Read Chimborazo Highland Quichua LUCAS 11 Bible Online

LUCAS 11 - Chimborazo Highland Quichua bible

LUCAS 11

¹Chai q'uipami Jesusca Diosta mañacurca. Pai ña tucuchijpica paipaj yachacujcunamanta shujca: — Mandaj Jesús, ñucanchijtapish Taita Diosta mañanata yachachi. Bautizaj Juanpish paipaj yachacujcunataca Taita Diosta mañanata yachachircami — nirca.

²Chaimi Jesusca cashna nirca: — Cancuna mañashpaca cashna ninguichij: “Jahua pachapi caj ñucanchij Yaya, cambaj jucha illaj shutitaca, alli nishca cachun. Can mandana punlla ña chayamuchun. Ima shinami jahua pachapi can munashcata ruracun, shinallataj cai pachapipish can munashcata rurachun.

³Ñucanchij punllanta micunata cunanpish cuhuai.

⁴Ima shinami shujtajcuna ñucanchijta ima mana allita rurashcacunata perdonanchij, shinallataj ñucanchij juchacunatapish perdonapai. Ima mana allipi urmachun, ama saquihuangui. Tucui millaimanta huaquichihuangui” — nircami.

⁵Jesusca caitapishmi nirca: — Maijan cancuna alli rijsishcata charishpaca, chaupi tuta paipaj huasiman rishpaca: “Amigo, quimsa tandata fiyachi.

⁶Ñucahuan shuj alli apanacujmi carumanta cunanlla chayamun. Paimanmi imata mana carai tucuni” ningachari.

⁷Ucuman cajca caishujtaca: “Ama p'iñachichu, pungupish ñamari huichcashca. Ñucapish huahuacunahuan ñami dormicuni. Canman cungapajca mana jatari tucunichu” ningachari.

⁸Chashna nicushpapish ama ashtahuan p'iñachichun jatarishpa tucui imalla mañashcata cunmanmi. Mana paihuan apanacuj cashcamantachu chashna ruranman. Ashtahuanpish mana saquirishpa mañacujllapimi chashna ruranman.

⁹Chaimanta cashnami nini: Diostaca mañacuichijlla, paica cungami. Mashcacuichijlla, japinguichijmi. Huasiyuj nicuichijlla paica pascangami.

¹⁰Maijanpish mañajca, chasquinmi. Mashcajpish, japinmi. Huasiyuj nijpish, pascajpica yaicunmi.

¹¹¿Maijan yayataj tandata cancunapaj huahua mañajpica, rumita cunguichijman? Chalhuata mañajpipish ¿culebratachu cunguichijman?

¹²Shinallataj lulunta mañajpica ¿escorpiontachu cunguichijman?

¹³Cancunaca mana allicuna cashpapish, cancunapaj huahuacunamanca imatapish allitamari cunguichij. ¿Manachu jahua pachapi caj cancunapaj Yayacarin jucha illaj Espirituta cuhuai nishpa mañajcunamanca cungalla? — nircami.

¹⁴Chai q'uipami Jesusca mana rimajta ruraj supaita shuj runamanta llujshichirca. Supaita llujshichijpica, mana rimaj runaca rimarcallami. Chaipi cajcuna chaita ricushpaca achcatami mancharircacuna.

¹⁵Ashtahuanpish chaipi cajcunamanta maijancunaca: — Caica supaicunata mandaj Beelzebú diablohuan cashpamari, supaicunataca llujshichin — nircacunami.

¹⁶Shujtajcunaca Jesús imapi pandarijpica, juchachingapaj nishpami, jahua pachamanta cashpaca milagrota rurashpa ricuchi nircacuna.

¹⁷Jesusca paicuna ima shina yuyacujta yachashpami cashna nirca: — Maijan llajtapi mandajcunapurallataj p'iñanacushpa chaupirijpica, paicuna mandacushcaca chingarinmanllami. Shinallataj huasi ucupi causajcunapurapish quiquinpurallataj p'iñanacujpica chingarinmanllami.

¹⁸Chai shinallataj Satanaspish paicunapurallataj chaupirinacujpica pai mandacushcaca chingarinmanllami. “Beelzebuhuan cashpamari, supaicunataca llujshichin” nishcamantami chashna nini.

¹⁹Ñucataca Beelzebú diablohuan cashcamantami, supaicunata llujshichin ninguichijmi. Cancunapaj yachacujcunaca ¿pihuan cashpataj supaicunata llujshichin? Supaicunata paicuna llujshichishpaca, ñucaca Diosmanta cashcata, cancunaca pandaricushcatami ricuchin.

²⁰Ashtahuanpish ñucaca Diospaj maquihuanmi, supaicunataca llujshichini. Ñuca chashna rurashpaca, Dios mandana cancunapajman ña chayamucushcatami ricuchini.

²¹C'ari c'ari runa alli allichirishca macanacunatapish maquipi charirashpa paipaj huasita chaparacujpica, ima huaquichishcapish tiyacunllami.

²²Chashna cajpipish paita yalli c'ari c'ari runa shamushpaca, pai shunguta churashpa charicushca macanacunatapish quichushpa tucui imalla charishcacunatapish apashpaca, paihuan cajcunahuanmi chaupinacunman.

²³Maijanpish ñucahuan mana shujlla cajca, ñucata p'iñajmi. Maijanpish mana ñucahuan tucushpa tandachijca, ñuca tandachisha nishcatapish urata janajta cachashpa chingachijmi.

²⁴“Mapayachij espíritu runamanta llujshishpaca, shitashca pambacunatami samarinata mashcashpa purin. Samarinata mana japishpaca: “Ñaupa ñuca causacushcallamantaj cutin tigrashalla” nishpami tigran.

²⁵Ña tigrashpaca, p'ichashca allichishca chushajlla huasi ucu shinatami chai runataca ricun.

²⁶Chashna cajta ricushpaca, paita yalli millai canchis supaicunata pushashpami, chai runaman yaicushpa causancuna. Chaimantami chai runaca ñaupa ima shina cashcatapish yalli millai tucun” nircami.

²⁷Jesús chaicunata nicujpirajmi, chaipi cajcunapaj chaupimanta shuj huarmica: — ¡Canta huachashpa chuchuchishpa huiñachij huarmica, cushichishcami canga! — nishpami caparirca.

²⁸Shina nijpi Jesusca: — ¡Diospaj Shimita uyashpa cazujcunami, ashtahuan cushichishcacuna! — nirca.

²⁹Achcacuna ashtahuan tandanacumujpimi Jesusca cashna nirca: “Cai punllapi causajcunaca, millaicunami. Paicunaca milagrota rurashpa ricuchichunmi mañancuna. Paicunamanca manataj ricuchishcachu canga. Ashtahuanpish profeta Jonás shina tucushcallatami ricungacuna.

³⁰Jonasca, Ninivepi causajcunapajca pi mana chashna tucushcata ricunami tucurca. Chai shinallatajmi Runa Aichayujpish cai punllapi causajcunapajca, pi mana chashna tucushcata ricuna tucunga.

³¹Imalla rurashcata Taita Dios ricuchi punllapica, ura llajtata jatun mandaj huarmimi cunan cai punllapi causajcunataca mana allitamari rurashcanguichij ningapaj shamunga. Chai huarmica ñaupa mandaj Salomón yachaisapa cajpimi, pai yachachishcata uyangapaj caru llajtamanta shamurca. Riquichij, caipica Salomontapish yallimari tiyan.

³²Imalla rurashcata Taita Dios ricuchi punllapica, cunan cai punllapi causajcunataca Ninivepi causajcunami mana allitamari rurashcanguichij ningapaj shamungacuna. Ninivepi causajcunaca Jonás huillajpimi, paicuna juchayuj cashcamanta Taita Diosman cutirircacuna. Riquichij, caipica Jonastapish yallimari huillacuni.

³³Luzta japichishpaca, pacallapi churangapaj, cajón ucupi churangapajca pi mana japichinchu. Ashtahuanpish huasi ucuman yaicujcuna achijllapi yaicuchunmi lámpara tiyanapi churan.

³⁴Ñahuica cuerpopaj luzmi. Cambaj ñahui alli cajpica, tucui cuerpomi achijlla canga. Ashtahuanpish cambaj ñahui mana alli cajpica, cambaj tucui cuerpomi amsapi canga.

³⁵Alli yuyaihuan cangui. Canpi tiyaj luz ñataj amsayanman.

³⁶Cambaj tucui cuerpo luzhuan junda cajpica ima amsa mana tiyangachu. Ima shinami lámpara pai achij nishcahuan achijyachin, chai shinallatajmi tucui cuerpo achijlla canga” nircami.

³⁷Jesús tucui parlashca q'uipami shuj fariseo runaca paipaj huasipi micunaman jacupai nijpi, Jesusca chaiman rishpa huasiman yaicushpa micungapaj tiyarirca.

³⁸Maquita mana maillashpa micuj tiyarijpi chai fariseo mancharijpimi,

³⁹Mandaj Jesusca: — Fariseocuna cancunaca vasotapish, platotapish jahuallatami maillanguichij. Ashtahuanpish ucu shunguca, shuhuana, imatapish mana allita rurana yuyaihuan jundami canguichij.

⁴⁰¡Yuyai illajcuna! ¿Manachu jahuatapish, ucutapish Taita Diosllataj rurarca?

⁴¹Tucui imalla charishcamanta huajchacunaman cuna cashcata cujcunaca, chuyacunami canguichij.

⁴²Fariseocuna ¡aij cancunalla! Mentata, rudata, chagrapi p'ucushca tucui laya granocunata chungamanta shujta cujcunami canguichij. Ashtahuanpish cashcata ruranata, Taita Diosta c'uyanataca mana yuyaringuichijchu. Taita Diosman cunatapish mana saquishpami, chai mandashcacunataraj rurana carcanguichij.

⁴³Fariseocuna ¡aij cancunalla! Sinagogacunapipish, puntapi tiyarinatami munanguichij. Plazacunapipish, allillachu cangui nichunmi munanguichij.

⁴⁴Mandashcacunata quillcajcuna, fariseocuna, mishqui shimi jayaj shungucuna ¡aij, cancunalla! Cancunaca huañushcata pambashca jutcu shinami canguichij. Chai jahuata purijcunaca, ucupi ima tiyashcataca mana yachancunachu — nirca.

⁴⁵Chaipica Mandashcacuna ima nisha nishcata yachachijcunapuramanta shujca: — Yachachij, can chashna nishpaca, ñucanchijtapishmari jatun llaquirinata rimangui — nirca.

⁴⁶Chaimi Jesusca: — Mandashcacuna ima nisha nishcata yachachijcuna ¡aij cancunalla! Runacunamanca mana apari tucuipajtami apachinguichij. Ashtahuanpish cancunaca, shuj dedollahuanpish mana tuparinguichijchu.

⁴⁷Cancunapaj ñaupa yayacunallataj huañuchishca profetacunata pambashca jahuapi pircashpa sumajyachijcuna ¡aij cancunalla!

⁴⁸Chashna rurashpaca, cancunapaj ñaupa yayacuna rurashcatami alli nishcata ricuchinguichij. Profetacunataca paicunami huañuchircacuna. Cancunaca chai jahuapi pircashpa sumajyachijcunami canguichij.

⁴⁹Chaimantami Taita Diosca tucuita yachaj cashpa: “Profetacunatapish, apostolcunatapish ñucaca cachashami. Paicunamanta maijancunataca huañuchingacunami, shujtajcunataca catirashpami llaquichingacuna” nirca.

⁵⁰Cai pacha callarimanta tucui profetacunata huañuchishca yahuarmantaca, cunan punlla causaj cancunatami Taita Diosca llaquichinga.

⁵¹Abelta huañuchishca yahuarmanta, Zacariasta huañuchishca yahuarcamami, cunan punlla causaj cancunata Taita Diosca llaquichinga. Chaica chashnatajmi. Zacariastaca Taita Diospaj huasihuan, altarhuan chaupipimi huañuchirca.

⁵²Mandashcacuna ima nisha nishcata yachachijcuna ¡aij cancunalla! Taita Diosmanta yachana yuyaitaca huichcashpami cancunaca mana yachashun nircanguichij. Cancunallataj mana yachashun nij cashpami, shujtajcuna yachashun nijpipish mana saquinguichij — nircami.

⁵³Chaipica Mandashcacunata quillcajcunapish, fariseocunapish achcata p'iñarishpami, Jesustaca achcata rimarichun caita chaita tapushpa p'iñachi callarircacuna.

⁵⁴Ima mana allita rimajpica juchachinata japingapajmi chashna tapurcacuna.