Read Chimborazo Highland Quichua LUCAS 13 Bible Online

LUCAS 13 - Chimborazo Highland Quichua bible

LUCAS 13

¹Jesús chashna yachachicujpica, taucacuna paipajman shamushpami: — Galileamanta runacuna Taita Diosman sacrificiota cucujpica, Pilatoca paicunatapish huañuchishpami, paicunapaj yahuartaca chai animalcunapaj yahuarhuan chagrurca — nishpami parlarcacuna.

²Jesús cutichishpaca: “¿Chai galileocuna huañushcamantaca, caishuj galileocunata yalli juchayujcuna cashcamantami chashna tucushca yuyanguichijchu?

³Cancunataca cashnami nini: Millaita ruracushcata mana yuyashpa mana cutirishpaca paicuna shinallatajmi tucuicuna chingaringuichij.

⁴Siloepica, jatun torre urmashpami chunga pusajcunata llapishpa huañuchirca. ¿Jerusalenpi causajcunata yalli millai runacuna cashcamantachu chashna tucushca yuyanguichijchu?

⁵Cancunatapish cashnami nini: Millaita ruracushcata mana yuyashpa mana cutirishpaca paicuna shinallatajmi tucuicuna chingaringuichij” nircami.

⁶Cai yuyachij parlotapishmi cashna parlarca: “Shuj runami, paipaj uvas chagrapi higo yuratapish tarpushpa charirca. Paica p'ucushca granota mashcanaman shamushpaca, imata mana japishpaca,

⁷uvas chagrata cuidajtaca: “Ña quimsa huata cajpimari, cai yurapi granota mashcaj shamurcani, manamari japinichu. ¿Imapajtaj yanga cai allpapica shayacungalla? ¡P'itishpa shitai!” nirca.

⁸Chaimi chagrata cuidajca: Amito, cai huatallahuan saquipai. Paipaj muyundij allpata cuyuchishpa, majadata churashpa ricusha.

⁹Chaipi p'ucujpica allimi canga, chaipipish mana p'ucujpica p'itishpa shitangui” nirca.

¹⁰Samana punllapimi, Jesusca sinagogapi yachachicurca.

¹¹Chaipica, unguchij supai curcuyachijpi chunga pusaj huatata curcuyashca shuj huarmimi tiyacurca. Chai huarmica manataj derecho shayari tucujmi carca.

¹²Paita Jesús ricushpa cayashpaca: — Huarmi, cambaj ungüimantaca ñami cacharichishca cangui — nishpa,

¹³paipaj jahuapi maquita churajpica, chai huarmica derecho shayarishpami Taita Diosta sumajmari cangui nirca.

¹⁴Samana punllapi Jesús alliyachijta ricushpami, sinagogapi jatun pushajca, achcata p'iñarishpa chaipi cajcunataca: — Trabajanapajca sujta punllacunami tiyan. Chai punllacunapimi, alliyachichunca shamuna canguichij. Samana punllapica mana shamunachu canguichij — nirca.

¹⁵Mandaj Jesusca cashnami nirca: — ¡Mishqui shimi jayaj shungu! ¿Manachu cancunaca, cancunapaj huagrata, burrotaca samana punlla cajpipish, huatashcamanta cacharishpa, yacuta ubyachinaman pushanguichij?

¹⁶Cai huarmica, Abrahampaj huahua huahuamari. Paitaca, chunga pusaj huatacunatami Satanasca huatashcata charicushca. Samana punlla cajpipish, chai huatashcamantaca cacharichinami cani — nirca.

¹⁷Jesús chashna nijpica tucui paita p'iñacujcunami achcata pingarircacuna. Ashtahuanpish chai tucui achcacunaca Jesús chai alli sumajcunata rurajta ricushpaca achcatami cushicurcacuna.

¹⁸Jesusca cashnapishmi nirca: “Taita Dios mandacujpi ima shina canataca ¿imaman rijchaj nishpataj ch'imbapurashpa ricuchishari?

¹⁹Chaica cashnami canga. Mostaza muyuta shuj runa paipaj allpapi tarpujpica jatun yurami tucun. Chai muyu huiñashpa jatun yura tucujpica, pajarocunami tazinashpa causancuna. Taita Dios mandacujpipish chashnami canga” nircami.

²⁰Jesusca cutinmi cashna nirca: “Taita Dios mandacujpi ima shina canataca ¿imahuantaj ch'imbapurashari?

²¹Taita Dios mandacujpica cashnami canga. Shuj huarmi quimsa taza cutapi levadurahuan chapujpi, tucuita p'unguillichij shinami canga” nirca.

²²Jesusca Jerusalenman ricushpaca pueblocunapi, uchilla llajtacunapi, yachachihuan yachachihuan ricujpi,

²³shuj runa tapushpaca: — Amito, ¿quishpirijcunaca ashacunallachu? — nijpi Jesusca:

²⁴— Quichqui punguta yaicunata yuyaichij. Achcacunami yaicunata yuyangacuna. Ashtahuanpish mana yaicui tucungacunachu. Chaica chashnatajmi.

²⁵Huasiyuj yaya jatarishpa punguta huichcashca q'uipami, canllapi cajcunaca pungumanta cashna nishpa cayai callaringuichij: “Amito, Amito, punguta pascapai” ninguichijmi. Ashtahuanpish paica cancunataca: “Mana rijsinichu, maimantapishchari canguichij” ningami.

²⁶Shina nijpica: “Canhuanmi micurcanchij, ubyarcanchij. Canllatajmari ñucanchij plazacunapipish yachachircangui” ninguichijmi.

²⁷Ashtahuanpish huasiyujca: “Mana rijsinichu, nijtaca uyaichigari. Millaita rurajcuna caimanta anchuichij” ningami.

²⁸Taita Dios mandacujpi Abrahamta, Isaacta, Jacobta, tucui profetacunatapish chaipi cajta ricushpaca, cancunaca canllaman shitashca cashcamanta quirucuna canirinacushpami huacanguichij.

²⁹Taita Dios ña mandacujpica, inti llujshinmanta, inti huashicunmanta janajmanta, uramantapish gentecuna shamushpami, micungapaj tiyaringacuna.

³⁰Chaipica, cunan puntapi cajcunaca, huashayachishcami cangacuna. Cunan huashaman cajcunaca puntapi churashcami cangacuna — nircami.

³¹Chai punllallataj maijan fariseocuna Jesuspajman chayashpaca: — Cantaca Herodesca, huañuchisha nicunmari, caimanta llujshishpa utca ri — nijpimi,

³²Jesusca: — Richij, chai zorramanca cashna nigrichij: “Cunanhuan, cayahuan supaicunata llujshichishpa, ungushcacunata alliyachishpaca, quimsa punlla q'uipaca ñuca rurana cashcataca tucuchishallami”.

³³Shina cashpapish cunanpish, cayapish, cayapaj cayapish ñuca maiman ricushcamanca rinallami cani. Shuj profetataca shujtaj llajtapica mana huañuchinallachu. Jerusalenllapimi huañuchina.

³⁴¡Jerusalenpi causajcunalla, Jerusalenpi causajcunalla, profetacunata huañuchijcuna, Taita Dios cachashca huillajcunata rumihuan shitajcunami canguichij! ¡Tauca cutinmi mama atillpa paipaj huahuacunata alas ucupi ugllaj shina tandachisha nircani! Ashtahuanpish mana uyarcanguichijchu.

³⁵Chaimantami cancunapaj huasica shitashca saquiringa. Ñucataca cunanmanta pachami: “Jatun Diospaj shutipi shamucuj, allimari cangui” nina punllacama manataj ricunguichij — nircami.