Read Chimborazo Highland Quichua MARCOS 9 Bible Online

MARCOS 9 - Chimborazo Highland Quichua bible

MARCOS 9

¹Jesusca cashnapishmi nirca: — Taita Dios tucuita rurai tucuj cashcahuan mandangapaj shamujta ricungacama, maijan caipi cajcunaca manaraj huañungacunachu. Chashnatajmi canga — nircami.

²Sujta punlla q'uipami Jesusca, Pedrota, Jacobota, Juantapish paicunallata pushashpa shuj jatun urcuman rirca. Chaipimi Jesusca paicunapaj ñaupajpi shujtajyarirca.

³Paipaj churanacunapish rasu shina lamyacujmi tucurca. Cai pachapica chai shina yurajnicujtaca, pi mana tajshai tucunchu.

⁴Chaipica Eliaspish, Moisespish Jesushuan parlanacucujta ricushpami,

⁵Pedroca, Jesustaca: — ¡Yachachij, ñucanchij caipi canaca allimari cashca! Can munajpica quimsa chujllacunata rurashun: Shujtaca quiquinpaj, caishujtaca Moisespaj, chaishujtaca Eliaspaj — nirca.

⁶Tucuicuna manchaihuan cashcamantami, Pedroca imata rimacushcata mana yachashpa chashna nirca.

⁷Pedro chashna nicujpirajmi, paicunapaj jahuamanca p'uyu shamushpa taparca. Chai p'uyumantaca: “Caimi ñuca c'uyashca Churi, paita uyaichij” nishpa rimashca uyarijpi,

⁸paicuna muyundijta ricushpaca, pita mana ricurcacunachu. Ashtahuanpish Jesusllatami chaipi cajta ricurcacuna.

⁹Chai urcumanta uriyamucushpami Jesusca paihuan rij yachacujcunataca: “Cancuna ricushcataca, Runa Aichayuj huañushcacunapaj chaupimanta causaringacama, pajta piman huillanguichijman” nishpami mandarca.

¹⁰Chaimi paicuna ricushcataca paicunapaj shungullapi huaquichircacuna. “Huañushcacunapaj chaupimanta causarina” nishpaca ¿imatashi nisha nin? nishpa parlanacucushpami,

¹¹Jesustaca: — ¿Ima nishpataj mandashcata quillcajcunaca, Eliasrajmi shamunga nincuna? — nishpa tapurcacuna.

¹²Chaimi Jesusca: — Ari, chaica chashnami. Eliasraj punta shamushpami paica tucuita allichinga. Chashna cajpipish Quillcachishcapica: Runa Aichayujtaca mana ricunachishpami achcata llaquichishca canga ninmi.

¹³Ashtahuanpish cashnami nini: Eliasca ñami shamurca. Quillcachishcapi paimanta huillashca shinallatajmi, paicuna munashcata rurarcacuna — nircami.

¹⁴Chaishuj yachacujcuna maipi cashcaman Jesús chayamushpaca, paicunapaj muyundijpica achcacuna cajta, mandashcacunata quillcajcunahuan yachacujcunahuan rimanacucujtapishmi ricurca.

¹⁵Chaipi cajcunaca Jesusta ricushcahuanmi achcata cushicushpa, callpashpa paipajman rishpaca, allillachu cangui nircacuna.

¹⁶Jesusca yachacujcunataca: — ¿Imatataj paicunahuanca rimanacucunguichij? — nijpimi,

¹⁷chaipi cajcunamanta shujca: — Yachachij, ñuca churitami cambajman pushamurcani, paimari upayachij espirituta charin.

¹⁸Chai espiritumari maipipish chujchuchishpa pambaman urmachijpi shimiman puscuta shitashpa, quirucunatapish canirishpa chaquirishpa catinlla. Ñucaca cambaj yachacujcunatami, chai millai espirituta llujshichipaichij nircani. Ashtahuanpish mana llujshichi tucuncunachu — nijpimi,

¹⁹Jesusca: — ¡Huahua huahuami mana crijcuna canguichij! ¿Maicamataj cancunahuan causacushalla? ¿Maicamataj cancunataca yachachicushalla? Chai huambrata caiman pushamuichij — nirca.

²⁰Ña pushamujpica chai espirituca Jesusta ricushpami, chai huambrataca manchanayajta chujchuchijpi pambaman urmashpa, chai huambraca singurishpa shimimanpish puscuta shitarca.

²¹Chaimi Jesusca chai huambrapaj yayataca: — ¿Ima horamantataj chashnaca tucun? — nijpi, yayaca: — Huahuamanta pachami chashna.

²²Huañuchingapajmi tauca cutin ninapi, yacupi urmachinlla. Quiquinca imallatapish rurai tucushpaca, ñucanchijta llaquishpa ayudahuayari — nijpimi,

²³Jesusca: — ¿Canca cringuichu? Pipish crijpajca, tucui imapish jahuallami — nirca.

²⁴Chashna nincami huambrapaj yayaca: — Ari crinimi, tucui shunguhuan alli cringapaj ashtahuan crina yuyaita cuhuai — nishpa caparirca.

²⁵Achcacuna jundarimujta ricushpami, Jesusca chai millai espiritutaca: — Upa, mana uyaj espíritu paimanta llujshichunmi ñucaca mandani, ñataj cutinca paipi yaicunguiman — nishpami sinchita rimarca.

²⁶Chai espirituca caparirishpa, huambrata maipish cachun chujchuchishpa llujshijpimi, huambraca huañushca shina saquirca. Chaimi achcacuna: “Huañunmari” ninacurcacuna.

²⁷Ashtahuanpish Jesusca maquimanta japishpa jatarichijpica, chai huambraca shayarircallami.

²⁸Huasiman Jesús yaicujpimi yachacujcunaca: — ¿Ima nishpataj ñucanchijca mana llujshichi tucurcanchij? — nishpa paillata tapujpi,

²⁹Jesusca: — Chai shina supaicunaca mana llujshinllachu. Taita Diosta mañashcahuan ayunashcahuanmi llujshincuna — nirca.

³⁰Chaimanta llujshishpaca Galileatami rircacuna. Jesusca pai chaipi cajtaca, pi ama yachanman yuyacurcami.

³¹Chaipimi paipaj yachacujcunamanca: — Runa Aichayujtaca gentecunapaj maquipi entregajpimi huañuchingacuna. Ashtahuanpish huañushcamanta quimsa punlla q'uipaca causaringallami — nishpami yachachirca.

³²Chaitaca paicunaca imata nisha nishcata mana entendircacunachu. Tapunatapish mancharcacunami.

³³Capernaumman Jesús chayashpaca, huasipi cashpami yachacujcunataca: — ¿Imatataj ñanpica cancunapuralla rimanacumunguichij? — nirca.

³⁴Ashtahuanpish ñanpi paicunapuralla, maijanshi jatun cashun ninacushcamantami, paicunaca upalla saquirircacuna.

³⁵Chaimi Jesusca tiyarishpa, chunga ishquicunata cayashpaca: — Maijanpish puntapi casha nishpaca, yangalla tucushpami tucuicunapajta ruraj cana — nircami.

³⁶Chaipica shuj huahuata japishpa paicunapaj chaupipi churashpa huahuata marcashpami:

³⁷— Maijanpish cai huahua shina caj ñuca Shutipi shamujta chasquijca, ñucatami chasquin. Ñucata chasquijca mana ñucallatachu chasquin, ashtahuanpish ñucata cachajtapishmari chasquin — nirca.

³⁸Chaipimi Juanca: — Yachachij, shuj runatami cambaj shutipi supaicunata llujshichicujta ricurcanchij. Paica mana ñucanchijpura cajpimi, ama chashna ruraichu nircanchij — nijpimi,

³⁹Jesusca: — Chashna rurajtaca ama jarcaichijchu. Maijanpish ñuca shutipi milagrota rurajca, chai q'uipaca ñucataca ima mana allita mana ni tucunchu.

⁴⁰Maijanpish ñucanchijta mana p'iñajca, ñucanchijpurallatajmi.

⁴¹Cancunaca ñucapaj cashcamanta paicunaca Cristopajmi nishpa, vaso yacullatapish maijanpish cujmanca Taita Diosca pai japina cashcataca cungatajmi. Chashnatajmi canga.

⁴²Cai uchilla huahuacuna shina ñucata crij tucujpi pandachijtaca, maijan cajpipish cutana rumita cungapi huatashpa, mama cuchapi ucujta shitanami ashtahuan alli.

⁴³Chaimanta cambaj maqui maipi urmachisha nijpica, p'itishpa shitangui. Ishqui maquindij huiñaita rupacuj ninapi shitashca canapaj randica, shuj maqui illajlla causaiman yaicunami ashtahuan alli.

⁴⁴Ucu pachapica c'urucunapish mana huañunchu, ninapish rupacunllami.

⁴⁵Cambaj chaqui maipi urmachisha nijpica, p'itingui. Ishqui chaquindij ucu pacha manataj huañuj ninapi shitashca canapaj randica, shuj chaqui illajlla causaiman yaicunami ashtahuan alli.

⁴⁶Ucu pachapica c'urucunapish mana huañunchu, ninapish rupacunllami.

⁴⁷Shinallataj cambaj ñahui maipi urmachisha nijpica, surcushpa shitangui. Ishqui ñahuindij ucu pachapi shitashca canapaj randica, Taita Dios mandacujpica shuj ñahui illajlla yaicunami ashtahuan alli.

⁴⁸Ucu pachapica c'urucunapish mana huañunchu, ninapish rupacunllami.

⁴⁹Tucuicunami alli cangapajca ninapi rupachishca shina llaquicunata apangacuna. Shinallataj Taita Diosman cushcata rupachinapish cachihuan churashcami canga.

⁵⁰Cachica tucuipaj allimari. Ashtahuanpish cachi ña mana mishquichijpica ¿imahuanshi mishquichinguichijman? Cancunaca cachi shina mishquichijcuna caichij, caishuj chaishujhuan sumajta causaichij — nircami.