca Jesusllata chaininijman pushashpami ama chashna nirichu nishpa jarcasha nirca.

³³Ashtahuanpish Jesusca yachacujcunata tigrarishpa ricushpami Pedrotaca: — ¡Ñuca ñaupajmanta anchui, Satanás! Taita Dios imata pajtachisha nicushcataca mana yuyanguichu. Ashtahuanpish runacunapaj yuyaillatami yachangui — nirca.

³⁴Gentecunatapish, yachacujcunatapish cayashpaca: — Maijanpish ñucata catisha nijca, quiquin causaita ama llaquichun. Chacatashca shina llaquita apana tucushpa ñucata catichun.

³⁵Pipish quiquin causaita quishpichisha nijca, chingaringami. Pipish ñucata catishcamanta, alli huillaimantapish quiquin causaita chingachijcunami, quishpiringa.

³⁶Runaca cai pachapi tucui tiyajcunata japishpapish, paipaj almata chingachishpaca ¿ima allitaj cangari?

³⁷Paipaj almata quishpichingapajca ¿imatashi cunga?

³⁸Cunan cai punllacunapi causaj huainayaj millaicunapaj ñaupajpi, ñucamanta, ñuca yachachishcacunamantapish maijan pingarijtaca Runa Aichayuj ñucaca jucha illaj angelcunandij, ñuca Yayapaj achij nicuj sumaj cashcahuan shamushpaca, paimantapish pingarishami — nircami.